Tautea ngaue popula ki he fakamanamana ‘aki me’afana fakamahafu
Na’e tautea ngaue popula mahina ‘e tolu ‘e he ‘Eiki Fakamaau Lahi, Lord Chief Justice Bishop KC ‘a e Faka’iloa ko Vili Lausi’i, he ‘aho 5 Sepitema 2025, ‘i he Fakamaau’anga Lahi ‘i Nuku’alofa.
Ko e tautea ‘o e Faka’iloa ki he tikite “ Ko e faka’aonga’i ha me’atau ‘oku lolotonga fakamahafu ki he Fakamanamana”. ‘Aia ko hono fakamanamana’i ‘o e Mamahi Vikatolia Liu mo Isaac Liu ‘i Lapaha he ‘aho 19 Tisema 2024.
Fakatatau ki he hisitolia ‘o e me’a na’e hoko, na’e kau ‘a e Faka’iloa ‘i hekau Polisi Fakakolo ko hono le’o ‘o e kau kaiha’a ‘i Lapaha. Na’e lele atu ‘a e Mamahi mo hono hoa he hala Lapaha ‘oku kolosi hake ‘a e Faka’iloa mo e me’afana ‘o ta’ofi mo fakahanga ange kiate kinaua. Na’e tafoki fakavave ‘a e faka’uli ‘o lele ki honau ‘api kae tuli mui atu pe ‘a e Faka’iloa ki honau ‘api mo fakahanga ‘a e me’afana ki he Mamahi mo hono hoa.
Na’e fakahaa ‘e he Faka’iloa na’e pehee ‘eia ko e kau kaiha’a ‘oku fa’a lama he kau le’o pea ko e ‘uhinga ia ‘ene fakmana’i ‘aki ‘a e me’afana mo tuli kinautolu. Ka na’e fakahaa ‘e he ‘Eiki Fakamaau Lahi, ‘oku tatau ai pe, ‘oku ‘ikai ha’ane totonu ke fakamanamana ‘aki ha me’afana kuo fakamahafu.
Na’e ‘iai fokotu’u mei he ‘Ofisa Malu’i Angalelei mo e Talatalaki ke fakamolemole’i kotoa hono tautea. Ka na’e tui ‘a e LCJ Bishop ko e hia na’ane fakahoko ‘oku mafatukituki. Na’e tautea ngaue popula ta’u ‘e taha, ka kene ngaue’i pe ‘a e mahina ‘e tolu pea tautea toloi malu’i ‘a e toenga he ta’u ‘e 2.
Ko e ta’u 46 ‘o e Faka’iloa mo e fanau ‘e toko ua, ka na’ane maloloo kei si’i mei he ako ke tokanga’i hono famili. ‘I he taimi tatau na’e fakaongoongo lelei’i mai ko e tangata ngaue lelei ma’ae fonua mo e famili.
Na’e kau hono tautea ke ‘oua na’ane toe fakahoko ha hia lolotonga hono malu’i pea ke lipooti ki he kau Polisi ‘i he’ene ‘ataa kitu’a. Pea ke ne kau atu ki ha ako he mapule’i ‘o e ‘ita.
