Tokoni me’afua Tonga Health ki he fokotu’utuu pule’anga ke fua kilo ‘a e fua’i’akau mo e vesitapolo
Ko e ta’u lahi ‘a hono fakatau ‘e he kakai ‘o e fonua ‘a e fua’i’akau mo e vesitapolo ‘i he milemila ‘i he maketi mo e fanga ki’i maketi he ve’ehala. Ka kuo liliu ia he ‘aho ni ‘e he pule’anga ke fakatau atu ‘i he lau kilo (kilogram), ko ha liliu ‘oku tui ‘a e pule’anga ‘oku tonu pea fakatupu mo’ui lelei ‘i ha tu’unga ‘oku ma’ama’a ange.
Fakatatau ki he Potungaue Konisiuma mo e Fefakatau’aki, ‘oku malumalu ‘a e lao ko’eni ‘i he Price and Wage Control Act mo e Weights and Measures Act. ‘Oku fakapapau’i ‘oku fakatau atu ‘i he mahu’inga pau mo e fua ‘i he maketi kuo lesisita ‘i he founga totonu.
Na’e fakahaa mei ha kau ‘ofisa ngaue ‘o e Potungaue, na’e makatu’unga he lahi ‘a e launga mei he kakai ‘o e fonua. “ ‘I hono tukuhifo ‘e he pule’anga ‘a e tute mo e tukuhau ki he fua’i’akau mo e vesitapolo ke ma’ama’a ange, ‘oku kei ma’u pe ‘a e ngaahi launga ki he ngaahi pisinisi ‘oku fakatau atu ‘i he milemila kae ‘ikai ke fakatau kilo”, ko e lau ia mei he Potungaue.
Kaekehe ke poupoua ‘a e fanga ki’i maketi iiki mo lotoloto ‘oku ‘i he ngaahi ve’ehala mo e maketi, na’e tuku atu ai ‘e he Tonga Health ‘a e me’afua ‘e 25 pea ‘oku ‘iai mo e uta ‘oku ‘amanki tau mai. Pea fakahoko mo hono fakataukei’i kinautolu ki he founga ki hono ngaue’aki ‘o e ngaahi me’afua.
Ko e ngaahi falekoloa fakamovetevete mo e fakakoloa huu koloa lalahi kuo ‘osi fakaa’u kiate kinautolu ‘a e founga tatau pea pehee ki he ngaahi pisinisi ‘i he ngaahi ‘otumotu ki tahi ‘i he ngaahi mahina ka hoko mai. ‘Oku fakafiemalie ko e mahino ‘oku loto lelei kiai ‘a e ngaahi pisinisi pea ‘oku ‘iai mo e ngaahi fetu’utaki ki he Potungaue ki ha ngaahi fakamatala fakamahino ange.
‘Oku tokanga foki ‘a e kau ngaue ke ‘oua na’a hoko ‘a e liliu ke uesia ai ‘a e ngaahi maketi angamaheni, ka ke tokoni pe kenau ma’u fe’unga pea malu’i mo e kau fakatau. ‘Oku vakai ‘a e pule’anga ki he totongi ‘o e ngaahi koloa ko e kaveinga fakapule’anga. Pea ki hono ‘ai ‘o e vesitapolo mo e fua’i’akau ke toe ma’ama’a ange, ko e taumu’a leva ke faka’ai’ai ‘a e ‘ulungaanga kai mou’ilelei ‘o fakatatau ki he taumu’a ngaue ‘a e Tonga Health.
Ko e taimi tatau ‘oku hanga ‘e he founga ni ‘o liliu ‘a Tonga ki he founga fakaonopooni ‘o e maketi pea poupoua mo e ngaahi pisinisi he mala’eni, ‘i hono ‘oange ki he tokotaha fakatau ‘a e taliui mo e fili ‘i he taimi ‘oku ta’efakafiemalie ai ‘a e totongi.
