Toe launga’i ‘a Tongatapu 7 (Piveni Piukala) ki he kape kulikuli kia Lord Fohe ‘i he mitia fakasosiale.
‘I he ‘aho ‘uluaki pe ‘o e foki ‘a Tongatapu 7 ki he Fale Alea, hili ‘ene foki vave ki he Fale Alea ‘i ha’ane tohi kole ki he Sea ‘o e Fale Alea ki hono fakamalolo’i ‘aho 7 koe’uhi ko’ene anga ta’efaka’apa’apa ki he Palemia ‘o Tonga, kuo to e fakahuu atu ‘e he Minisita Ngoue Lord Fohe ‘ene launga ki he Sea ‘o e fale koe’uhi ko e kape kulikuli ange ‘a e Fakafofonga kiai ‘i he mitia fakasosiale.
Na’e fakamahino ‘e Lord Fohe ‘ene loto mamahi ‘i he Fakafofonga ‘ene founga ngaue pea kapau ‘oku ‘iai ha me’a ‘oku ne tokanga kiai pea ha’u hangatonu ‘o lea mai ki hono mata, kae ‘oua ‘a ‘alu ia ki he mitia fakasosiale ‘o kape mai ai. Pea ko e taha na’e ‘ikai ke mohe mo ha kuli ke namu kulikuli.
Ka na’e ki’i feinga ‘a Piveni ke fakahoko ha’ane taukapo, ka na’e mahino na’e ‘uhinga ‘ene lea pehee ko’ene lotomamahi ‘i he fili Palemia mo e Vote of No Confidence.
‘Oku ki’i mamafa foki ‘eni he ko e lea ta’efaka’apa’apa ki he ‘eiki nopele ‘Ene ‘Afio pea ko e taha ‘oku mahino ‘aupito ‘a e anga ta’efaka’apa’apa ‘a Tongatapu 7.
‘Oku ‘ikai puli ‘a e to’onga ia ‘a Piveni he ala’e ‘o e politikale, ka ‘oku hoko hono vaivai’anga ko ha me’a ia ‘e ngali kaukovi ki hono mala’e fakapolitikale. ‘Oku lahi ‘a e taimi ‘oku ‘ita ai pea pehee ki he’ene to’onga ta’efaka’apa’apa ‘ene lea pea ko’eni pe ia ‘oku uesia ai ‘ene ngaue.
‘Oku ‘iai ‘a e tui he ‘ikai mama’o hano toe tuku kitu’a ‘a Piveni mei he Fale Alea.
Kuo lahi pe foki mo e fakahaa he tokolahi ‘oku fiema’u a Tongatapu 7 ke liliu ‘ene to’onga mo’ene founga, ka ‘ikai ‘e kau kovi ia kiate ia pea ko’eni ‘oku ‘asi mai.
