‘E kei sipoti mo ‘akapulu ‘a Liahona lolotonga ‘eku puleako: Sione Langi
Ko e fakama’ala’ala mahino ia mo mafana ‘a e puleako ma’olunga Liahona Palesiteni Sione Langi, ki he ngaahi matu’a, kau poupou mo e longa’i fanau ‘akapulu grade3 ‘a Liahona ‘i he’enau katoanga’i fiefia ‘a e ikuna kafakafa ‘a e grade pe taha mei Liahona na’e hau he fe’auhi ‘akapulu ‘a e ngaahi ako he Falaite uike kuo’osi.
Koia pe foki na’e fakaafe fakalangilangi he katonga mafana ‘a e grade 3 pea ‘i he’ene me’a, “na’e a’u ki ha taimi kuo ‘iai ha ni’ihi na’anau tohi ki he kau pule ‘o e ako ‘i he Pasifiki ‘o tala kiai ‘oku ‘ikai fenapasi ‘a e polokalama sipoti mo e ‘akapulu ‘a e ako mo e teuteu’i koia ‘o e hako tupu ‘o e siasi kenau hoko ko e kau faifekau taimi kakato he kaha’u. ‘Oku ‘uhinga ‘eni ki he tokolahi ‘a e fanau ako ‘oku fetuku ki he ngaahi fonua kehekehe ke ako mo va’inga ai, ka ‘oku vave kenau huu ‘o ngaue fakafaifekau,
Ka ‘i he’ene ma’u ‘a e fetu’utaki mei he ‘ofisi lahi ‘o e siasi he Pasifiki, na’ane fakahaa kiate kinautolu ko e mo’oni ‘oku lahi ‘a e fanau ‘oku folau ako mo va’inga, he ko e tokolahi ‘o kinautolu ko’enau ma’u’anga mo’ui ia ha hili ‘enau ngaue fakafaifekau. Ko e fili ‘a e tamasi’i ke ‘alu mo ‘ikai ‘alu ko e tau’ataina ia ‘a e ki’i tamasi’i takitaha pea kapau na’e tonu mo lelei hono teuteu’i, he ‘ikai ha me’a ke ta’ofi ia ha’ane fili ke ‘alu ‘o ngaue fakafaifekau.”
Ko e toki foki mai pe ‘eni ‘a Liahona ki he sipoti fakakolisi mo e ‘akapulu hili ha ngaahi ta’u lahi ‘enau nofo ko e lahi ‘a e kee fakaako. Na’e hoko taimi ko’eni ke tokolahi ha fanau ‘o e siasi na’e taleniti’ia sipoti mo ‘akapulu, kenau hiki ki he ngaahi kolisi kehe kenau lava ‘o faka’aonga’i honau taleniti. Ko e taimi tatau na’e hoko ai mo e ngaahi vaa he kaingalotu ko hono ‘ave ‘a e fanau ki he ngaahi kolisi kehe, ka ko e fili tau’ataina ia ‘a e matu’a.
Ka kuo hanga ‘e he puleako ‘o fakamahino ko e vaha’a taimi te ne hoko ai ko e puleako ‘e sipoti pea ‘akapulu ‘a Liahona.
Ko e ta’u ni foki na’e ‘ikai toe ‘ekea hono hanga ‘e Liahona ‘o fakamamahi’i ‘a e sipoti fakakolisi pea na’e ‘iai mo e ‘amanaki ki he ‘akapulu he ko e timi lelei ‘a Liahona he Senior ka na’e fakapa’ulu kinautolu he fanau mei he Funga Manamo’ui ‘i he semi final pea ko e timi grade 3 pe na’anau ikuna ‘enau fe’auhi.
‘I he ta’uni pe kuo tokolahi ha fanau ako Liahona kuo folau atu ki ‘Amelika, Siapani, mo Nu’usila ko e ako mo e ‘akapulu pea ‘oku ‘iai mo e ni’ihi kuo maau kenau mavahe atu ‘i he kaha’u vave mai.
‘I he lea mafana ‘a ‘Isi Fatani ko e ‘Ikale Tahi tutuku mo e faiako pule he timi grade 3, “na’ane fakahaa ‘ene fiefia ke tokoni’i ‘a e fanau ‘o e siasi mo e fonua kenau a’usia honau taleniti. Pea ‘oku ne ongo’i ‘oku mo’ua ma’u pe ki he ‘apiako Liahona ‘o tuputupu’a koe’uhi ko e faingamalie na’ane ma’u he ‘akapulu na’e kamata ia mei he ‘apiako. Pea neongo koeha tu’unga ‘e ‘iai ‘a e timi ‘Ikale Tahi, ‘e kei poupou fefeka pe he ko e ‘Ikale Tutuku ia.”
Kaekehe ‘oku hoko ‘a e lea kuo fakahoko he puleako ke fiefia ai ‘a e matu’a tauhi fanau tokolahi, he mahino ‘e ako pe ‘enau fanau mo sipoti mo ‘akapulu mei Liahona. He ‘oku ‘iai ‘a e fa’ahinga me’a makehe ‘oku ma’u ia ‘i Liahona ‘oku ‘ikai ke mahino ia ki he tokolahi. Pea ko e ‘uhinga ia ‘oku fakamoleki ai he siasi ‘a e lau miliona he ta’u ki he ‘apiako Liahona.
Ko Liahona ‘oku ‘ikai ke kau ia he tufa tokoni ki he fo’i ‘ulu ‘a e pule’anga, kaku taki lau miliona ai ‘a e ngaahi ako siasi kehe. ‘Oku fa’a fakahua ‘a e kau kolisi tutuku ke ‘ai pea ‘omai ia ki he kolisi tutuku he ‘oku ‘ikai kau ia ki he polisii ‘a e siasi kenau faka’aonga’i, he ‘oku totongi tukuhau kotoa pe.
