Faikava hiva kakala kau ngaue falemahaki lolotonga failotu ngaahi me’a faka’eiki ‘i he falemate Vaiola, ta’efaka’apa’apa lahi.

‘Oku fifili ‘a e ngaahi famili na’e pea ‘oku ‘iai ‘enau me’afaka’eiki he falemahaki Vaiola, pe ‘oku fefee ‘a e ‘atamai ‘o e  kau ngaue. ‘Oku ‘uhinga ‘eni ki he loto mamahi lahi ‘a e ngaahi famili ‘i he lolotonga ‘a e failotu mo e ‘e’epa ‘enau ngaahi me’a faka’eiki he falemate, ‘oku lele pe ‘a e faikava poo hiva kakala ia ‘a e kau ngaue tafa’aki ki he kau faka’uli.

Kuo hiki mai mei he ve’ehala ‘o hanga atu pe ki he falemate ‘a e fale me’alele ‘a e Potungaue, koe’uhi ko e lolotonga lele ‘a e ngaue honau fale he ve’ehala.

Ko e fifili leva ‘a e ngaahi famili pe ‘oku fefee ‘a e ‘atamai ‘o e kau ngaue falemahaki pea ‘oku ‘ife ‘a e faka’apa’apa ki he kakai pekia he anga ‘etau nofo fakaTonga.

Na’e feinga ‘a e ongongo ni ke ne a’utonu ‘o vakai ki he ongoongo mo e lotomamahi ‘a e ngaahi famili. Pea ‘i he efiafi Tokonaki ‘o e uike kuo’osi na’e a’utonu ai ‘a e nusipepa ni ki he feitu’u ni.

Ko e me’a na’e faka’ohovale taha ki he ongoongo ni, ko e lolotonga ‘a e lele ‘a e failotu ‘o e ki’i ta’ahine ta’u 12 na’e toki pekia he ‘aho Tokonaki. Ko e lolotonga ‘a e hiva ‘a e failotu ‘a e famili kimu’a pea toki fakahuu ‘enau me’afaka’eiki ki he ‘aisi. ‘Oku le’olahi ange ‘a e hiva kakala mai ia ‘a e kau faikava he faihiva ‘o e failotu.

Na’e feinga ‘a e nusipepa ni ke fakaongo fakalelei pe ko ha hiva fakalotu pe koe’uhi ko’ene ofi mai ki he falemate, ka na’e toe fakapapau’i he ongoongo ni ko e hiva kakala he ‘oku ongo lelei pe ‘enau hiva.

‘I he vakai ‘a e ongoongo ni ko e putu ‘e tolu ‘oku ‘aisi pe ‘itu’a pea ‘ikai ‘ilo pe ko e putu ‘e fiha he ‘aisi ‘a e falemahaki. Pea ko e kotoa ‘o e ngaahi me’afaka’eiki ko’eni ‘oku ‘iai pe honau loto ki he kau faikava pea ko’enau fehu’i pe ‘oku fefee ‘enau fakakaukau. Pea kapau ‘oku fakangofua he CEO pe ko e Minisita pea ‘oku toe fu’u faka’ulia ange ia. Pea ‘oku tatau ai pe koeha ha fa’ahinga ‘uhinga, ka ‘oku fu’u ta’efaka’apa’apa lahi hetau anga fakafonua.

Kaekehe ‘oku ‘ikai totonu ke fakahoko ‘a e fa’ahinga ouau ko’eni ko e faikava he ngaahi ‘api ngaue. Pea ‘oku toe fakatupu loto mamahi ange ko e fu’u feitu’u ‘o e ngaahi me’a faka’eiki, ‘oku ongona ai ‘a e hiva kakala.

‘Oku tapu ‘a e ngaahi kolo ‘o a’u ki he kalapu hiva kakala ka fakahoko ha me’a faka’eiki. Ka ko’eni ‘oku fakahoko atu pe ia he mata ‘o e ngaahi famili mo e kau pekia lolotonga ‘enau ‘e’epa he ‘aisi.

‘E fakahoko ha feinga ki he Minisita mo e CEO pe koeha ha’ana lau ki he kaveinga ni. Ka ko e me’a ‘oku mahino mai ‘oku lotomamahi ka ‘oku ‘ikai ke lea ‘a e ngaahi famili ‘e ni’ihi, ki he faikava hiva kakala. Pea kapau oku fakahoko ha failotu pea nau ‘ofa mai ‘o tuku e hiva kakala kae ‘oleva ke ‘osi ‘a e ngaahi failotu.

Ka ko hono fakakatoa ‘oku ngalivale pea ta’efaka’apa’apa ke fakahoko ha faikava hiva kakala ofi ki he fale mate koe’uhi ko’etau anga fakafonua.

Leave a Comment