Tautea ngaue popula ongo ‘ofisa Polisi ki he taa fakalavea ha ‘ofisa sotia ‘i Vava’u
Kuo tu’utu’uni ‘a e ‘Eiki Fakamaau Lahi le’ole’o Petunia Tupou ‘i he Falaite uike kuo’osi, ke ngaue popula ‘a e ongo ‘ofisa Polisi ko Penititeko Latu mo Taliai Tapueluelu ki he ta’u ‘e 3, kae toloi ta’u ‘e taha mo e konga ‘a e mahina ‘e 12 fakamuimui pea tena ngaue pe he ta’u ‘e ua.
Na’e tuku atu mo e ngaahi makatu’unga ‘o e malu’i angalelei ‘a e ongo ‘ofisa ni ke na muimui pau kiai, ka ‘ikai te na ngaue’i kakato ‘a hona tautea kakato.
Ko e tautea ‘a e ongo ‘ofisa Polisi mei Vava’u ko’ena taa fakalavea lahi na’e fakahoko ki he matapule ko ‘Isileli Latu ko e ‘ofisa Taumalu’i ‘Ene ‘Afio.
Na’e tali halaia ‘a e ongo ‘ofisa ‘i he ‘aho 24 Novema 2023 ki he ngaahi tikite na’e faka’ilo kinaua ki ai.
‘I he puipui tu’a ‘a e me’a na’e hoko, he ‘aho 26 Sune 2021, na’e lue mai ai ‘a ‘Isi Latu ‘i he toumu’a ‘o e ‘api Polisi tamate afi ‘i Neiafu ‘oku ne konaa, ‘o feta’emahino’aki mo e tokotaha kehe ‘ona fuhu pea lele ai ‘a e tokotaha ni ia ki he ‘api Polisi Tamate Afi kae lue atu ‘a e Talatalaaki ‘o kaikaila mo pole fuhu ‘o hoko ai makuku pea fekau he kau ngaue ‘o e Tamate Afi ke ne mavahe.
Na’e fanongo mai kiai ‘a Latu mei he ‘apitanga Polisi na’ana lolotonga ngaue ai mo Tapueluelu, ‘one puke ai ‘a e Talatalaaki ‘o ‘ave ki ‘api Polisi. Na’e pukepuke ngata’a heni ‘a e Mamahi he na’ane fu’u kona ‘o iku ke hanga ai ‘e he ongo ‘ofisa Polisi ‘o taa ‘a e Mamahi ‘o a’u ki he fetoto’i pea iku lii ki he pilisone. Ko e taa na’e fakahoko ko e taa na’e lahi ko e ‘aka ki he ‘ulu mo e sino lolotonga ‘oku ne tokoto he faliki.
Na’e fakatokanga’i he ongo Faka’iloa ‘oku faingata’a’ia lahi ‘a e Mamahi pea leleaki’i ki he falemahaki Ngu pea koe’uhi ko e lavea lahi na’e hoko na’e ‘ave fakafalemahaki mei ai ki Tonga ke fakahoko hono faito’o.
Fakatatau mo e lipooti meia Dr Po’ese na’e ngaue ki he keisi ni, ‘oku mahino ko e me’a malohi na’e tau pe taa ‘aki ‘a e Mamahi ‘o fakatatau ki he ngaahi lavea na’e ma’u hono sino pehee ki he motumotu ‘a e ngaue.
Na’e fakahoko ai pe hono faka’ilo ‘o e ongo ‘ofisa Polisi pea iku fakamalolo’i mei he ngaue kae fakahoko ‘a e fakatotolo mo e hopo, ka ko’eni kuona tali halaia pea hilifaki mo hona tautea.
Kaekehe ko e taha foki ‘o e palopalema ‘oku ‘ikai fo’ou ki he Potugaue Polisi ‘a Tonga, ko e taa ‘e he kau Polisi ‘a e kakai ‘oku nau ngaue atu kiai kae tautefito ki he kakai ‘oku ma’u kava malohi. Pea ‘oku ne talamai ai ‘a e fiema’u ke toe ako’i leleiange ‘a e kau ‘ofisa Polisi ki he taimi ‘oku nau ngaue atu ai ki he kakai pehe ni he ‘oku ‘ikai nomolo ‘enau fakakaukau.
Kuo ngaue popula ha kau Polisi koe’uhi ko e palopalema tatau ko e taa pea iku ke mole ai ‘a e mo’ui.
