Ha’elea ta’e’amanekina ‘e he Tama Tu’i mo e Ta’ahine Kuini ‘a e Block Party
Na’e faka’ohovale ki he fu’u kakai tokolahi na’anau ‘ahia ‘a e polokalama block party ‘i he poo Falaite ‘o e uike kuo’osi, ‘a hono ‘ahia ta’e’amanekina ‘e he Tama Tu’i ‘o Tonga pea mo e Ta’ahine Kuini ‘a e katoanga ni.
‘Oku ‘ikai pea te’eki manatu’i he ngaahi to’utangata mai kimui ni hano ‘ahia ‘e Fale Lahi he polokalama pehe ni kae tautefito ki he Hau ‘o e Fonua mo e Ta’ahine Kuini. Ka ‘oku fakafuofua nai ki he taimi 8-9pm kuo fakatokanga’i atu ‘e he ongoongo ni mei he ‘elia ‘oku tu’u ai ‘a e founiteni ‘o e tolofini, ‘a e ulo mai ‘a e ngaahi maama me’alele fakafe’ao. Pea ofongi hake ‘a e lue ‘a e kau fakafe’ao (body guard) ‘e took 10 he tafa’aki ‘o e ongo ki’i me’alele na’e ha’ele takitaha peai ‘a e Tama Tu’i mo e Ta’ahine Kuini. Na’e ‘ikai fakalea ‘a e ngaahi saileni ‘o e me’alele fakafe’ao, ka ko e maama pe na’e ulo ‘o lele mu’omu’a ‘a e me’alele Polisi pe ‘e taha pea hoko atu atu ‘a e Tama Tu’i pea toki hoko atu ‘a e Ta’ahine Kuini.
Ko e fiefia lahi ‘a e longa’i fanau mo e fu’u kakai tokolahi na’anau ‘i he block party henau vakai lelei mo ofi ki he Tama Tu’i mo e Ta’ahine Kuini mo ta’ata’alo ‘a e fanau mo e kaikaila talamonu ki he Tama Tu’i ‘i he fakamanatua hono ‘aho alo’i.
Na’e hoko foki ‘eni ke ‘ohovale pea fakahikihiki’i he kakai na’e ‘i he katoanga ‘a e mokoi ‘a e Tama mo e Kuini kena ‘ahia hona kakai lolotonga ‘a e block party, ke fakahounga’i ‘enau kau mai ki hono ‘aho katonga pea he ‘ikai ke ngalo ia he tokolahi.
‘Oku ‘ikai foki lave’i pe na’e kau ‘eni ia he polokalama, ka ko e tui ‘a e tokolahi ko e finangalo pe ia ‘o e Tama Tu’i ke ne ‘ahia ‘a e katoanga ke vakai tonu ki hono kakai pea ‘oku fakatumutumu ‘a e tokolahi he afeitaulalo ‘a e Tama ke kau mo hono kakai pea ‘oku fakafotunga mai ai ‘ene tauhi kakai lelei ko e Tu’i mo e Tauhi Sipi Lelei ko e taki ‘o e fonua.
Na’e ‘iai tonu foki ‘a e ongoongo ni he taimi na’e ha’ele mai ai ‘a e Tama Tu’i mo e Ta’ahine Kuini mei Palasi ki he block party, mo vakai tonu ki he fiefia mo e ‘ohovale ‘a e kakai ‘i he ha’elea he Tama ‘a e katoanga. Ko’ene hae’elea ko’eni, ko e ‘osi ia ‘a e float ‘a e fonua kehekehe ‘oku ‘iai honau kakai ‘i Tonga pea na’e kau ia he polokalama fakamafana ke mamata ki he ngaahi fonua ‘enau kau mai ki he katonga’i ‘a e ‘aho ‘o e Tama Tu’i.
Ko e ngaahi fonua, ko Siaina, Siapani, ‘Initia, ‘Amelika, Filipaini, Ha’amoa, Fisi mo e ngaahi fonua kehe pe. Na’e kau mai kiai mo e ngaahi komiti sipoti mo e ngaahi sino kehekehe pe pea ‘oku tui ‘a e tokolahi ko e kau ia he block party faka’ofo’ofa hono fokotu’utu’u. Pea ko e ‘osi ‘a e ngaahi float pea na’e toki ha’elea he Tama mo e Ta’ahine Kuini ‘a e block party.
‘Oku hanga ‘e he to’onga ko’eni ‘a Fale Lahi ‘o ngaohi ‘a e kakai kenau to e ‘ofa mo e toka’iange ‘a e Fale ‘o Tupou. Pea neongo ‘a e ngaahi teke fakapolitikale ‘oku fakahoko, ka ko e ‘ofa mo e loto ‘o e Tonga ‘oku ‘iai honau Tu’i pea tenau tauhi kiai ‘o tuputupu’a.
