Tautea ngaue popula ki he kaiha’a mei he Misiume Fakafonua fe’unga mo e $231,700
Na’e tautea ngaue popula ‘e Fakamaau Lahi CJ Cooper ‘a e ongo Faka’iloa ko Tevita Pasi pea mo Siosaia Taulahi, ‘i he ‘aho 16 Mee 2024 ‘i he Fakamaau’anga Lahi ‘i Nuku’alofa, ki he hia ko e kaiha’a mamafa.
Na’e tautea ‘a Taulahi ke ne ngaue popular he ta’u ‘e 4 mahina ‘e 4, kae toloi ‘a e ta’u ‘e 2 fakamuimui ‘i he ngaahi makatu’unga. Pea tautea ngaue popula ‘a Pasi ke ne ngaue popular he ta’u 6 mahina ‘e 4 kae toloi malu’i ‘a e ta’e ‘e 2 fakamuimui ‘i he ngaahi makatu’unga.
Ko e hia na’e tautea ngaue popula ai ‘a e ongo Faka’iloa, ko e kaiha’asi ‘a e koloa mei he Misiume Fakafonua ‘a Tonga, ‘o fe’unga hono lahi fakapa’anga mo e $231,700.
Ki he fakaikiiki ‘o e hia ni, na’e ha’u ‘a Ms Milika Pamana he ‘aho 12 Tisema 2022 ‘o ‘ilo na’e hae ‘a e misiume pea kaiha’asi ‘a e ngaahi koloa lahi mei ai. Na’e fe’unga mo e koloa misiume ‘e 58 na’e mole pea ko hono faapa’anga ko e $231,700.
‘I Fepueli 2023 na’e sio ai ‘a Pamana ‘o ‘ilo he Facebook, ‘oku tu’uaki fakatau he tokotaha ko Roselyn Mafikaunanga Tofavaha ‘a e konga ‘o e koloa mole mei Nu’usila pea ne lipooti ki he kau Polisi. Na’e hoko atu ‘a e fakatotolo ‘o ‘ilo mei he tokotaha tu’uaki ko e koloa na’e fakatau pea mei he Maketi Talamahu ta’afaki ki he ngaahi koloa fakatonga mo e fakamea’a.
Na’e hoko atu ai ‘o ma’u ‘a e Faka’iloa ko Tevita Pasi mo hono hoa pea puke kinaua ‘o hua mo hona ‘api ‘o ‘ilo ai ‘a e konga ‘o e koloa na’e kaiha’asi.
‘I he ‘aho 31 Ma’asi 2023 na’e puke ai mo e Faka’iloa ko Siosaia Tautahi mo e matapule ta’u 14 pea fakahoko honau faka’eke’ehe he ‘aho 16 ‘Epeleli ‘ona vetehia ai ki hono hae ‘a e misiume ‘o kaiha’asi ‘a e koloa ‘o ‘ave kia Tevita Pasi ‘o fakafetongi ‘aki ‘a e faito’o konatapu ko e ‘aisi.
Na’e tukuaki’i foki kia Pasi he koia ‘oku lahi he kau faihia, na’ane fakahoko hono ‘atamai’i ‘a e ngaue ke fakahoko pea mo hono faka’ai’ai ‘a e hia. Ko e tokotaha na’e vetehia ia ko e taimi na’e fakahoko ai ‘a e hia na’e ‘uluaki ‘oange ‘a e ‘aisi ke ne ifi.
Ko e lahitaha ngaahi koloa na’e kaiha’asi ki he ngaahi koloa fakatonga mo e ngaahi ngaue fakamea’a. ‘Oku kau foki ‘a e ngaahi koloa he ngaahi misiume he mamafa hono mahu’inga faapa’anga he ko e konga lahi ko e ngaahi koloa tupu’a fuoloa.
