Hao ongo ‘ofisa Polisi ki hono faka’ilo ki hono fakalavea’i ‘a e ‘ofisa Polisi lolotonga ‘enau konaefu
Na’e ‘ikai tali ‘e Hon Justice Garlic ‘a e faka’ilo na’e fakahoko ‘e he ‘ofisa Polisi ko Siu Kitu’a Tonga ‘a hono kaunga Polisi ko Simione ‘Uhila mo Mosa’ati ‘Uhila. Ko e faka’ilo ‘eni ki he fakalavea na’e fakahoko kiai ‘i he ‘aho 27 Sanuali 2024.
Na’e lele ‘a e fakatonutonu fakalao ‘i he ‘aho 20-25 ‘Aokosi 2025 pea faitu’utu’uni ai ‘a e Fakamaau Lahi ke ‘oua ‘e tali ‘a e faka’ilo na’e fakahoko pea tuku mai mo e ‘uhinga na’e ‘ikai tali ai ‘a e faka’ilo.
Kaekehe ko e malie ‘a e fakatonutonu ko’eni he ko e fu’u kau ‘ofisa Polisi kotoa, na’anau kau atu ki he paati fai’aho ‘i Popua he ‘aho 27 Jan 2024, ‘i he poo tatau na’e hoko atu ‘a e kau ‘ofisa ki he Reload Bar ke fakakakato kiai ‘enau ma’u kava malohi pea ‘i he tapuni ‘a e Reload na’anau fakmahamaha kotoa ki he ‘elia mui’i Sopu. Pea ko e taimi ‘eni na’e hoko ai ‘a e ki’i ta’efemahino’aki he kau ‘ofisa ‘o makatu’unga ai ‘a e faka’ilo na’e fakahoko.
‘Oku tukuaki’i heni he Mamahi na’e fakalavea’i ia ‘e he ongo ‘Uhila, ka na’e tui ‘a e ongo ‘Uhila ko’ena feinga ke malu’i (self-defense) mei he Mamahi.
‘I hono fakama’ala’ala ‘e he Fakamaau Lahi na’e ‘iai ‘a e kaila ‘a e Mamahi kenau “fuhu ki he mate” pea ko e ‘uhinga ia ‘o e ngaue ‘a e ongo ‘Uhila ke malu’i kinaua mei he ngaue na’e kaila ‘a e Mamahi te ne fakahoko ko e fuhu ki he mate.
Na’e toe faingata’a foki ki he Fakamaau ke ne tali ‘a e ngaahi fakamo’oni, he ko e kau ‘ofisa Polisi kotoa pea ‘e ‘iai pe femalu’aki pea ko e taha ko e taimi na’e hoko ai ‘a e hia na’e mahino na’e konaefu kotoa ‘a e kau ‘ofisa.
‘I he fakamatala mei he tu’utu’uni Fakmaau’anga Lahi, na’e sivi ‘a e kau ‘ofisa pea mahino na’anau fu’u hu’akava’ia lahi kotoa, Ko e scale 1-10 ‘o e me’afua na’e ‘iai ni’ihi na’e 10 pea ko e toenga na’e ‘i he 5-7. Ko e ‘ofisa ‘e taha na’ane fakahaa na’ane inu ‘eia ‘a e fo’i pia ‘e 24.
Kaekehe ko e hao ‘a e ongo Faka’iloa na’e tu’utu’uni ai ke fakafoki ‘ena paasi pooti pea to’o hona hingoa mei he ta’ofi mei he fefolau’aki.
