Tu’utu’uni Pule’anga ke ‘aho malolo 26 ‘Okatopa 2025, fakamanatu ta’u 50 haa Kolosi Pangai Ha’apai
Kuo tuku mai ‘e he ‘ofisi ‘o e Palemia ‘i he pongipongi ‘o e ‘aho ni, ha ongoongo tukuatu ki he kakai ‘o e fonua, ke hoko ‘a e ‘aho 26 ‘Okatopa 2025 ko e ‘aho maloloo fakapule’anga ko e fakamanatu ‘o e ta’u ‘e 50 ‘o e haa ‘a e Kolosi ‘i he ‘api siasi SUTT ‘o Pangai.
Na’e makatu’unga ‘a e tu’utu’uni ‘a e pule’anga, ko ha tohi kole pea mei he komiti ‘o e Kolosi mei Ha’apai. Na’e toki ‘osi ‘a e konifelenisi lahi ‘a e Siasi Uesiliana Tau’ataina ‘o Tonga na’e fakahoko ki Ha’apai pea ko e taha ‘a e ‘uhinga hono fakahoko ki Ha’apai ko e ta’u ‘e 50 he ta’uni ‘o e hoko ‘a e me’a fakahisitolia ‘a e haa ‘a e Kolosi.
Ko e talanoa ki he Kolosi ‘oku ‘ikai loko ‘ilo kiai ‘a e tokolahi ‘o e kakai ‘o e fonua, kae tautefito ki he to’u ‘o e ta’u 50 ‘o fai hifo ki lalo.
Kaekehe ‘i he ‘aho 26 ‘Okatopa 1975 ‘i Pangai Ha’apai na’e uhu pongipongi mai ‘a e Faifekau To’utupu ko Kalanite ‘Uhila ki he malanga pongipongi, ‘o ne fakatokanga’i ha maama ‘i he ve’e ‘api siasi SUTT pea ne vakai tonu ki he maama ‘oku huhulu mei he langi ki he kelekele ‘i he fotunga ‘o e kolosi. Na’e ‘osi ‘a e lotu pea ne fakahaa ‘a e me’a na’ane sio ia ki he Faifekau Rev. Vili Fatai Koli, Rev Haiti Finau pea mo e puleako ‘o Taufa’ahau. Na’anau a’u tonu kotoa ke vakai ki he haa ‘a e kolosi ‘i he musie ‘o e ve’e falelotu.
Na’e fakaa’u ki he Palesiteni ‘o e siasi Dr. ‘Amanaki Havea pea mei he tangata’eiki Palesiteni ki he Tama Tu’i Taufa’ahau Tupou 1V. Na’e ha’ele ‘Ene ‘Afio ke ‘afio tonu ki he me’a fakaofo ni, ‘o ne folofola ai, “ Ko e feitu’u tonu ‘eni na’e tu’ulutui ai ‘a e ‘Uluaki Faa ke papitaiso ‘e Rev. John Thomas ke ne hoko ko e Kalisitiane.
Na’e tokolahi pea mo e kakai mei he ngaahi feitu’u kehekehe ‘o Tonga ni mo muli, ‘enau ‘aukolo ki Ha’apai ke mamata tonu ki he ongoongo fakaofo. Na’e lahi pea mo e ngaahi faka’uhinga fakafolofola mo fakalotu ki he ‘uhinga ‘o e haa ‘a e kolosi. Pea neongo na’e hoko ‘i he kelekele ‘o e Siasi SUTT, ka ‘oku faka’apa’apa’i he ngaahi siasi ‘a e tui ‘a e kaingalotu ni.
Kuo langa ‘e he siasi hano maka faka’ofo’ofa he feitu’u tonu na’e hoko ai ‘a e kolosi pea ‘oku hoko ko e matanga mo e fakamanatu ki he kainga ‘o e Fo’i ‘One’one ‘a e mahu’inga ‘o e lotu mo e kolosi ki he’etau mo’ui.
