Fehu’ia kau Polisi ki he fe’auhi ‘akapulu ko e ‘ikai fakafiemalie ‘enau fuafatongia
‘Oku ‘iai hono fehu’ia ‘a e to e foki ko’eni ‘a e kau Polisi ki he mala’e ‘akapulu ‘i he to’u va’inga ‘o e uike ni. Na’e va’inga fakaava ai ‘a e timi ‘a e kau Polisi mo e timi ‘a Vaini pea na’e kamata lelei ‘a e Polisi ‘enau ikuna ‘a Vaini
Na’e kau ‘a e timi ‘a e Polisi ‘i he timi ‘iloa ‘i he ngaahi ta’u ‘o e fitungofulu ‘o a’u mai ki he valungofulu. Ko e taimi ‘eni ‘o e ngaahi timi ‘iloa hangee ko e Toa ko Ma’afu, Hihifo mo e Polisi pea ko e talu ‘eni mei he valungofulu timi mo e ‘ikai toe kau ‘a e Polisi ki ha fe’auhi. Ko e timi pe ‘a e kau Sela na’e huu mai ‘i he ta’u ‘e taha pea toe maloloo. Ka ‘oku faka’ohovale ‘a e toe foki ‘a e kau Polisi ki he mala’e ‘akapulu ‘i he ta’u ni pea ‘oku fakafiefia ia ki he komiti ‘akapulu.
Kaekehe ‘oku ‘iai ‘a e tokolahi ‘oku nau fehu’ia pe ‘oku totonu nai ‘a e faitu’utu’uni ko’eni ‘a e Minisita Polisi ki he’ene kau ngaue kenau kau ki he fe’auhi ‘akapulu ‘o e ta’u ni. Pea ‘oku kaunga lahi kiai ‘a e ‘ikai fakafiemalie ki he kakai ‘o e fonua ‘enau fua fatongia ‘i he tafa’aki kehekehe kau ai hono tau’i ‘o e faito’o konatapu. Ka ko e tu’utu’uni kenau toe ‘akapulu ‘e toe toto laloange ai ‘enau fua fatongia.
He kuopua ke toe to’o honau taimi ke fakamalohisino pea ko e taimi lahi ia he ‘aho kotoa tenau fakamalohisino ai ki he fe’auhi. Pea kuopau ke ‘iai ‘a e ni’ihi ‘e lavea he fe’auhi pea tenau maloloo ai mei e fua honau tefito’i fatongia totonu. Kuopau ke fakamoleki mo e konga ‘o e Patiseti ‘a e Potungaue ki he timi ‘akapulu. Kuopau ke to’o he ‘akapulu ‘a e taimi, pa’anga, fakakaukau ‘a e kau Polisi mei he honau tefito’i fatongia totonu pea ‘e toe palopalema ange ‘enau fakahoko fatongia.
Ko e tu’unga lolotonga ‘oku ‘osi palopalema pea ko’ene toe huu mo e ‘akapulu ‘e toe palopalema lahi ange. ‘Oku ‘ikai foki ke fai ha lau ia kapau na’e fakafiemalie pe ‘enau fakahoko fatongia. ‘Oku toutou ‘ohake ‘a e ‘ikai tokolahi fe’unga ‘a e kau ngaue ‘o e Potungaue Polisi ‘o fakatatau ki he tokolahi ‘o e fonua, ka ko’eni kuo toe fokotu’u mo e timi ‘akapulu lolotonga ‘ena tokosi’i.
‘Oku ‘ikai falala’anga ki he kakai ‘o e fonua ‘a e founga hono tau’i he Potungaue ni ‘a e faito’o konatapu. ‘Oku fu’u matavaivai ‘aupito pea ‘oku fehu’ia lahi pe koeha hono ‘uhinga. Ko’euhi kuo ‘iai ‘a e kau ‘ofisa Polisi kuo faka’ilo mo e ngaue Popula ‘i he faito’o konatapu, ‘oku tui ‘a e tokolahi ‘oku kau ‘a e Potungaue ‘i he ta’efaitotonu hono tau’i ‘o e faito’o konatapu.
Ko e ngaahi keisi lahi ‘oku fehu’ia ‘enau ngaue kiai pea lahi hono tukuaki’i ‘a e kau ngaue tonu ‘a e potungaue ki he ngaue kakaa pea kuo mole ai ‘a falala ‘a e kakai kae tautefito pe ki he tau’i ‘o e faito’o konatapu.
‘i he’ene pehee leva, ‘oku totonu ke ‘asi mai ‘a e Minisita Polisi ‘o fakahoko ha fakamatala, ki ha lelei ‘e ma’u mei he kau atu ‘ena kau ngaue ki he fe’auhi ‘akapulu. Pea kapau ‘e lahi ange ‘a e palopalema he me’a lelei ‘e ma’u pea kuo taimi ke tukutaha honau ivi mo e ‘atamai ki he ngaue kuo tuku kiate kinautolu. He ‘oku kau kiai ‘a e Potungaue Polisi ko e Tamate Afi pea pehee ki he kau Sela mei Tolitoli.
