Puke he kau Polisi mo Vilisoni Tauelangi ki he kaunga hia teuaki fakapoo
Kuo tuku mai he kau Polisi ha ongoongo tukuatu ‘i he pongipongi ho’ata ‘o e ‘aho ni ha fakamatala, kuo toe puke he kau Polisi ha tangata ko e kaunga hia fakataha pea mo e faka’iloa kuo nau ‘osi puke ko ‘Asiata Masima.
Pea neongo ‘oku ‘ikai fakahaa e hingoa ‘a e tokotaha ni ‘i he ongoongo tukuatu, ka kuo ‘osi tuku holo he mitia fakasosiale ‘a e ngaahi ‘ata ‘o Vilisoni Tauelangi ‘i hono puke ‘e he kau Polisi.
Ko Vilisoni Tauelangi mei Pea ka na’e puke ia mei Hoi ‘o fakatatau ki he fakamatala ‘a e ongoongo mei he kau Polisi pea ko e tokoua ‘aki ia ke puke ‘i he hia tatau ko e ngaue’aki ‘a e mitia fakasosiale ki he fai hia.
Ko ‘Asiata pea mo Vilisoni ‘oku ‘ikai sola kinaua ki he kakai ‘o e Fonua ‘i he ngaahi vitio ‘oku ne tuku hake he ope fekau’aki mo’ena tui fakapolitikale. Kuona ‘osi ngaue popula ‘i he taukave’i ‘ena tui fakapolitikale pea ‘oku hange ‘e kei hokohoko atu pe ‘ena ngaue koia.
Ko e vitio ‘oku tukuaki’i kiai ongo faka’iloa ‘oku fekau’aki ia mo’enau fakamatala ki he’ena palani ke fakapoongi ‘a e taki ‘o TUU Pita Pua ko e fetokehekehe’aki ‘i he tui fakapolitikale.
Neongo hono puke ko’eni ‘a e ongo helo ‘a e PTOA, ka ‘oku toe le’olahi ange mo e ui ia ke puke pea mo Pita Pua. Ka ko e palopalema he ‘oku ‘ikai ha fakamo’oni ki ha hia ke puke ai. Ka ‘oku toe ha fanga ki’i vitio hono ‘ohake he PTOA ke puke ‘aki ‘a Pita Pua. Ka koe vitio kuo puke ai ‘a ‘Asiata mo Vilisoni ‘oku fu’u ‘ilonga ‘aupito ‘a e ngaahi lea fakamanamana mo teuaki fakapoo na’ana fakahoko.
‘Oku pehee he ongoongo tena haa he fakamaau’anga he ‘aho ni pea toki mahino ai pe tena toe haa he Fakamaau’anga Polisi pe koe faka’aho ha ‘aho kena haa ai he Fakamaau’anga Lahi ke fai ha’ana tali ki he tukuaki’i.
‘E feinga ‘a e ongoongo ni ke muimui’i atu ‘a e kaveinga malie ‘o e fepolepolei ‘a e kau politiki.
