Iku ‘a e Pangikee Pule mo e Pangike Langa Fakalakalaka ki he Fakamaau’anga.
Kuo fakalalahi ‘a e feta’emahino’aki ‘i he vaha’a ‘o e Pangike Pule ‘a Tonga pea mo e Pangike Langa Fakalakalaka ‘a Tonga(PLFT) ‘aia ‘oku ma’u ‘inasi ai ‘a e pule’anga mo e Retirement Fund ‘a e kau ngaue Fakapule’anga.
Na’e kamata foki ‘eni pea mei he lau mahina (Mee-Sune) kuo toki ‘osi, ‘i hono tuku atu ‘e he Pangike Pule ha tohi fakatokanga ki he kau taki ‘o e Pangike Langa Fakalakalaka ki he tu’unga fakapa’anga mo e founga fakalele ngaue ‘a e pangike.
Pea ‘i he ‘aho 17 Mee 2024 na’e toe tuku atu ai ‘e he Pangike Pule ha tohi mo ha ngaahi tu’utu’uni ‘oku mamafa ange ki he Pangike Langa Fakalakalaka, ko’enau tui ‘oku ‘ikai ke fakahoko ‘e he pangike ‘a e ngaahi fiema’u na’anau tuku atu kiate kinautolu.
Na’e kau ‘i he fekau mamafa na’e ‘oatu ‘i he tohi ko’eni ke ‘oua na’a toe ‘iai ha kaunga ‘o e pule lahi pe CEO, ‘Emeline Tuita ‘i he me’a fekau’aki mo hono fakalele ‘o e pangike. Na’e ma’u ‘e he Pangike Langa Fakalakalaka ‘a e tohi hono ua ko’eni he ‘aho 20 Mee pea kamata mei ‘enau ngaue ke fakafepaki’i ‘a e tu’utu’uni mei he Pangike Pule.
‘I he mahina tatau pe na’e faka’ohovale hono ma’u ‘e he ongoongo ni ha fakamatala falala’anga kimu’a pea toki tuku mai ‘e e ongoongo tukuatu ‘a e Potungaue Polisi, na’e huu ‘a e kau Polisi mo e tohi kumi koloa ki he Pangike Langa Fakalakalaka ‘o to’o ‘a e ngaahi koloa fekau’aki mo e ngaahi fakamatala. Ko e kole ‘eni ia mei he tafa’aki ‘o e Talatalaaki ‘oku hopo mo e PLFT ko’enau manavasi’i ki hono tu’utu’uni mei he Pangike Pule ki he CEO mo e Sea ‘o e Poate PLF, na’a puli ai ha ngaahifakamatala teuteu ki he fakatonutonu fakalao.
Kaekehe ‘i he mahina ko Sune, na’e fakahuu atu ‘e he Pangike Langa Fakalakalaka ‘enau tohi kole ki he Fakamaau’anga he tu’utu’uni ke:
1) Fakafoki kotoa ‘e he Potungaue Polisi ‘aia na’e taki ai ‘a e ‘ofisa Polisi ko Tohifolau ‘a e ngaahi naunau na’e ‘ave he kau Polisi pea mei he pangike
2)Pea ‘oua na’anau ngaue’aki ki ha me’a ‘a e ngaahi naunau pe fakamatala kuonau puke
3)pea ke kole fakamolemole ‘a e Pangike Pule ‘i he mitia ki he Pangike Langa Fakalakalaka
4)pea ‘oua na’a toe ‘iai ha ngaue kae ‘oleva ke toki ‘iai ha lau kiai ‘a e Fakamaau’anga.
Ka ko e pango na’e ‘ikai ke tali ‘e he Fakamaau’anga ‘a e kole ko’eni koe’uhi, na’e ‘ikai ha ‘uhinga malohi ia koeha ‘oku fiema’u fakavavevave ai ‘a e kole tu’utu’uni. He na’e tui ‘a e Talatalaaki pe Pangike Langa Fakalakalaka na’e hala ‘a e huu ko’eni ‘a e kau Polisi ki he pangikee pea ke fakafoki ‘a e koloa kotoa na’e to’o mei ai pea na’e ‘ova atu ‘a e ngaue ia ‘a e kau Polisi ‘i he mafia ‘o e tohi kumi koloa na’e foaki he Fakamaau’anga.
Ka neongo foki ‘a e ‘ikai tali ‘a e kole mei he Pangike ka na’e tali he Fakamaau’anga ia ‘a e kole ‘a e Talatalaki ‘aia ko e CEO ‘Emeline Tuita mo e Sea ‘o e Poate Peni Vea ke fai ha fakatonutonu fakalao ki he tu’utu’uni koia mei he Pangike Pule ke ‘oua na’ana toe kaunga ki ha me’a fekau’aki mo e ngaue ‘a e Pangike Langa Fakalakalaka . Pea ke ta’ofi ‘a e Pangike Pule ki hano toe tuku atu ha fa’ahinga fakamatala kitu’a fekau’aki mo e kaveinga ni.
Na’e tali ‘e he Fakamaau’anga ‘a e tautapa ‘a e ongo Talatalaaki ‘i he ‘uhinga ko e ‘ikai ma’u hana faingamalie ke fakahoko ha’ana tali, ke maunau ai ‘ena totonu fakafo’ituitui(natural justice).
Na’e tuku atu mo e faingamalie mo e taimi ki he tafa’aki ‘a e Faka’iloa ko e CEO Tatafu Moeaki pea pehee ki he Pangike Pule ke fai ha’anau tali pea ‘e toki mahino ai e hoko atu ki ha hopo ‘i he Fakamaau’anga.
Ko e Pangike Langa Fakalakalaka ‘oku pule’i mo muimui’i ‘a e ngaahi pangike he fonua ‘o kau ai ‘a e Pangike Langa Fakalakalaka. Ka ‘oku hoko ‘eni kenau a’u ki he Fakamaau’anga pea ko hono lelei ki he kakai ‘o e fonua, ko hono ‘ohake ‘a e ngaahi fakamatala kotoa he Fakamaau’anga ‘a e me’a ‘oku hoko ‘oku tupunga ai ‘a e fekolo’aki pea ‘oku ‘ataa leva ia ke tuku atu he ngaahi kautaha ongoongo kitu’a ki he kakai ‘o e fonua, kenau ‘ilo ki he ngaahi palopalema he pule’anga.
