Koeha ‘uhinga ‘oku holomui ai tokolahi mei he fili Fale Alea 2025, mole nai manakoa ‘o e mala’e politikale mei he kakai?

September 16, 2025
8:48 am

Ko e taha ia ‘o e fehu’i mahu’inga ‘oku ha’u ki he kakai ‘o e fonua koe’uhi ko e toe pe mahina ‘e ua ki he fili Fale Alea ‘o e ta’u 2025, ‘oku te’eki ke ‘asi mai ‘a e kau Kanititeiti tenau veipa ki he ngaahi Sea ‘o e Kakai ‘e toko 17.

‘I hono fakahoa ki he fili ‘o e 2021 na’e ‘ikai ngata ‘i he tokolahi ‘o e kau fili Fale Alea na’e kau ki he fili mei he ngaahi vahenga takitaha, ka na’e mahino ‘a e longomo’ui mo e ngaahi kemipeini he taimi lahi kimu’a he fili Fale Alea. Na’e fe’unga mo e kau Kanititeiti ‘e toko 75 na’e kau ki he fili ‘o e 2021 pea ko e ni’ihi na’e kamata pe ‘enau kemipeini ‘i he ta’u ‘e taha kimu’a ki he ‘aho fili, ka ko e angamaheni ‘oku toki ‘ohofi pe ‘i he mahina ‘e ua pe taha ki he ‘aho fili.

Ka ko e fehu’i mahu’inga pe koeha ‘a e ‘uhinga ‘oku liliu lahi pehee ai ‘a e manakoa ‘o e kau mai ‘a e kakai ‘o e fonua ki he fili ‘o e ta’u ni?

Na’e tui ‘a e Palemia le’ole’o Hon. Dr Taniela Fusimalohi ‘i hono ‘ohake ‘a e fehu’i ni ‘i he Konifelenisi mo e kau Faiongoongo, ‘oku ‘iai ‘a e tokolahi ‘oku nau ki’i fakakaukau lelei kimu’a pe ‘e fakapotopoto ‘enau kau mai ki he fili. Ko e taha ko e folofola ‘a e Tama Tu’i ki he kakai ‘o e fonua kenau fili fakapotopoto, ‘oku fakakaukau kiai ‘a e tokolahi pe tenau a’usia ‘a e finangalo ‘o e Tama Tu’i ko ha kau Kanititeiti fakapotopoto kinautolu ke fili ai ‘a e kakai ‘o e fonua.

‘I he tui ia ‘a ‘Etuate Lavulavu ko e Kanititeiti pe taha kuo mahino mei Vava’u 16 ‘a e fefeka ‘ene ‘asi mai kimu’a, “ ‘oku falala ‘a e tokolahi ki he kau fakafofonga pe pule’anga lolotonga pea ‘oku ‘ikai fiema’u ia kenau toe fili. Pea ‘oku hoko ‘a e lelei ‘a e fakahoko fatongia ‘a e Kapineti lolotonga ke poupou kiai ‘a e tokolahi.”

‘Oku kau ‘eni ia ha fakakaukau ‘oku ‘ikai ke tui kia ‘a e ngaahi paati ‘e ni’ihi hangee ko e Paati Temokalati ‘Otumotu Anga’ofa, ko e Kapineti malolo mo e ngaahi paati fakapolitikale kehekehe pe. He ‘oku nau tui ‘oku lahi ‘a e me’a ke fakalele’i ‘i he pule’anga lolotonga.

‘I he vakai ‘a e tokolahi, na’e tokolahi ‘a e fili ‘o e 2021 koe’uhi ko e ngaahi nganga’ehu na’e hoko ‘i he paati PTOA mo e to’u Fale Alea koia, ‘o ‘iai ‘a e fakakaukau kuo ‘ikai ke kei taau ‘a e tokolahi ‘o e kau memipa Fale Alea pea ‘iai honau faingamalie ke huu ki loto.

Na’e hoko ‘a e pekia ‘a ‘Akilisi Pohiva ke movete ‘ene Kapineti. ‘I hono fili ‘o Pohiva Tu’i’onetoa na’e ‘ikai tali he tokolahi ‘o e kau memipa PTOA na’e ‘i he Fale Alea kenau to e movete ai. Pea na’e pue mai ‘a e tokolahi ‘o e kau Kanititeiti ko ha faingamalie ‘o e movete ko’eni kenau huu ai, ka na’e hoko ia ko e fili ola ma’ulalo taha kuo fetaulaki mo e PTOA.

Kaekehe ‘oku ‘iai ‘a e tokolahi ‘oku kei fihia ‘i he fakaongoongo ki he kau Kanititeiti pau pe tenau toe fili pe ‘ikai. He ‘oku nau tui ka toe hoko atu pe ‘a e kau fakafofonga lolotonga pe toe foki mai ‘a e kau Kanititeiti maloloo he ‘ikai hanau faingamalie ke fili ai kinautolu. Ko e tololahi ‘o e kau fakafofonga lolotonga ‘oku te’eki kenau fakahaa ‘a e tu’unga tenau ‘iai pea ‘oku fihia fakaongoongo ai ‘a e kau Kanititeiti mei tu’a.

Ko e palopalema foki ‘o e Kapineti lolotonga ko e tatanaki, ‘o kau ai ‘a e kau Tau’ataina, kau Nopele mo e kau PTOA. Pea ‘oku mahino mai ‘oku te’eki kenau femahino’aki ki he’enau hoko atu pe tenau tu’u fakataha pe ko e takitaha foki ki he’enee paati. Ko e fo’i fefakaongoongo’aki ko’eni ‘oku tuai ai ‘a e ‘asi mai kimu’a ‘a e tokolahi.

Ko e ni’ihi tokosi’i pe kuo ‘asi mai kimu’a ‘o mahino tenau kau ki he fili ‘o e ta’u ni, ko Kulu Kalaniuvalu, Matani Nifofa, Faka’osi Maama mei Tongatapu 10, Siueli ‘Eleni Mone mo Dr. Makataliuku Tau’aho ‘Ahokovi, ko ‘Etuate Lavulavu mei Vava’u 16, Paula Kohinoa mei Niua 17.

Kaekehe ko e fifili mo e hoha’a, na kuo ‘ikai toe manakoa ki he kakai ‘o e fonua ‘a e politiki pea ‘e hoko ia ke fa’ifa’iteliha ai ‘a e tokosi’i tenau kei hoko ko e kau fakafofonga Fale Alea. Ka ‘i he’ene tokolahi ‘a e kau Kanititeiti tanau fe’au’auhi ‘i he fatongia kae kau lelei ki he kakai ‘o e fonua.