Fakahaa Billy Vunipola he ‘ikai ke ne va’inga ma’a Tonga he Ipu ‘a Mamani ‘akapulu ‘Iunioni
By: Tonga Fonua
Kuo tuku mai ‘e he fika 8 va’inga malie ‘a e Lose ‘o ‘Ingilani, ka ko e matapule Tonga ko Billy Vunipola ‘i hono faka’eke’eke ia fekau’aki mo ha’ane tafoki ‘o fakafofonga’i ‘a Tonga ko e Fonua ‘ene ongomatu’a. Ka na’e fakamahino ‘e Vunipola he ‘ikai ke ne va’inga ma’a Tonga ‘i he ngaahi ‘uhinga kehekehe.
Ko e talu ‘a e va’inga fakamuimui ‘a Vunipola ma’a ‘Ingilani ‘i he 2023 pea kuone ‘ataa ai ‘o fakatatau ki he lao ki ha taha ke fetongi mei he timi fakafonua ‘e taha ki he timi ‘e taha.
Na’e fakahaa ‘e Vunipola ‘ene polepole hono Tonga ‘i he mala’e va’inga pea mo e feitu’u kotoa pe ‘oku ‘iai. Pea pehee ki he’ene fakafofonga’i ‘a ‘Ingilani mo e fonau na’e fanau’i ia ai mo e ngaahi faingamalie kotoa ‘oku ne ma’u. Pea ‘oku ne polepole ke ui ia ko e ‘Ingilani neongo ‘oku sio mai ‘a e kakai tokolahi ‘oku ‘ikai ‘ai atu ko e tokotaha ‘Ingilani.
‘I hono faka’eke’eke, na’ane fakamahino ai na’e talanoa mo e faiako ‘a Tonga Mr. Tu’ifua pea mo e ola ‘ena talanoa. He ‘oku ne tui ‘oku ‘iai ‘a e fanau fakalotofonua ‘oku totonu kenau ma’u ‘a e faingamalie kenau va’inga mo e ‘Ikale Tahi, ‘i he fili ke ne malolo ‘ikai kau ki he ‘Ikale Tahi.
Kaekehe ko e ‘uhinga foki ee ‘oku fakahaa ‘e Billy ‘a e ‘uhinga ‘ene fili, ka ‘oku fai ‘a e vakai mei he tafa’aki ‘e malava pe ko ha ‘uhinga moia. Ko e tangata’eiki ‘a Billy ko Fe’ao Vunipola ‘oku ‘ikai sola ia ki ha taha he mala’e va’inga pea mo’enau fakafofonga’i ‘a Tonga he kau tautehina Vunipola. Pea ‘oku hangee ‘a e ‘akapulu ‘oku tukufakaholo honau hako.
Na’ane ‘osi hoko ko e CEO ‘a e Tonga Rugby Union ka na’e ‘ikai ke ola lelei koe’uhi ko e ta’efemahino’aki mo e ni’ihi he poate pea hoko kenau fakatonutonu ki he Fakamaau’anga ke tuku ai kitu’a. Na’e hokohoko atu ai ‘a e hopo he vaha’a ‘o Vunipola mo e Komiti ‘akapulu pea kuo te’eki pe ke solova ‘a e palopalema koia. Ko e fo’i vaha’a taimi na’e CEO ai ‘a Fe’ao na’e kau ia he taimi longoa’a taha ‘a e ‘akapulu. ‘i he ngaahi ‘uhinga kehekehe.
Ko e tafa’aki foki ‘e taha ko e lava atu koia ‘a Tevita Tu’ifua ko e faiako ‘a e ‘Ikale Tahi ke fakatalanoa kia Billy, ‘oku ‘ikai ko ha taha va’inga tu’ukimu’a ke faka’apa’apa mo toka’i ‘e Biily. Ke hangee ko e taimi na’e fetu’utaki ai ‘a Toutai Kefu ki he kau va’inga tu’ukimu’a kenau va’inga ma’ae ‘Ikale Tahi, ‘o hangee ko ‘Isileli Folau, Geoge Moala, Charles Piutau, Malakai Fekitoa mo e kau tangata ‘iloa he mala’e. Na’e ‘ikai Hanau toe loto ko’enau faka’apa’apa’i ‘a e faiako koe’uhi ko e tu’unga na’e
‘iai ‘ene va’inga.
‘Oku kau foki mo e ngaahi ola ‘o e ‘Ikale Tahi he’ene ngaahi feinga va’inga mai kimui ni, he ‘ikai fakafiemalie. Pea ‘i he vakai ‘a Vunipola ka hokohoko atu ai pe ola tatau ‘e hoko ia ke mole ai hono ongoongo ‘i he taimi na’e va’inga ai he Lose ‘o ‘Ingilani.
Kaekehe ‘oku tokolahi ‘a e kau va’inga Tonga tu’ukimu’a ‘oku fai sio kiai, hangee ko Richie Mo’unga, Vaea Fifita, Billy mo Mako Vunipola, Malakai Fekitoa mo e kau All Black tutuku ‘oku ‘ikai kenau toe va’inga ma’a Nu’usila. Ka ‘oku toe ‘eni pe ‘e lava ‘e he faiako Tevita Tu’ifua ‘o fakalotoa kinautolu pe ‘ikai
