Pelepelengesi hopo ‘a Nonu Kolokihakaufisi ki he fonua ‘uhinga hono ta’ofi hono fakaikiiki mei he ngaahi mitia
‘Oku toutou ‘ohake ‘e he tokolahi ‘i he ngaahi mitia pea a’u ki he konifelenisi ‘a e kau Faiongoongo mo e Pule’anga, ‘a e kaveinga ki he hopo ‘a Nonu Kolokihakaufisi. Ka ‘oku fu’u pelepelengesi ‘a e ngaahi fakamatala ‘o e hopo ki he Potungaue Polisi ‘i hono tau’i ‘o e faito’o konatapu.
Ko e ngaahi hopo ‘oku tautea ngaue popula ki he mate, ka ‘oku si’isi’i ange ‘i he faito’o na’e ma’u mo Nonu, ko e ola ia ‘o e fili ‘a e kau Faka’iloa kenau tali tonuhia pea fakahoko ‘enau hopo ‘o ikuulungia pea ko e tautea ko e ngaue popula ki he mate.
Ko e natula leva ‘o e hopo ‘a Nonu na’e ma’u mo e 15kg, ka na’e loto ‘a Nonu ke fengaue’aki mo e kau Polisi pe ko’ene tuku atu ‘a e ngaahi fakamatala, ki he kakai na’anau kaunga tila faito’okonatapu pea mo e ni’ihi ‘oku ne ‘ilo ‘oku kaunga ki he fetuku holo ‘o e faito’o konatapu. Pea ko e ‘uhinga ia na’e faka’ilo ai pe ‘i he ma’u mo e faito’o konatapu ’o ma’ulalo he 5kg, ke fakama’ama’ahono tautea. Ka kuopau ke ne tukuange ‘a e fakamatala ki he kau Polisi.
Ko e ngaahi fakamatala ko’eni ‘oku mahu’inga ‘aupito ka ‘oku mahino ‘e malu ia mei he kakai ‘o e fonua. Ko e me’afua pe ‘e fai’aki ha fakaofiofi ki ha ngaahi hingoa kuo fakahaa ‘e Nonu. Ko ha puke ‘o e ni’ihi ma’olunga pe ko ha fanga ki’i ‘ulu’ifeke, mei he hili ‘o e hilifaki tautea ‘o Nonu ‘o fai mai ai ki he taimi ni. ‘Oku ‘iai ‘a e ngaahi hopo lalahi ‘oku lolotonga lele he Fakamaau’anga Lahi, ka ko e ngaahi puke ia he ta’u kuo’osi.
Kaekehe ko e malu ko’eni ‘a e fakamatala ‘oku ‘iai pe mo hono fakatu’utamaki, he kapau ‘oku tala ‘e Nonu ha kakai ma’oluga he fonua mo e pule’anga pea pehe’i hifo ai pe he kau Polisi, ko e fakaloloma lahi ia. Pea kapau ‘oku tala totonu ‘e Nonu ‘a e ngaahi hingoa pea ngaue atu kiai ‘a e kau Polisi ‘o ‘ikai toe tuku ha taha pea ko’ene faka’ofo’ofa ia.
‘Oku fehu’ia he tokolahi ‘a e tauhi pe ‘o Nonu ‘i ‘api Polisi Nuku’alofa ‘ikai ‘ave ki Tolitoli, ‘oku kau ia he konga ‘o e alea ‘a Nonu mo e kau Polisi. He ‘oku ma’u he ongoongo ni ha fakamatalafalala’anga, na’e kau he me’a na’e fiema’u ‘e Nonu ke fakapapau’i ‘e malu’i ia he pule’anga mei he kau tila faito’o konatapu. Pea ko e konga ia ki he malu ‘ene mo’ui ko hono tuku pe ‘i he ‘api Polisi Nuku’alofa. Ko Tolitoli ‘oku ta’epau ‘aupito ia. Ko hono tuku ‘i Nuku’alofa ‘o ofi pea faingofua ki he kau fengaue’aki mo e kau Polisi pea ‘oku ‘uhinga lelei pe hono tauhi ‘i Nuku’alofa.
‘I he Monite ‘aneafi na’e lele ai ‘a e ngaahi hopo tangi faka’osi ki he ta’u ni pea na’e kau ai mo e keisi ‘a Nonu. ‘Oku ‘ikai foki ‘ilo koeha ‘a e tefito ‘o e tangi, pe ko Nonu pe ko ha sino kehe, ka na’ea’u ki he houa ‘e taha mo e konga ‘ene lele. Ko e angamaheni ‘o e ngaahi hopo tangi ‘oku ‘ikai fu’u loloa pehee, ka ‘oku mahino ai ‘a e mafatukituki ‘a e hopo ni. Ka na’e kei tu’utu’uni pe ‘a e Fakamaau’anga ke tapui ha toe taha a’u ki he mitia ‘e huu ki he hopo. Pea ‘oku mahino ko e ola ‘o e tangi ‘e kei ta’ofi pe moia mei he ngaahi kautaha ongoongo, koe’uhi ko e pelepelengesi ‘a e fakamatala
