Tu’utu’uni NRL mo e Melbourne Storm ke fakatotolo’i fakatamaki kia ‘Eliesa Katoa, hili hono leleaki’i ki falemahaki he fetaulaki mo e Kiwi
Kuo tukuatu ‘e he NRL mo e Melbourne Storm ke fakahoko ha ngaue ki he ngaahi faitu’utu’uni ‘a e kau Toketa ‘i he timi Tonga X111 pea pehee ki he kau faiako. Pe koeha ‘a e tu’unga ke a’u keleleaki’i ai ‘a e sitaa koia ko ‘Eliesa Katoa mei he Storm ki falemahaki lolotonga ‘a e va’inga.
‘E vakai’i he kau fakatotolo ‘a e tu’utu’uni mo e sivi na’e fakahoko he Toketa ‘a e timi pea mo e faitu’utu’uni ‘a e kau faiako. Kuo fanofano mai ‘a e faiako ia, Christian Wolf na’ane faitu’utu’uni pe kia Katoa ‘o fakatatau ki he fakamatala mei he Toketa pule ‘o e timi. Pea ‘oku ‘ikai ko hano fakatongia ke fehu’ia ‘a e faitu’utu’uni ‘a e kau Toketa.
Na’e uesia ‘a Katoa ‘i he taimi warm up he’ene fapaki pea mo Lehi Hopoate ‘i ha’ana puna ki he pulu ma’olunga. Ka na’e kei faka’ataa pe he Toketa mo e faiako ke huu ki he timi kamata ‘o toe hokoai ‘a e tekolo ma’olunga ki hono ‘ulu pea ‘omai kitu’a he ‘osi pe ia ‘a e miniti ‘e 3 ‘o e va’inga. Na’e toe huu pe he tu’u hono ua ‘o toe hoko pe ‘a e me’atatau ke toe ‘omai ai kitu’a. Pea ko’ene kei nofo‘i he kau tali lavea kuo hoko ai ‘a e fakatokanga’i ‘oku ne faingata’a’ia ‘o leleaki’i ki falemahaki.
Kuo ‘iai ‘a e ngaahi fakamatala ko e toto ‘oku ‘asi hono ‘uto pea ‘oku kau ia he case mafatukituki ko’ene hoko ki he ‘ulu mo e ‘uto ko e konga pelepelengesi taha ‘o e sino.
‘I he taimi tatau ‘oku siofi ‘aupito ‘e he NRL mo e kalapu Melbourn Storm ‘a e tu’unga ‘o ‘Eliesa ‘i he falemahaki. Pea ‘oku ‘iai mo hono tukuaki’i lahi ‘o e kau Toketa ‘o e timi ‘i he sivi na’anaufakahoko mo e tu’utu’uni ‘oku sai pe, ka kuo iku ke leleaki’i ki falemahaki.
He ko e vakai ki he vitio he’ene fepaki mo Hopoate ko e fepaki lahi. Na’e toe tanaki mai mo e ongo fakatamaki lolotonga ‘a e va’inga ke a’u ai ki he tu’unga faingata’a’ia, ka na’e tui ‘a e tokolahi na’e totonu ke ta’ofi pe ‘i he ‘uluaki pe ko e fakatamaki hono 2.
Kuo tuku mai ‘e he kau poupou ‘o tatau pe kau Tonga mo e kau muli pea mo e kau va’inga NRL, ‘enau popoaki fakalotolahi kia ‘Eliesa Katoa mo e talamonu ke faingamalie pe me’a kotoa. Kuo ‘iaimo e ngaahi fokotu’u fakakaukau mei he kau va’inga ke toe fakalelei’iange ‘a e tokanga’i ‘o e kau va’inga mo’enau malu.
‘Oku kau ‘eni ha fo’i pulu fefeka ki he faiako ‘a Tonga Wolf pea mo’ene timi Toketa, he ‘oku tui ‘a e tokolahi na’e totonu ke kehe ange ‘a e faitu’utu’uni ‘o fakatatau ki he ngaahi tukunga tonu na’ehoko kia Katoa.
Ko Katoa na’e ‘ilonga ‘ene va’inga mo hono manakoa ‘i he a’u ‘a e Storm ki he fainolo ‘o e NRL neongo ‘enau fo’i ‘i he Broncos. Na’e toe ma’ave’ave hono vitio ‘i he float ‘a e timi ‘i he’enau ‘a’ahi maiki Tonga ni, ko’ene fakafofonga’i ‘a e Liiki ‘a Ha’apai ko’ene lele mai mei ai. Ka na’e to’oa he ope ‘a e fanga ki’i fanau to’utupu na’anau poupou kiai, ko e tokolahi ko e fanau nofo Tonga ni, ka ko’enaulele mai mei Ha’apai na’anau fiefia ke fakafe’ao kia Katoa lolotonga ‘a e float mo’enau fiefia ke feohi mo e sita ‘a e Storm.
Kaekehe ‘oku fakaongoongo ki he ola ‘o e fakatotolo mo ha faitu’utu’uni ‘e hoko kapau na’e ‘iai ha fehalaaki.
