Tali halaia mo mo’ua ‘a Mapafisi Folau ki he tukuaki’i loi ‘o e Minisita Leipa
Kuo tali halaia pea mo mo’ua ‘a e matapule ko Mapafisi Folau, ki he hia ko’ene lau’i kovi’i mo tukuaki’i loi ‘a e Minisita Leipa Dr. Viliami Latu ‘i he Fakamaau’anga Polisi ‘a Tonga ‘i he Falaite ‘o e uike kuo’osi. Ko e faka’iloa mei leimatu’a kae nofo ‘Amelika, ka ‘oku ne lolotonga ‘i Tonga ni.
Ko e halaia mo e mo’ua ‘eni ‘a Mapafisi ki he ngaahi tukuaki’i kehekehe na’ane fakahoko ki he Minisita ‘i he mitia fakasosiale pea faka’ilo ai ia ‘i he lao fakamamahi he ‘initaneti. Pea ‘i he taimi tatau ‘oku ma’u he ongoongo ni ‘a e fakamatala ‘oku ‘amanaki ke toe fakahuu atu ‘e he Kalauni ‘ene tangi ko e ta’efiemalie ki he lahi ‘o e tautea na’e fakahoko ‘o fakatatau ki he lahi ‘o e maumau ‘oku hoko. ‘Ikai ngata ai ‘oku ‘iai mo e palani ke fakahoko mo e faka’ilo sivile koe’uhi ke ‘ave ‘a e tukuaki’i ki he tu’unga mafatukituki ‘oku totonu ke ‘iai hono tautea, koe’uhi ko e lahi ‘o e maumau na’e fakahoko.
Ko e ngaahi tukuaki’i na’e fakahoko he Faka’iloa ‘o pehee ko honau ‘api fakafamili ‘i Leimatu’a ‘i he feitu’u ki he mala’evakapuna, na’a hanga ‘e he Minisitaa ‘o tofi ‘a e konga ‘o e ‘api.
Na’e kau he tukuaki’i, ‘oku ne kai ‘a e pa’anga fakavahenga faka-FaleAlea ‘o fakatau’aki ‘a e fale ‘oku ne nofo ai ‘i Fasi, ka ko e ‘api foki ‘eni ia na’e fakafetongi ‘aki he pule’anga ‘a e tofia ‘o Fotu ke fakalahi kiai ‘a e mala’e vakapuna Lupepau’u.
Ko e taha ‘o e ngaahi tukuaki’i mamafa na’e fakahoko ki he Minisitaa, ‘o pehee ‘oku hanga he famili ‘o ngaue’aki kelekele ‘a e kakai kuo ‘osi lesisita kenau ma’u pa’anga ai pea ‘oku kau he kau milionea ‘a Tonga. Na’e toe kau he tukuaki’i ‘a e pehee ‘e ‘osi ‘a Leimatu’a hono fakatau ki he kau Siaina.
‘Oku toe oli’aki ‘oku toe fakamana taa mo e Faka’iloa ia ki he Minisita ‘o pehee ‘oku na famili pe ka ‘oku lahi ‘ene kui ‘a’ana ‘ia Fotu. Ko e tohi loloa fau na’e fakahoko he Faka’iloa ‘i he mitia fakasosiale ka ‘oku fakakatoa pe ia ki he fo’i lea ‘e taha ko e HALAIA.
Kaekehe ko e ngaahi tukuaki’i mamafa kotoa ko’eni na’e iku ke mo’ua ai a e Faka’iloa he Fakamaau’anga Polisi.
‘Oku tokolahi foki ‘a e kakai ‘oku nau anga’aki hono tukuaki’i ‘a e kakai kehe ‘i he mitia fakasosiale, ka ko e hiliage koia ko e fakamahamahalo mo e loi, ka na’a fakapaasi he Fale Alea ‘i he ta’u kuo’osi ‘a e lao ki hono ta’ofi ‘a e fa’ahinga to’onga palakuu ko’eni ‘i he mitia fakasosiale.
Ko e tokolahi foki ‘oku nau anga’aki ‘a e ngutu masila ‘i he mitia fakasosiale, ka ko e taimi ‘oku nau ‘alu ai ki he Fakamaau’anga, ‘oku toki ‘ilo ai ‘a e faka’ofa ‘o e ngaahi me’a ‘oku nau fakamatala, he ‘oku ‘ikai ha makatu’unga ka ko e anga pe ‘enau fakakaukau.
