Na’e tautea ngaue popula ‘a Viliami Tukumoe’atu ‘i he ‘aho 28 Siulai 2025, ke ne ngaue popula ki he ta’u ‘e tolu (3) kae toloi malu’i angalelei ‘a e ta’u ‘e ua (2) fakamuimui. Ko hono tautea ‘eni ki he pekia ‘a ‘ene tangata’eiki pea lavea lahi mo e pasese he me’alele na’e faka’uli ai ‘a Viliami.

‘I he  ‘aho 18 Sanuali 2025 na’e faka’uli ai ‘a e hoa ‘o e Faka’iloa ‘i he me’alele na’e heka ai ‘a e Faka’iloa mo’ene tangata’eiki mo e ni’ihi kehe pe. Na’e pasese pe ‘a e Faka’iloa ‘i he tafa’aki he na’e konaa kavamalohi, ka na’e vili ia ki hono hoa na’e faka’uli ke ta’ofi ‘a e me’alele pea ke ‘alu atu ia ‘o faka’uli. Na’e ‘ikai ke loto kiai hono hoa koe’uhi ko’ene konaa, ka na’e iku ia ke paa’i ‘e he Faka’iloa hono hoa pea ne ta’ofi leva ‘a e me’alele. Na’e hifo atu ‘a e Faka’iloa ke faka’uli, ka na’ane felauaki ai mo’ene tamai koe’uhi ko e ‘ai ke faka’uli konaa. ‘Oku pehee na’e hoko ‘eni ke ‘ita ai ‘a e Faka’iloa ‘o lele lahi.

Na’e ‘ikai ke toe lava ‘a e Faka’iloa ‘o pule’i ‘a e saliote minisi ko’euhi he na’e a’u ki he vave ko e 140km/hrs, ‘o sifa ‘o hoko ai ‘a e fakatu’utamaki. Na’e leleaki’i ‘ene tangata’eiki ko e lavea lahi na’e hoko kiate ia ka na’e ‘ikai ha toe felave ka ne maloloo ai pe pea fakatokoto ‘a e pasese ‘e taha ko e lavea lahi.