KEI MALAVA NAI ‘E HE PALĒMIÁ HONO FATONGIÁ?
Tau’aki faka’ilo ngaahi pangike ‘a e pule’angá, faka’ilo e mitia.
Ko e taha eni e poini mahu’inga na’e ‘ohake ‘i he Fakamaau’anga fekau’aki mo e fefakatonutonu fakaLao he vaha’a ‘o e Pangike Fakalakalaka pea mo e Pangike Pule ‘a Tonga, kau atu ai mo hona takitaha CEO kae pehē ki hona takitaha Poate.
Ko e ongo Pangikeé ni ko e Pangike ‘a e fonuá kae pule’i mo leva’i ‘e he Minisitā Pa’angá mo e Kapinetí, ka kuó na toe fehangahangai o tau’aki faka’ilo!
‘Oku fehu’ia ai heni e kei malava ‘e he Palēmia lolotongá, Siaosi Sovaleni mo ‘ene Kapinetí ‘o tataki e pule’angá mo hono ngaahi ‘ōkaní hangē ko e ngaahi kautaha mahu’inga ki he ‘ikonōmiká.
Ko e Poate mo e kau CEO ‘o e ongo Pangiké ni ko e fili mo fakanofo ‘e he Palēmiá mo ‘ene Kapinetí o fakafou ‘i he Minisitā Pa’angá, pea ‘oku ‘i ai hona takitaha fatongia tefito kehekehe, mo fekau’aki.
Ko e Pangike Pulé ‘oku ne polisi’i e ngāue fakapangikē kotoa i Tonga mo fekau’aki mo e sēvesi pa’angá mo hono malu’i e ‘ekonōmiká, pea ko e Pangikē Fakalakalaká ‘oku fatongia ‘aki hono fakaili mo tokoni’i e ngaahi pisinisi Tonga ‘oku mahu’inga ki he Fakalakalaká mo hono fakatupulaki ‘o e ‘ekonōmiká.
Ko e feke’ike’i e ongo nima mahu’inga ko eni ‘a e pule’anga ko e fakamoveuveu lahi ia ki he ivi faka’ekonōmika fakafonuá.
‘Oku kau atu mo e mītiá hono faka’ilo ‘e he Pangikē Fakalakalaká mo ‘ene CEO o ‘eke lau miliona kau ai e kautaha ongoongo Tonga Independent, koe’uhī ko ‘enau pulusi e ngaahi fetu’utaki ko eni ‘a e Pangikeé.
‘Oku pehē ‘e Tevita Motulalo ko e taha e kau ‘analaiso fakapolitikale fakamamani lahi ‘o e Indo-Pacific Institute, “Ko e faka’ilonga mahino eni ‘a e ‘ikai malava ‘e he taki e pule’angá o ma’u e viīone taki matu’otu’a fe’unga ke leva’i e fepakipaki he’ene faha’i!”
Na’á ne pehē ko e me’a fakatu’utāmaki ki ha fonua ‘a e fepakipaki hono ngaahi sino taki faka’ekonōmiká, he te ne malava fai e maumau lahi ki he ma’u’anga mo’ui ‘a e kakaí tautefito ki he’enau tu’unga masivá.
‘Oku ne fehu’ia ‘a e kei malava ‘e he Palēmiá o taki mo pule’i ‘ene Kapinetí mo e kau Minisitaá, koe’uhī ko e tu’unga moveuveu kuo hā mei he sekitoa pa’angá.
