To e hilifaki hifo tautea lolotonga ‘ene ngaue popula ki he mate ‘i he huu mai faito’o konatapu
Ko e lolotonga ‘ene ngaue popula ki he mate ‘i he hia ko hono huu mai ‘o e faito’o konatapu kalasi A, ‘oku ‘iloa ko e ice (meth) pea na’e hilifaki ia he ‘aho 6 Sune 2025, kuo toe hilifaki hifo mo e tautea kehe ‘i he ‘aho 15 ‘Aokosi 2025 ki he hia tatau pe.
‘I he hilifaki tautea ‘i he ‘aho 6 Sune, na’e tautea fakataha ‘a Fine Tevita Fifita pea mo hono patina ko Vaivevea Mafi, ke na ngaue popula ki he mate ko hono huu mai ‘o e faito’o konatapu fe’unga hono lahi mo e 1157.4g. Na’e tautea ke ne ngaue popula ki he ta’u ‘e 5 ka ke ngaue’i fakataha pe mo e ta’u ngaue popula ai ki he mate.
Ko e faka’ilo ko’eni na’e hilifaki tautea fakamuimui, ko Mr. Fifita ‘ata’ataa ‘i he tikite tatau ko e huu ta’efakalao mai ‘a e faito’o konatapu, kae pehee ki he feinga ke totongi fufuu ha ‘ofisa Kasitomu mo ha ‘ofisa Polisi.
Na’e hanga ‘e he ongoongo ‘o e hilifaki tautea ‘o e hopo ni, ‘o lulu’i ‘a e kau tila faito’o konatapu. He ko e tuu ‘a e lao, ka ma’u ha taha ‘oku fe’unga mo e .28g ‘o e faito’o konatapu ‘oku huu mai ki he fonua pea tautea ki he mate. ‘Aia na’e tautea ai ‘a e tokotaha ko Kama Manulevu ‘i he ta’u kuo’osi ke ne naue popula ki he mate ko’ene feinga huu atu kitu’a ‘a e 30kg ‘i ha koniteina tokonaki ‘aisi ki Nu’usila.
‘I he hisitoli ‘o e me’a na’e hoko, ko e puha na’e ‘omai he koniteina fika HASU4515280 meia Lolani Finau kia Unaloto ki Loma Tupou. Ka na’e toe feinga ‘a e Faka’iloa ke liliu ki he hingoa hono patina he ‘oku ne fa’a ‘omai me’a mei muli. Na’e ‘omai ‘a e puha 4×4 ‘i he kautaha ko e SF Oceania ‘i Ma’ufanga.
Ka ‘i hono sivi ‘o e puha he kau ngaue na’e fakatokanga’i ‘e he fefine Kasitomu ko ‘Iuna Fifita ‘oku to’o he Faka’iloa ‘a e kane ‘omo ‘e 2 ‘o tuku he tafa’aki kae ‘a’au hake ‘a e toenga ‘o e puha. Na’ane fekau ‘a e Faka’iloa ke ‘omai kiai ‘a e kane ‘omo ‘one fakaava hake ‘oku ‘iai ‘a e kofukofu ‘uli’uli ‘i loto. Na’e tala ai pe he Faka’iloa ki he fefine Kasitomu ko e ice kae ‘oua te ne puke kae ‘oange ha’ane ki’i coin.
Na’e fakaava mo e kane hono ua ko e me’a tatau na’e ma’u pea ui ‘e he fefine Kasitomu ‘a Sargent Sione Punaivaha ke sio ki he ice kuo ma’u. Na’e toe kole ‘a e Faka’iloa kia Punaivaha ke tokoni ange kae ‘oange ha’ane coin.
Na’e puke fakataha ai pe ‘a e Faka’iloa pea mo hono patina Vaivevea Mafi ‘o faka’eke’eke pea faka’ilo ki he huu mai ‘o e faito’o konatapu ta’efakalao pea pehee ki he feinga totongi fakafufu. Neongo na’e feinga kalo ‘a Vaivevea na’e ‘ikai ‘ilo ki hono liliu ‘o e hingoa na’e ‘omai kiai ‘a e puha ki hono hingoa, ka na’e ‘ikai tali he Fakamaau, he na’e mei uike ‘e taha ‘ena feinga’i ‘a e puha ke ‘ataa kitu’a.
Na’e tautea ai pe kinaua ke ngaue popula ki he mate he ‘aho 6 Sune 2025.
‘I he hopo ‘a Nonu Kolokihakaufisi na’e ‘ikai ngofua ke tuku hono fakamatala kitu’a, ko e 15kg na’e ma’u kiai ka na’e faka’ilo ‘aki pe ‘a e ‘i lalo he 5kg pea ‘oku fehu’ia lahi ai ‘a e fo’i ngaue koia. Ka ‘oku ‘iai ‘a e tui ‘oku ‘iai ha fakamatala mahu’inga ki he kau Polisi ‘oku loto ‘a Nonu ke ne fakahaa, kae fakasi’isi’i hono tautea.
Kuo toe mapuna hake ‘i he Facebook ‘a e ngaahi hingoa ki he koniteina na’e fakahaa ‘e he Minisita Polisi na’e mole mei uafu. ‘Ikai ngata ai ko e ngaahi hingoa ki he fe’ave’aki ‘o e pa’anga ‘uli, ka ko e ngaahi tukuaki’i ta’e’iai hano fakamo’oni. Ka kuo fakapapau’i kuo ‘iai ‘a e tokotaha na’e puke he kau Polisi ki he koniteina na’e mole.
