Tokoua ua mahu’inga taha he VONC, Veivosa Taka mo Saia Piukala
Ke Palemia ‘a Tu’ivakano pea tokoni ‘a ‘Aisake Eke mei he tafa’aki fakafepaki,
‘I he ‘amanaki ke fakahoko ‘a e fili ta’efalala’anga ‘o e Palemia ‘a pongipongi ‘oku ‘iai ‘a e ongo tangata mahu’inga ‘e tokoua tena pule’i ‘a e hiki nima pea ko e hoko atu mo e fakahifo ‘a e Palemia ‘e fakafalala ia ki he ongo tangata mahu’inga ‘e tokoua ko’eni, Veivosa Taka mo Saia Piukala.
‘Oku ‘iai pe ngaahi ‘uhinga mahu’inga ‘e lavA ‘a e ongo tangagta ‘o hiki nima ma’ae Palemia pe ko e tafa’aki na’anau fokotu’u mai ke fakahifo ‘a e Palemia. Pea ‘oku kau he ‘uhinga ke na kei poupou ai ki he Palemia, he na’e fakahaa ‘ena poupou ki he Palemia ‘i he fili Palemia hili ‘a e fili lahi ‘o hoko ai ‘a Hu’akavameiliku ko e Palemia.
‘I he taimi tatau ko e anga ‘o e feme’a’aki ‘i he Fale Alea ‘oku mahino ai ‘a e kei poupou ‘a e ongo tangata ni ki he Palemia.
‘I he tafa’aki ‘e taha ‘e malava pe ke liliu ‘ena fakakaukau koe’uhi ko e ongo PTOA kinaua kimu’a pea ‘oku kau ‘a e PTOA he teke malohi ke tukuhifo ‘a e Palemia. Ko e taha foki ko e tehina ‘o e Minisita Mo’ui Hon. Piukala ‘a e mate ngata’a koia ko Piveni Piukala ‘e ‘iai pe ‘ena feongo’i’aki fakatokoua.
‘Oku ma’u he nusipepa ni ‘a e ngaahi fakamatala falala’anga ‘a e feinga ‘a e PTOA ki he ongo tangata ni pea ‘oku kei ‘asi mai ai pe tangata ‘enisia koia ko Niumeitolu mei Nu’usila. Ko e tama tatau pe ‘eni ‘oku toe ‘asi mai ke ne fakahoko ‘a e ‘enisinia pea ‘oku fehu’ia ai he tokolahi pe koeha koaa ‘a e kaunga ‘a e tokotaha ni ki he PTOA pea mo e ngaue kuone fakahoko.
‘Oku toe mau he ongoongo ni, ko e fokotu’u lakanga pea mei he tafa’aki na’anau fakahu atu ‘enau tohi kapau ‘e ola lelei enau feinga, ‘e Palemia leva ‘a Lord Tu’ivakano pea tokoni kiai ‘a ‘Aisake Eke. Pea ko e vakai ki ha Kapineti ‘a e kulupu ko’eni ‘e fu’u fakaoli fau, he kuopau ke ‘iai ‘a e PTOA pea mo e kau nopele ‘e ni’ihi, ko e ongo sino ‘oku ‘ikai pe kena fetaulaki he taimi kotoa,
Ko e toko 10 na’anau fakamo’oni ki he tohi fokotu’u ‘oku tanaki atu leva kiai ‘a Lord Tu’ilakepa pea pehee kia Pilinisi Kalaniuvalu ‘o toko 12 ia pea toe leva ‘a e toko 2 kenau ikuna ‘a e hiki nima pea ‘oku nau fakafalala leva ki he tokoua mahu’inga ‘oku fai kiai ‘a e talanoa.
Ko e me’a tatau pe ki he tafa’aki ‘a e pule’anga, ‘oku ‘iai ‘a e kau Minisita lolotonga tukukehe ange ‘a e ongo Minisita fili mei tu’a pea mo e kau fakafofonga Fale Alea ‘oku teka mei tu’a mo e ongo nopele ‘e tokoua ‘onau toko 12, makehe mei ai ‘a Saia Piukala.
Pea ka faifai ange kuo muimui ‘a Piukala hono tehina pea nofo pe ‘a Veivosa he pule’anga pea ‘e taki 13 pea ‘e aofangatuku leva he Sea ‘o e Fale Alea. Kaekehe ko e kotoa ‘a e ngaahi vavalo ko’enii ‘e toki aofangatuku ia ‘apongipongi ‘i he Fale Alea ‘o Tonga.
