Ikuna Usyk fuhu lahi taha ‘o e senituli, ta’efiemalie ‘a Tyson Fury he ola
Kuo lava atu ‘a e fuhu lahitaha ‘oku taku he kau manako sipoti fuhu, ko e fuhu lahitaha ‘eni ‘o e senituli he vaha’a ‘o e hau ‘o mamani ko Tyson Fury pea mo Oleksandr Usyk, na’e fakahoko he ‘aho 28 Mee 2024 ki Riyadh, South Arabia.
Na’e kau ‘eni he fuhu manakoa mo mamata’i lahi, ‘o tatau pe fale na’e fakahoko ai pea mo e kau mamata ‘i he TV.
Na’e ikuna ‘e he to’a mei Ukraine, Usyk ‘a e fuhu malie ni ‘aki ‘a e loto kiai ‘a e ongo fakamaau ‘e toko ua kae tokotaha ki he hau maloloo Tyson Fury. Pea neongo ‘a e ikuna kafakafa kuo fakahoko ‘e he to’a mei Ukraine, ka kuo tuku mai ‘e Tyson ‘ene fakamatala ‘o tukuaki’i ‘ene fo’i. Na’ane tui koe’uhi ko e lolotonga hoko ‘a e tau ‘i Ukraine mo Lusia, ‘oku kau ai ‘a e tokolahi kia Usyk ko e faka’ofa’ia he tau hono fonua, ka ko’ene tui na’e totonu ke ne ikuna ‘a e fuhu.
‘Oku ‘ikai fu’u ‘uhinga malie ki he kau manako fuhu tokolahi ‘a e fo’i tuli tonuhia ‘a Fury, ka ‘oku hangee ‘oku ne heliaki ko e ‘uhinga ki he ongo Fakamaau na’ana foaki ‘a e ikuna ma’a Usyk, he ‘oku ‘ikai ha kaunga ‘a e kau mamata ki he faitu’utu’uni ‘o e malohi mo e fo’i, ka ko e sio pe.
Na’e lahi foki hono fehi’anekina ‘o Fury kimu’a he fuhu koe’uhi ko e lahi ‘ene ngutu fakamatala pea ko e malohi ‘a Usyk na’e ‘ohake he kakai tokolahi ‘ene ngutu fakamatala. Ka ‘oku tui ‘a e kau taukei fuhu ko e to’onga ia koia ko e to’onga sipoti pe ia pea ‘oku fa’a hoko pe ia ke fusi mai ‘a e tokanga ‘a e kau poupou ki hono poupou’i mo mamata’i ‘a e fuhu.
Kuo tukuaki’i he tokolahi ia ‘a e tangata’eiki ‘a Fury, John Fury na’ane to’o tokanga hono foha mei he lahi ‘ene kaunga mai ki he kau faiako ‘oku nau tokanga’i ‘a e tuliki (corner) ‘o Fury. Na’e a’u foki ke ne lau ia ki he timi ‘a Usyk pea ne tui ‘ulu’i ‘a e tokotaha ‘o toto ai hono ‘ulu.‘Oku kau ai pea mo e tukuaki’i na’e ‘iai fa’ahinga me’a na’e ‘oange he kau faiako kia Usyk lolotonga ‘a e malolo fuhu he taa ‘a e fafangu. Ka ko e ngaahi talanga kotoa ko’eni ‘oku ‘ikai ke ne liliu ‘eia ola ‘o e fuhu.
Kaekehe ko e talanoa mahu’inga taha pea neongo ‘a e fo’i ‘a Fury ka ‘oku fa’o ‘eia ‘a e $100 miliona ki he’ene peesi pangike ‘o fakatatau ki he aleapau ko e 70% ‘o e pa’anga kotoa ‘e ma’u he fuhu ‘e ‘alu ia kia Fury he ko e hau ia. Pea ko e $30 miliona leva ‘e ma’u ia ‘e Usyk. Pea ko e tama hoko leva te ne pole’i ‘a e leta meia Usyk ‘e fakafekefeka ia ki he lahi ‘o e pa’anga ‘e loto kiai ‘a Usyk mo’ene timi kae toki fakahoko fuhu. Ka kuo ‘osi fakahaa ‘e Fury ‘oku ne fiema’u ke na toe fuhu.
Ko e lekooti fuhu leva ‘a e ongo tangata ni Ko Fury ko e malohi ‘e 34 mo e knockout ai ‘e 24 pea fo’i 2 pea taha ‘ia Usyk, ‘ikai ha mahanga. Ko Usyk ko e malohi ‘e 22 mo e knockout ‘e 14 te’eki fo’i pe mahanga.
Ko e malohi ‘a Usyk ‘oku ne kahoa ai ‘a e leta ‘o e ngaahi kautaha fuhu lalahi ‘e 3 ko e WBA, WBO mo e IBF.
Na’e totonu ke fakahoko fuhu ko’eni he mahina ‘e 3 kuohili ka na’e hoko ‘a e lavea ki he nima ‘o Fury pea toloi mai ai ki he mahina ni. Ka na’e tui ‘a e tokolahi na’e ‘ilifia ‘a Fury pea ko e ngaahhi tulitonunia pe ke toloi ‘a e fuhu.
Kuo tukuaki’i he kau mamata fuhu na’e tonu ke TKO ‘e Usyk ‘a Fury he takai hono 9 ka ko e toe ‘oho ‘a e Fakamaau ‘o ta’ofi, ka na’e ‘ikai ko e ‘osi ai pe fuhu kae hao ‘a Fury ki he Fakamaau hono tuki pohu ia ‘e Usyk ‘o ‘ikai toe lava lii hake kaati ki he ‘ulu.
Kaekehe kuo lahi ‘a e kau to’a fuhu kuo nau faka’amu ke fuhu mo Usyk kau ai to’a Ha’amoa ‘oku ‘asi hake ‘ene fuhu he taimi. Ka ‘oku tui ‘a e tokolahi ke ki’i taitaimi ‘o ako ke lahi na’a motu hono kaha’u he fakavavevave ki he fanga laione.
