To e hilifaki tau 4 mahina 6 ki he matapule Initia ko Jitendra Singh lolotonga kei ngaue’i ta’u 1 mahina 9 ki he faito’o konatapu
Ko e lolotonga ‘a e kei ngaue’i he matapule ‘Initia ko Jitendra Singh nofo Ngele’ia hono tautea ko e mahina ‘e 21 ki he ma’u mo e faito’o konatapu, kuo toe hilifaki atu ‘e he Fakamaau Lahi CJ Cooper hono tautea he ‘aho 6 ‘Aokosi, ‘a e ta’u ‘e 4 mahina ‘e 6 ki he hia tatau na’e ngaue ai kimu’a ko e faito’o konatapu.
‘I he hili ‘ene ‘uluaki tautea ‘e hoko atu ai pe ‘ene tautea fakamuimui pea ‘e tautea toloi ai ‘a e mahina 6 fakamuimui ‘o malu’i angalelei he ta’u ‘e 2 ‘i he ngaahi makatu’unga kuo tuku atu ‘e he Fakamaau’anga.
Fakatatau pea mo e ngaahi mo’oni’i me’a kuo tuku mai mei he Fakamaau’anga, na’e tali halaia ‘a Singh ki he tikite ‘e 2 1) ko hono ma’u ‘i hono ‘api nofo’anga he ‘aho 31 Tisema 2022 mo e faito’o konatapu ko hono lahi na’e fe’unga mo e 141.13g ‘o e meth pe ‘aisi.
Ko e tikite hono 2, ko hono ma’u mo tauhi ‘o e ngaahi koloa ta’efakalao felave’i mo e faito’o konatapu.
Kaekehe ‘i he ‘aho 31 Tisema 2022 na’e ma’u ai he kau Polisi ha fakamatala falala’anga ki hono fakatau tau atu ‘e he Faka’iloa ‘a e faito’o konatapu hono ‘api nofo’anga ‘i Ngele’ia. Na’e kamata leva ‘a e ngaue ‘a e kau Polisi ki hono siofi ‘o e ‘api ‘o e faka’ilo pea fakatokanga’i ai ‘a e me’alele ‘e 3 ‘oku fou ki he ‘api ko e kau felave’i mo e faito’o konatapu. Na’e ngaue atu ai pe kau Polisi mo e tohi kumi koloa pea pehee ki he kuli fakatotolo ‘o ma’u ai ‘a e faito’o konatapu pea mo e TOP$32,050 pea mo e AUS$50.
Ko e tautea ki he lahi ‘o e faito’o konatapu kuo ma’u ki he Faka’iloa ko e $1 miliona mo e tautea ngaue popula ki he mate pea ko e fakatou’osi.
‘Oku malie ‘a e vakai ki he kamata ke haa mai mo e kakai muli ‘i he faihia mo e faito’o konatapu pea ‘oku mahino ai ‘a e fengaue’aki he kakai muli pea mo e kakai Tonga ‘i he faihia ‘o e faito’o konatapu.
‘Oku kau ‘a Fisi he fonua ‘oku tukuaki’I ‘oku huu lahi mei ai ‘a e faito’o konatapu ‘o tatau pe vakapuna mo e vakatahi, koe’uhi ko e vaofi ‘a Tonga mo Fisi mo e faingofua ‘a e fefononga’aki.
‘Oku toe malie ko e tali halaia ‘a e matapule ‘Initia kae ‘ikai tali tonuhia he ‘oku ‘iai ‘a e pa’anga lahi ke totongi ‘aki ha’ane fakafofonga lao.
Na’e toki tuku mai he Potungaue Pilisone hono ma’u ‘a e taha ‘o ‘ene kau sela ngaue mo e faito’o konatapu pea ‘oku fakahoko ‘a e ngaue kiai. ‘Oku tukuaki’i ‘oku kau mo e Pilisone ‘i he feitu’u ‘oku lahitaha ai ‘a e fehuu’aki ‘a e faito’o konatapu pea ‘oku ‘iai ‘a e tui ‘oku ‘iai ‘a e kau Sela ‘oku fengaue’aki pe ia mo e kau popula mo e kau siviliane ki hono huu fakapulipuli holo ‘o e faito’o konatapu.
