Hao Piveni mei hono launga’i ‘e Tu’ilakepa ‘ikai ha fakamo’oni fe’unga
Na’e tu’utu’uni ‘a e komiti ki he totonu ‘a e kau memipa Fale Alea ke hao ‘a Piveni Piukala mei hano tautea ki he tukuaki’i na’e anga ta’efaka’apa’apa ki he Sea ‘o e Komiti Kakato Lord Tu’ilakepa.
‘I he aofangatuku ‘a e komiti, na’anau lototaha ai ‘oku ‘ikai ha fakamo’oni fe’unga ke mahino ko Piveni na’ane fakahoko ‘a e faitaa’i ‘o Lord Tu’ilakepa ‘o tuku atu ki he mitia fakasosiale ‘o tukuaki’i ‘oku tatoka he fale.
Na’e mau foki ‘e he nopele ‘a e tohi mei he Kaniva fakataha mo e la’itaa ‘o pehee na’ane mohe ‘i he lolotonga ‘o e lele ‘a e Fale Alea. Ka na’e fakamahino ‘e he nopele ‘oku ‘ikai ko e Fale Alea ka ko e ako ‘a e kau Fakafofonga Fale Alea na’e lolotonga lele pea na’e ‘ikai ke mohe.
‘I he kumi fale’i ‘a e komiti ki he ‘Ateni Seniale na’e fakahaa mei ai ‘oku pau ke ‘iai ‘a e ngaahi fakamo’oni fe’unga ki he tukuaki’i ko Tongatapu 7 na’ane fakahoko faitaa pea mo hono ‘ave kitu’a, ka ‘oku ‘ikai ha lao ia ‘i he fale ‘oku ta’efaka’apa’apa ‘a e faitaa.
Ka ‘i hono feinga ke fakatahataha’i ‘a e ngaahi fakatotolo ‘i he loto fale ke fakapapau’i ko e ‘elia ‘oku fai mei ai ‘a e faitaa ko e feitu’u ia ‘oku me’a mei ai ‘a Tongatapu 7, na’e ‘ikai pe ha fakamo’oni pau. Pea na’e aofangatuku ai pe ‘a e komiti ke hao ‘a Piveni.
Ka ‘oku malie foki he ‘osi pe fakahaa ola ‘o e tu’utu’uni na’e me’a hake ‘a Piveni ‘o kole fakamolemole na’e ‘ikai ke ‘uhinga pehee ia. Ka ‘oku fakatupu fifili ‘ene kole fakamolemole, ‘o mahino koia na’ane fakahoko ‘a e faitaa mo e tuku atu ‘o e taa ‘o e nopele, ka ‘oku ‘ikai mahino pe na’ane fakahaa ‘a e mo’oni ki he komiti pe na’e loi, ka ‘i he’ene kole fakamolemole ‘oku ha ngali na’e tonu pe tukuaki’i.
‘Oku toe mai ‘a e launga ‘a Lord Fohe ki he angata’efaka’apa’apa ko e lau kulikuli pea ‘oku mahino ‘oku ma’u ‘a e fakamo’oni pau ia pea ngali ‘e ‘iai hono tautea. Ka ‘e toki mahino kotoa ia ha aofangatuku ‘a e komiti.
