Tukunoa’i he Komiti Tongatapu ta’efiemalie kau Fakamaau kae hoko atu pe fe’auhi.
‘Oku fakaloloma ki he tokolahi, ‘a e tukunoa’i ‘e he Komiti ‘Akapulu Tongatapu ‘a e si’i ta’efiemalie, ‘a e komiti Fakamaau, kanau fili pe kinautolu ke hoko atu ‘a e fe’auhi ‘o faka’aonga’i pe kau Fakamaau na’e talangata’a ki he tu’utu’uni ‘a e komiti.
‘O hangee kuo lave’i he tokolahi kau manako ‘akapulu, ko e ta’efiemalie ‘a e komiti Fakamaau, ko hono taa’i ‘e ha tokotaha va’inga ‘a e ongo Fakamaau laine he kuata fainolo ‘a Kolomotu’a mo e LOB.
Na’e tu’utu’uni ai ‘a e komiti Fakamaau kenau holomui kae ‘oleva ke fakakakato mai ‘e he komiti Tongatapu ‘enau ngaahi fiema’u na’e tukuatu kiate kinautolu. Ka ko e me’apango na’e ‘omai pe tohi ia mei he Sea ‘o e komiti Tongatapu Manu Mataele ki he komiti Fakamaau, kae faka‘ikai lava ia ‘o fai ha femahino’aki hono fakakakato ‘a e fiema’u ‘a e komiti Fakamaau. Pea ‘amanaki ‘a e tokolahi ‘e toloi mo e fe’auhi ko e ‘ikai ha Fakamaau, ka na’e kei hoko atu pe ‘a e kuata fainolo ‘o huu mai ‘a e kau Fakamaau ‘o kau pe ai taha ongo Fakamaau Laine na’e taa’i pea pehee ki he Fakamaau kehe mei tu’a.
‘I he fakamatala mei he Sekelitali ‘a e kau Fakamaau Tokomea ‘Ofahulu, na’e mahino mei he talanga ‘a e kau memipa fakamaau ‘a e ni’ihi na’e fakakouna ia mei tu’a kenau angatu’u ki he tu’utu’uni ‘a e komiti Fakamaau pea ko e ni’ihi pe ‘eni ia na’e talangata’a. Pea ‘e fakahoko e tu’utu’uni ‘a e komiti kiate kinautolu.
‘Oku kei ‘asi lelei pe ‘a e palopalema ‘a e kau Fakamaau he neongo kuo fakataha’I, ka ko e ni’ihi na’e ‘i he tafa’aki ‘a ‘Eva Mafi ‘oku nau kei fakaongoongo pe kinautolu ki he feitu’u kehe.
Kaekehe ‘i he tali mei he sea ‘a e komiti Tongatapu, tenau fakapapau’i ‘a e malu ‘a e kau Fakamaau pea mo e komiti tunameni pea pehee ki ha tu’utu’uni kia Panuve Hola koe’uhi ko’ene hia na’e fakahoko. Na’e mahino he tohi ko e totongi ‘o e kau Fakamaau na’e ‘ikai ke totongi he taimi totonu ka na’e palomesi ‘a e Sea ‘e totongi ka ‘oku ‘iai ki’i taimi ki he ngaue pea toki ma’u ‘enau totongi.
Ko e toenga ‘o e ngaahi kaveinga na’e fai feinga ke fakahoko ha talanoa pea mo e CEO ‘Aisea ‘Aholelei kenau fakalelei’i kae lava ke hoko atu, ke ‘oua na’a toe hoko palopalema ‘o e kuohili, ‘a e vamama’o ‘a e komiti Tongatapu mei he komiti Fakamaau.
‘Oku mahino ‘a e feinga komiti Tongatapu ke lele pe fe’auhi, koe’uhi ko e teuteu ‘a e ngaahi timi ke ‘oua fakaloto palopalema ki he ngaahi timi. Ka ‘oku ‘ikai ‘ilo koeha na’e faingata’a ke solova ‘a e fiema’u ‘a e komiti Fakamaau, kae lava kenau ngaue fakataha ki he hoko atu.
‘I he semi fainolo ‘o e Tokonaki na’e ‘ohovale ‘a e kakai ke sio kia Afimeimo’unga, ‘oku ‘asi pe ia he mala’e Teufaiva pea ‘oku mahino na’e te’eki pe fai ha tu’utu’uni ia kiai.
Ko e palopalema mei fuoloa hono ngaahi kovi’i ‘a e kau Fakamaau ‘o tukuaki’i ki he fakamaau kakaa pea ‘oku ‘ikai ‘ilo pe ‘e toe lava ‘o solova. ‘I he taimi tatau ‘oku kei kau mo e to’onga ia ‘a e fanau va’inga (discipline) ‘i he kei ma’ulalo ‘aupito.
‘I he tui ‘a e tokolahi, ka lava ‘o hiki’i ‘a e ‘ilo mo e fakahoko fatongia ‘o e kau Fakamaau ki ha tu’unga ma’olunga ange pea teuteu’i mo ha kau Coach leleiange kenau discipline ‘a e fanau va’inga pea ‘oku ‘iai leva ha ‘amanaki lelei ki he kaha’u, ke lava ‘o fakasi’isi’i ‘a e palopalema ‘ene hoko he mala’e ‘akapulu.
