Fanofano mai ‘Isileli mei he pekia ‘a e taki ‘o Iran Ebrahim Raisi.
Ko e lolotonga ‘a e kei lele ‘i mamani lahi ‘a e ongoongo fakamamahi ki he kakai ‘o Iran he mate honau taki, kuo fanofano mai ‘a e kau taki ia ‘o ‘Isilelei henau ngaahi kautaha ongoongo ‘oku ‘ikai ha kaunga ‘a ‘Isileli ki he me’a ni.
He neongo pe koeha ‘a e ‘uhinga totonu ‘o e tupu’anga ‘o e fakatu’utamaki ki he helekopeta na’e mate ai ‘a Palesiteni Ebrahim Raisi, ka kuopau pe ke ‘iai ‘a e fakahu’uhu’u ia ki ‘Isileli koe’uhi ko hona vaa fakafonua na’e mahino ‘ene ‘ikai sai he ngaahi ta’u lahi.
Ko e lau mahina si’i pe ‘eni hono fana misaila ‘e Iran ‘a ‘Isileli kuo ongona mai ‘a e pekia ‘a Raisi pea ‘e ‘iai pe hono tukuaki’i ‘o ‘Isileli neongo ‘a e me’a kotoa.
Ko e pekia ‘a e Palesiteni ‘o Iran fakataha mo’ene Minista ki Muli Mr. Hossein Amir-Abdollahhian, hili ‘ena kau atu ki he polokalama na’e fakahoko pea ko’ena foki mei ai ‘o hoko ai ‘a e fakatamaki ‘i he Tonga Hihifo ‘o Iran ofi ki he ki’i kolo ko Uzi.
Kuo tuku atu ai ‘e he Palesiteni ‘o Lusia Vladimir Putin pea pehee ki he Palesiteni ‘o Siaina Xi Jinping ‘ene popoaki fie kaunga mamahi ki he famili pea mo e pule’anga Iran. He na’e kau ‘a Iran ‘i he fonua kaungame’a lelei ‘o Lusia pea mo Siaina kae tautefito ki he fengaue’aki fakakautau.
Ko e helekopeta na’e pekia ai ‘a e Palesiteni pea mo’ene Minisita ki Muli na’e ngaohi ia ‘i ‘Amelika ‘oku ‘iloa ko e Bell 212 ma’ae sotia ‘a Kanata ‘i he ta’u 1960 pea ‘oku ne lava ‘o uta ‘a e kau pasese ‘e toko 6 pea mo e ongo pailate.
‘Oku kau foki ‘eni he ongoongo lahi ki mamani koe’uhi ko e vaa koia ‘o ‘Isileli mo e ngaahi fonua ‘Alepea. He kapau ‘e hanga ‘e Iran ‘o ngaue’aki ‘a e pekia honau taki ke tukuaki’i ‘aki ‘a ‘Isileli ‘e hoko ia ko e poini lelei ke tu’u fakataha ai ‘a e ngaahi fonua ‘Alepea ke ‘ohofi ‘a ‘Isilelei. He ko’ene tu’u he taimi ni ‘oku lolotonga tau pe ongo fonua ‘i he fefana’aki ‘ena ngaahi mesaila.
‘Oku kei nofo pe ‘a e fakamatala mei loto Iran ko e mate’anga ‘a e Palesiteni mo’ene Minisita ki Muli ko e palopalema ‘a e helekopeta, ka ‘oku lele ‘a e fakatotolo pea ‘e toki ‘omai ha ngaahi fakamatala fakaikiiki ange.
Na’e toki fakanofo pe ‘a Raisi ki he lakanga taki ‘o Iran ‘i he ‘aho 3 ‘Aokosi 2021 pea ne pekia ko’eni ‘i he ‘aho ni. Ka kimu’a ai na’ane ‘i he ngaahi lakanga taki ma’olunga he fonua ‘o hangee ko’ene hoko ko e Tu’i Fakamaau Lahi ‘o e fonua.
