Puke kau Polisi Falanise talavou ta’u 16 ki he fakamanamana ‘i he mitia fakasosiale ki he teuaki sipoti ‘Olimipiki
Kuo puke he kau Polisi ‘a Falanise ha ki’i talavou ta’u 16, ‘o faka’ilo ia ki he’ene tohi he Telegram, ka ‘oku tukuaki’i ‘ene tohi ki he teuaki fakapoo pe fakamanamana.
Ko e tohi ‘a e talavou ni na’ane pehee, “mate fakama’ata” (die a martyr) pea fakatatau mo e fakamatala mei he kau Polisi, ko e fakamatala ‘oku nau ma’u na’e palani ‘a e talavou ni ke ne ngaahi ha pomu ‘oku fa’a ngaue’aki he kau taonakita pomu ‘o ha’i honau sino pea fakataumu’a ki he Sipoti ‘Olimipiki ‘oku ‘amanaki ke fakahoko ‘i Falanise he ‘aho 27 ‘o Siulai.
Na’e puke he kau Polisi ‘a e talanou ni mei honau ‘api nofo’anga pea hua mo honau ‘api ‘o ma’u ai ‘a e ngaahi pepa ‘o pehee, ko e talavou ‘oku ne poupou ki he kulupu fakatau toitoi ko e Islamic State.
‘Oku ‘ikai tuku mai ‘a e hingoa ‘o e talavou koeu’uhi ko’ene kei ta’u si’i, ke lava ‘o mahino pe ko e papalangi Falanise pe ko ha hiki fonua mai meiha fonua kehe ki Falanise. Ko e kulupu tautoitoi Islamic State ko e tokolahi taha ‘o e kau poupou kiai ko e kakai mei he ngaahi fonua ‘Alepea mo e kakai lotu Mosilemi.
Kaekehe kuo to e hiki’i ai ‘e he Palesiteni ‘o Falanise Ammanuel Macron, ‘a e tu’unga fakamalu’i ‘o e fonua ki he tu’unga taupotu taha koe’uhi ko e mo’ui ‘a e kau sipoti mo e kakai kehekehe ‘o mamani tenau ‘ahia ‘a e sipoti ‘Olimipiki. Pea kuo ne ui ai ki he ngaahi fonua ‘e 45 ‘oku nau kau ki he ‘Olimipiki, kenau tokoni ange ‘i he tafa’aki fakakau ngaue, me’angaue mo ha me’a pe ‘e tokoni ki hono malu’i ‘o e fe’auhi mei he kau tautoitoi.
‘I he vave ange ‘a e taimi ke fakahoko ai ‘a e fe’auhi ‘oku toe hiki too ai ‘e Falanise ‘enau ngaue fakamalu’i pea a’u ki he fakakaukau ke liliu mo e feitu’u ‘e fakahoko kiai hono fakaava ‘o e polokalama Sipoti ‘Olimipiki, koe’uhi pe ko e malu ‘a e kau sipoti mo e kau poupou.
‘Oku hoko ‘a e nganga’ehu ‘i he tau ‘i Lusia mo Ukraine pehee ki ‘Isileli mo e kau Palesitaine mo ‘Iulani, ke to e fu’u tokanga makehe ange ai ‘a Falanise ki he tafa’aki fakamalu’i ‘o e fe’auhi lolotonga ‘ene lele mo ha kau sipoti ‘oku ‘i he toko 10,500 mo e kau mamata ‘e lau miliona. Pea ko e fo’i mafatukituki koia ‘oku hili ia he uma ‘o e fonua. Pea ka ‘iai ha me’a ‘e hoko, ‘e sio ‘a e ngaahi fonua kiate kinautolu kae tukukehe ange ‘a e ‘ikai ke toe falala’anga ‘enau tu’unga fakamalu’i.
‘Oku te’eki ngalo ‘i mamani he ‘Olimipiki ‘o e 1972 ‘i Siamane, na’e huu atu ai ‘a e kau tau Palesitaine ki he kolo ‘oku nofo ai ‘a e kau sipoti ‘o fakapoongi ha ‘ofisiale ‘Isileli ‘e toko 2 pea puke fakamalohi’i mo e toko 7 he kau sipoti ‘a ‘Isileli.
Na’e mate ha kau ‘Isileli ‘e toko 11 fakakatoa mo ha Polisi Siamane ‘e taha pea pehee ki he toko 4 ‘o e kau puke fakamalohi pea puke mo’ui ai mo e tokoua.
Pea ko e talu mei ai mo e hoko ‘a e tafa’aki fakamalu’i mo e kaveinga fika ‘uluaki ki he fonua ‘oku ne talitali ‘a e ‘Olimipiki pea pehee ki he ngaahi fonua memipa.
‘Oku te’eki foki ke ongo na mai mei he MIA mo e TASA pe ‘oku ‘iai ha timi ‘a Tonga ki he ‘Olimipiki mo ha fakaikiiki kiai, ‘a e kau sipoti mo e fe’auhi tenau kau kiai mo e ngaahi mea koia.
