Puke he kau Polisi fefine pisinisi ‘Amelika ki he ta’etotongi ‘inivesimeni ki he kakai tokolahi a’u ki he lau kilu
Kuo puke he kau Polisi ‘i Nuku’alofa ‘a e fefine pisinisi mei ‘Amelika ko Victorine Polygirl, ‘oku ‘iloa ‘aki he mitia fakasosiale pea ‘oku ‘a’ana ‘a e falekoloa ko e Famili Tonga USA ‘i he Small Industry, na’e toki fakahoko fatongia pe he ngaahi tau si’i kuo hili.
Fakatatau mo e tohi Fakamaau’anga Polisi ko e tohi puke kuo ‘ave takai holo ‘i he ope, kuo tu’utu’uni ai he Fakamaau’anga Polisi ke puke ‘e ha Polisi pe te ne ‘ilo ‘a e tokotaha ni ‘o fakahuu Pilisone kae ‘oleva ke toki haa he Fakamaau’anga Polisi ‘i he uike kaha’u.
‘Oku malie lahi ‘a e ongoongo ni, he na’e kamata ia mei he pisinisi ‘a e fefine ‘ene manakoa ko hono fetuku mai ‘o e koloa falekoloa mei ‘Amelika. Na’e ma’ama’a pea sai ki he kakai pea na’e manakoa ‘aupito. Na’e ‘alu mei ai ki he’ene tu’uaki ‘ene polokalama ‘inivesimeni pea na’e ‘iai ‘a e tokolahi nenau kau atu kiai ‘o ‘inivesi ‘enau pa’anga lahi pea laumano ‘a e ni’ihi. Ka na’e a’u ki he taimi ke ma’u ai ‘a e tupu ‘o e pa’anga ‘inivesimeni na’e ‘ikai ke hoko.
Na’e kamata leva ke launga ‘a e tokolahi ko e ‘ikai ke ma’u ‘enau pa’anga ‘inivesimeni, ka ko e pango ‘oku ‘ikai ke ‘ilo na’e ‘iai ha aleapau pe ‘ikai. Ko e me’a pe ‘oku ‘ilo he ongoongo ni, ko hono fakahaa he fefine ha’ana ‘a e polokalama ‘i he facebook, na’e ‘iai ‘a e aleapau pea ko e konga ‘o e aleapau kenau ‘inivesi pea te ne feinga ke fakatupu ‘a e pa’anga kae toki lava ke fai ha vahe. Ka na’e fo’ou ‘a e fakamatala ia koia ki he tokolahi. Kae hangee ko e lau na’e te’eki ke ‘iai ha aleapu ‘e ‘ohake ke fai ha vakai kiai.
Na’e toe fakalalahi, he ko e taimi ‘oku ‘ohake ai he mitia fakasosiale ‘a e launga ‘a e kakai, ‘oku fakamatalalili mo toe faka’uhinga mai ‘a e tokotaha ni ia he facebook. Pea hoko ia ke loto mamahi ai ‘a e tokolahi. Ka na’e toki a’u ki he tu’unga ke fakahuu ‘a Vicky, ko’ene fetakai mo Mapa Ha’ano Taumalolo na’e ‘iai hono tokoua na’e kau he ‘inivesimeni, ka na’e a’u ki he taimi na’e fai kiai ‘a e alea kuo ‘ikai ke ma’u ‘a e seniti, na’e fiema’u ki he ki’i me’a fakafamili.
Kaekehe na’e fakalalahi ‘a e fetohi’aki ‘a Mapa mo Vicky he facebook ‘o ‘ohake ai ‘a e liliu he tokotaha ni ia ‘a e hingoa ‘o e kautaha. Pea ‘oku tu’u fakatu’utamaki he ka mo’ua he Fakamaau’anga ‘e ‘ikai kaunga ‘a e pisinisi he ‘oku ‘i he tokotaha kehe ia. Ka na’e fai atu ‘ena fetakai ta kuo fetu’utaki fakalao ‘a Mapa ‘o ngaue atu ai ‘a e kau Polisii kia Vicky ‘o fakatatau mo e tohi Fakamaau’anga kuo ‘ave takai holo.
‘I he taimi tatau kuo lahi ‘a e felauaki he ‘oku fakaoli ‘a e huu mai ‘a e tokolahi ‘o taukave’i ke fakamolemole’i ‘a Vicky. Ka ‘oku tui ‘a e tokolahi ko e fo’i fakapulou ta’efakalotu he kuonga maama ko’eni, he kapau ‘e pehee ta’e’ikai ha faihia ia ‘e mo’ua hono fakamolemole’i. Ka ko e fa’ahinga faka’uhinga ke unga ki he lotu ‘oku toe kovi ange ‘a e ni’ihi pehee he kakai faihia, ke ngaue’aki ‘a e lotu ko ha unga’anga mei he Fakamaautotonu.
Ka ‘oku malie ke a’u ki he ‘aho hopo pe koeha ‘a e me’a ‘e hoko atu kiai.
