Toloi Fale Alea kae lava atu Palemia ki Niua ‘o fakataufolofola ki he Tama Tu’i
Kuo toloi ‘e he Sea ‘o e Fale Alea ‘a e fale, kae fakafaingamalie’i ‘a e Palemia mo e pule’anga kenau lava atu ki he motu mama’o, ke fai ha fakataufolofola ki He’ene ‘Afio.
Ko e talu hono ‘ohofi ‘e he kau fakaanga ‘a e Palemia mo e pule’anga ‘i he tali vave, ka ‘oku tui ‘a e tokolahi ko e tali vale ki he Hau ‘o e Fonua hili ‘enau ma’u ‘a e tohi mei he Fakataha Tokoni ko e fakahaa finangalo ‘Ene ‘Afio ‘ene ta’efiemalie ki he ongo Minisita ‘o e Taumalu’i ‘Ene ‘Afio pea mo e Potungaue ki Muli.
‘Oku Minisita ‘a e Palemia ‘i he Taumlau’i pea ko Hon, Fekita ‘Utoikamanu ‘i he Potungaue ki muli. Ka na’e tuai ‘enau ma’u ‘a e tohi kuo tuku atu ‘enau tali, ‘oku falala pe ‘a e Palemia ia ki he’ene Minisita ki Muli pea ‘oku fepaki ‘a e tohi mei he Fakataha Tokoni mo e konisitutone. Na’e hoko ‘a e fo’i tali ko’eni ‘a e Palemia mo’ene Kapineti ke toki lau he kau fakaanga ko e fo’i 91 tu’u ngutu’iluo kenau haupapa ai leva pule’anga ke veteki ‘a e kapineti.
Na’e toe malie ange ko hono hanga ‘e he kau fakaanga ‘o ngaue’aki fo’i laka hala ‘a e Palemia mo e Kapineti kenau fakapolitikale’i ‘a e fale politiki ‘o Tonga, kenau toutou ‘ohake ‘a e kaveinga ni he ‘aho kotoa. Na’e a’u ki ha taimi kuo mei ‘osi ‘a e kataki ‘a e Sea hono ta’ofi ‘a e kau memipa ‘o hangee ko Lord Nuku mo Tongatapu 7, ‘i he lahi ange ‘a e taimi ‘oku na ‘ohake ai ‘a e kaveinga ni kae tuku ‘a e ‘asenita.
Ka ‘i he’ene a’u mai ki he ‘aho, kuo tu’utu’uni ‘a e Sea ‘o e Fale Alea ke tapuni ‘a e fale ‘o toloi toki fanongonongo kae lava atu ‘a e Palemia mo’ene kau naite ‘o fakataufolofola ki he Tama Tu’i.
‘I he me’a ‘a e ni’ihi he fale mei he tafa’aki ‘o e kau fakaanga ki he pule’aga, ‘oku nau talamonu ki he teu fakataufolofola ‘oku fakahoko, ka ‘i he taimi tatau ‘oku ‘ikai ke lave’i ia ha taha pe kuo mama mai kitu’a ha finangalo ‘Ene ‘Afio ki he Palemia mo’ene kapineti, kae hange ia ha ki’i faka’aluma ‘a e kau fakaanga ki he teu ‘alu ‘a e Palemia.
Na’e lahi mo e teke kenau ‘alu ‘o huu louifi ‘aia ko e faka’ilonga ia ‘o e tukulolo kakato mo e kole fakamolemole. Pea ‘oku ‘ikai lave’i pe ‘e fakahoko ‘a e ‘ulungaanga fakafonua ko’eni pe ‘ikai pea kohai ‘e lava atu ki He’ene ‘Afio.
Na’e toe faka’anga’i lahi ‘a e haa mai ‘a e tokoni Palemia ‘o fakamafola ‘enau tali he letio kae ‘ikai fakahoko fakalotofale pe ‘i he vaha’a ‘o e ‘ofisi Palasi mo e Kapineti. Ka na’e fakama’ala’ala ‘a e PM, ‘oku fai ‘a e ngaue ki he tokotaha na’ane mama ‘a e fakamatala ki he media ‘o ‘ilo he kakai ‘o e Fonua pea hoko ai felafoaki, he na’e fakataumu’a pe ‘a e fetohi’aki ke fakahoko fakalotofale, ka ko hono mama ki he mitia.
Kaekehe ko e me’a malie na’e ‘osi ‘oatu he ongoongo ni pea na’e tonu pe vavalo ‘a e ongoongo ni, pe ko e tali na’e fakahoko ‘e he Kapineti ki he Tama Tu’i pe ko e kau fale’i. Pea kuo fakamahino ‘e he Palemia ‘i he ‘aho ni ko e tali na’anau fakahoko na’e fai ia ki he kau fale’i. ‘I hono ‘oatu he ongoongo ‘i he uike kuo’osi, ‘oku ngalingali na’e loto lahi ‘a e pule’anga ke fakahoko ‘enau tali ko’enau ‘ilo ko e kau fale’i ‘oku teke mui he me’a ni. Pea ‘oku fai ‘enau tau paoa ka ‘oku mole ai ngeia ‘Ene ‘Afio.
Pea ko’ene tu’u he taimi ni ‘oku ofi ange ‘a e taimi ta’epau ki he pule’anga ‘o Hu’akavameiliku, pe koeha ha tali mei taumu’a ki he teu folau atu ‘a e Palemia.
‘Oku lolotonga ‘i Niua ‘a e ha’ele pea ‘oku ‘ikai mahino ha taimi ‘ene liuaki mai pea koe’uhinga ia ‘oku folau ai ‘a e Palemia pea ko e taha kapau ko e folofola mai ke folau ange pe ko ha fiu ‘a e Palemia he kole ha taimi pea ne fakakaukau ke folau hangatonu pe ia ki he Tama Tu’i ‘o tatau ai pe koeha me’a ‘e hoko, kae koloa ke mahino hono finangalo ki he anga ‘ene to’o fatongia.
Na’e fiefia ‘a e tokolahi he fili na’e toki ‘osi ‘o pehee ko e kakai poto pea ko e mo’oni ko e kakai lelei, ka na’e kamata pe fehalaaki mei he ‘ikai ke ne fie ngaue fakataha mo e kau Tau’ataina na’anau tu’u fehangahangai, he na’e tui ia he ‘ikai ke lava ‘o fai ha ngaue fakataha, ka na’e faka’ikai’i ia ‘e ‘Aisake Eke ‘e lava pe ia ‘o ngaue fakataha ka ko e ‘ikai ‘ilo founga ke ne fakahoko’aki.
Kaekehe ‘oku toe manifi ange ‘a e va’a mei popo ‘oku hekau ai hotau tu’unga fakapolitikale he ‘aho ni pea ko’etau sio ‘ao tala matangi pe he ngaahi ‘aho si’i atu ko’eni pe koeha ‘a e me’a ‘e hoko.
