Fakahaa ‘e Lavulavu kuo ‘osi faka’ilo Faka-Fale Alea ‘a e toko 5 ‘o e kau Minisita lolotonga.
Na’e faka’ohovale hono fakahaa ‘e ‘Etuate Lavulavu ‘i he fakataha ‘a e Palemia Le’ole’o Hon. Taniela Fusimalohi, mo e kau Faiongoongo, kuo ‘osi fakahuu atu ‘a e faka’ilo faka-Fale Alea ‘o e kau Minisita ‘e toko 5 ka na’e ‘ikai ke ne fakahaa ‘a e ngaahi hingoa.
‘Oku faka’ohovale ki he tokolahi ‘a e fetokehekehe’aki ‘a Lavulavu mo e pule’anga lolotonga, he na’e ‘iai ‘a e tokolahi na’anau sio ‘oku poupou’i ‘e Lavulavu ‘a e pule’anga lolotonga. Ka ko e me’a na’e hoko ‘i he ‘aho Falaite ‘a e fakalalahi ‘a Lavulavu mo e Minisita Polisi, ‘oku ne talamai ‘a e talanoa kehe.
Ka ‘i hono toe fakahaa ‘e Lavulavu kuo fakahuu hono faka’ilo ‘o e toko 5 ‘o e kau Minisita, ko hono fakapapau’i ia ‘oku kauhala kehekehe ‘aupito ‘a Lavulavu mo e pule’anga lolotonga.
‘I he taimi tatau ko e tokotaha ‘o e kau Minisita kuo ma’u he ongoongo ni ‘a e fakaikiikiki hono faka’ilo, ko e Minisita Kasitomu mo e Tanaki Pa’anga Huu Mai Hon. Mateni Tapueluelu.
‘Oku faka’ilo ‘a Hon. Tapueluelu ki he faka’ataa ‘a e pa’anga tokoni Fale Alea ki he polokalama noo ‘a e kakai fefine ‘o e vahenga. Ka na’e hoko ‘eni ke mole ai ‘a e $41,665, ko e lahi ‘o e pa’aga na’e te’eki ke totongi ‘e he kau fefine noo.
Na’e tukuaki’i ‘e he tohi faka’ilo ko e taimi na’e fakahoko ai ‘a e polokalama noo, ko e Sune -Novema ‘o e 2021 na’e taketi pe ia ko e kemipeini ke fili ai ‘a e kakai fili ‘o e vahenga.
Na’e ‘iai mo e fakatokanga ki he Fakafofonga ko e polokalama noo ‘oku ta’efakalao, ka na’e fakahaa ‘e he Minisita na’e fakahaa ia mei he Potungaue Fefakatau’aki mo e Leipa ‘oku sai pe ia. Ka e fakatatau mo e lao ‘a e Pangike Pule ‘oku ta’efakalao ‘o fakatatau ki he lao ‘o e ngaahi pisinisi noo.
Kuo fakahuu atu ‘a e faka’ilo pea ko e fakamatala ‘oku ma’u he ongoongo ni, na’e fakahuu atu kimu’a ‘i he tapuni ‘a e Fale Alea, ka ‘oku hangee ‘oku tanu’i hifo kae toki vakai ‘i he huu atu ‘a e Fale Alea hoko
Kaekehe tau foki ange ki he kamata’anga ‘o e vaa ‘o Lavulavu mo Hon. Piukala, ‘i hono tali ‘e he Potungaue Sipoti ‘a e $4 mano ki he fe’auhi ‘akapulu ‘a Vava’u ‘oku ‘iloa ko e Vava’u Lahi Rugby Committee. Ka ‘oku tui ‘a Hon. Piukala ko e fo’i kemipeini ‘a Lavulavu ki he’ene teu fili Fale Alea. Pea te ne ‘ohake ‘a e me’a ni ‘i he’enau Kapineti he ‘oku ne tui ‘oku ta’efakapotopoto ke ha’u pe ha taha ‘o lii mai ha’ane fakakaukau pea tali.
Kuo tuku mai ‘e he Minisita Sipoti ha’ane ongoongo tukuatu ki he ngaahi ongoongo koia ki he foaki ‘o e pa’anga ki he Vava’u Lahi Rugby Committee, ‘oku ‘ikai tonu. Ka ‘oku tui ‘a e tokolahi ko e ongoongo tukuatu ‘a e Minisita ‘oku totonu ke fakahoko hangatonu pe ia ki he Minisita Polisi, he koia na’ane fakahoko ‘a e tukuaki’i. Pea ‘oku hangahanga mai ‘oku ‘iai ‘a e too kehekehe ‘i he Kapineti pea ‘oku ‘ikai ha ofo he ko e Kapineti ko’eni na’e fatu’aki ‘a e ngaahi sino kehekehe, ko e kau Tau’ataina, kau PTOA mo e Nopele pea pehee ki he ni’ihi na’e fili mei tu’a.
‘Oku malie ka ‘osi ‘a e fili ‘oku lava ha ni’ihi ‘a e kau Minisita ‘oku faka’ilo pea nau halaia hili ‘a e fakailo Faka-Fale Alea pea ko’enau mavahe ia mei honau sea kae fakahoko ‘a e fili fo’ou.
