Tautea ngaue popula Faifekau SUTT ki he pa’usi’i fanau ako fefine
Kuo tautea ngaue popula ‘e LCJ Bishop KC he ‘aho 9 Sepitema ke ngaue popula he mahina ‘e 16 ‘a e tangata’eiki Faifekau SUTT ki he ngaahi tikite kehekehe, ki hono pa’usi’i ‘o e fanau fefine ako he taha ‘o e ngaahi ako’anga ‘o e siasi.
Na’e ‘oatu he ongoongo ni ‘a e fakaikiiki ‘o e hopo ni pea mo e tu’utu’uni mei he Fakamaau’anga ke ‘oua na’a ‘iai ha fa’ahinga fakamatala ke ‘ilo ai ‘a e kau Mamahi.
Kaekehe ko e tautea ‘o e Faifekau ke ne ngaue popula ‘i he mahina ‘e 16 kae toloi malu’i angalelei ‘a e mahina ‘e 12 fakamuimui pea te ne ngaue’aki pe ‘a e mahina ‘e 4. Na’e tuku mai mo e ngaahi makatu’unga malu’i toloi angalelei, ke ‘oua na’ane toe fakahoko ha hia he vaha’a taimi ‘oku malu’i ta’u ‘e 2. ‘E pau ke ne lipooti ki he kau Polisi ‘i loto he houa ‘e 48 hono faka’ataa pea ke ne kau atu ki ha ako fekau’aki mo e pa’usi’i ‘o e fanau iiki.
Na’e kau ‘i hono fakakaukau’i ‘o e tautea ‘o e Faka’iloa ‘a hono tu’unga falala’anga ko e faiako mo e Faifekau. Ka na’ane pa’usi’i ‘a e falala ‘a e Siasi mo e matu’a ki hono tokanga’i ‘enau fanau ako fefine.
Hangee pe koia na’e ‘osi ‘oatu ‘e he ongoongo ni ko e Faifekau ‘oku faiako he taha ‘o e ngaahi ako ‘o e Siasi SUTT. Pea koia ‘oku ne tokanga’i ‘a e ngaue ki he fanga monumanu ‘a e kolisi. Pea ‘oku tukuaki’i ai ‘e he fanau fefine na’e ngaue mo e Faka’iloa he ngaahi taimi kehekehe, ‘a e to’onga pa’usi’i ‘o hangee ko e alakovi na’e fakahoko ‘e he Faifekau.
Na’e a’u ‘a e lipooti ki he matu’a ‘a e fanau ako fefine mo e puleako ‘o makatu’unga ai ‘a e ngaue fakalao na’e fakahoko.
Ko e me’a pango na’e tali tonuhia ‘a e Faifekau pea ne faka’ikai’i ‘a e tukuaki’i na’e fakahoko, ka na’e ‘osi ange ‘a e hopo na’e tali ‘e he ‘Eiki Fakamaau Lahi ‘a e ngaahi fakamo’oni ‘a e kau Mamahi.
‘I he lipooti pea mei he ‘Ofisa malu’i angalelei, na’e fakahaa ai na’e tali lelei ‘e he Faka’iloa ‘a e tu’utu’uni ‘a e Fakamaau’anga ka na’e kei tui pe ia ‘oku ne tonuhia ki he tukuaki’i kuo fakahoko. Na’e ‘iai mo e fokotu’u ke tautea toloi kakato ka ‘oku ‘iai ‘a e tui na’e hoko ‘ene kei tui ‘oku tonuhia ke hilifaki ai hono tautea ngaue popula.
‘Oku ‘iai pe foki ‘etau tui fakalotu kapau ‘oku mo’oni ‘a e Faifekau ‘o hangee ko’ene tui, he ‘ikai puli ia mei he tu’unga ‘e ‘iai ‘a e fanau fefine na’anau fakahoko ‘a e tukuaki’i. Ka ‘i he tu’utu’uni ‘a e Fakamaau’anga ‘oku ne halaia pea hilifaki mo hono tautea.
Tonga Fonua
