Fe’unga mo e $100,000.00 tupu fakapa’anga he Tonga Health Sipoti ngaahi ako.
Ko e sponsor lahitaha ia kuo fakahoko ki he Sipoti ‘a e ngaahi ako ‘a Tonga, ko e tokoni ‘a e Tonga Health Promotion Foundation ‘oku fe’unga pea mo e pa’anga kotoa ‘e $1kilu tupu.
Ne fakapa’anga ‘e he Tonga Health Promotion Foundation ‘a e fe’auhi sipoti ‘a e ngaahi lautohi mo e ako lotoloto ‘a e Pule’anga ‘a ia ne fakahoko ‘I he ‘aho Falaite ko hono 15 ‘o Ma’asi 2024 pea na’e fe’unga kotoa ‘a e tokoni ko eni mo e $17,000.
Ne toki fakamo’oni foki ‘a e Tonga Health pea mo e Sea ‘o e Komiti Sipoti ‘o e ngaahi ako’anga Kolisi ‘a Tonga, Fr ‘Ekuasi ka ko e Puleako ‘o e ‘apiako ‘Apifo’ou ‘I ha aleapau ‘a ia fe’unga hono mahu’inga mo e $95,000 ko e fakataumu’a ke totongi ‘aki ‘a e ngaahi fakamole kotoa ki he Sipoti ‘a e ngaahi kolisi. ‘Oku fakafuofuo ko e katoa ia ‘o e ngaahi fakamole ki hono fakahoko ‘o e Sipoti ‘I he ‘aho ‘e 4 ‘I he Pa’ake Teufaiva.
Ne fa’a hoko foki ‘a e Kautaha Coca Cola ko e major sponsor ia ‘o e ngaahi Sipoti ‘I he ngaahi ta’u ki mu’a atu, ka kuo hoko ‘a e hu ‘a e Tonga Health ‘o to’o kotoa ‘a e ngaahi fakamole ke hoko ia ko e Siponisoa lahi taha ‘o e Sipoti.
‘Oku ‘I ai foki ‘a e fakakaukau ke hokohoko atu ‘a e tokoni ko eni ‘I he ta’u hokohoko ‘e tolu ka ‘e makatu’unga ia ‘I he fengaue’aki vaofi pea mo e tali ui ‘a e komiti Sipoti ‘a Tonga ki he ngaahi fiema’u mei he kautaha Mo’ui Lelei ‘a Tonga.
Ko e fakapa’anga foki ko eni ‘oku ‘I he angalelei ia ‘a e Pule’anga ‘Aositelelia ‘I he’enau fakaivia fakapa’anga ki hono teke ‘o e mo’ui lelei pea mo hono ngaue’I ‘a e palani fakafonua ‘o e mo’ui lelei ‘a ia ‘oku taumu’a ke ngata mei he ta’u 2025.
Kaekehe ko e konga foki eni ‘a e tefito’I fatongia ‘a e Tonga Mo’ui Lelei ki hono faka’ai’ai ‘a e mo’ui lelei ko hono teke koi a ‘a e mo’ui longo mo’ui ‘I he kakai ‘o e fonua, pea ‘oku tui ‘a e kautaha kapau ‘e fakava’e ia ‘I he hakotupu ‘o e fonua ‘oku ‘I ai ‘a e ‘amanaki ki ha Tonga toe mo’ui lelei ange ‘I he kaha’u.
‘Oku kau foki ‘I he’enau tokoni ‘a e fiema’u moe fakangatangata ‘a e ngaahi me’atokoni ‘oku malava ke fakatau atu ‘I he pa’ake teufaiva, ki he ngaahi me’atokoni mo’ui lelei pe, ‘oku ‘ikai ai ke toe tali ke fakatau atu ‘a e ngaahi inu melie, makehe mei he inu kola mo e vai ‘ata’ata moe niu mata.
‘I he taimi tatau ‘oku ‘iai mo e ngaahi fiema’u ‘a e Tonga Health ‘i he’ene fengaue’aki pea mo e komiti sipoti ‘o e ngaahi kolisi. Pea ‘oku kau ai ‘a e ‘ikai ke toe fiema’u ke fakatau atu ‘i loto he ngaahi canteen ha me’akai ‘ikai mo’uilelei tukukeke pe ‘a e niumata mo e vai ‘ata’ata, ngaahi fua’i’akau mo e ngaahi me’atokoni tu’ufonua . Teufaiva.
‘Oku ongo lahi ‘eni ia ki he ngaahi canteens he ko e ma’u’anga pa’anga lahi ‘a kinautolu ‘oku ma’u, ka ‘oku fakamanatu mai ‘e he Tonga Health ko’enau taumu’a ‘anautolu ‘a e mo’uilelei ka ‘oku ‘ikai ko e fakatupu pa’anga.
‘Oku ‘ikai sola ‘a e Tonga Health ‘enau ngaahi tokoni kehekehe ki he ngaahi fea’uhi sipoti kehekehe hangee ko e ‘akapulu mo e fakamalohi sino pea pehee ki he tufa atu ‘o e ngaahi ‘akau vesitapolo ki he kakai ‘o e fonua. Pea ko’eni kuonau ala mai ki he sipoti lahi taha he fonua ko e sipoti ‘a e ngaahi ako, kae tautefito ki he sipoti ‘a e ngaahi kolisi, ‘a ia ‘e ‘amanaki ke kau mai ki ai ‘a e Lolo mei Vava’u mo Ha’apai Veu pea pehee ki he Funga Fonua mei ‘Eua.
