‘0si tau e fakatau twin otter Lulutai USD$6.25m pe ko e TOP $15m, palani lisi mo e vaka (ATR) he ta’u fo’ou
Kuo fakahaa faka’ofisiale ‘e he CEO ‘o e Lulutai Poasi Tei ki he ongoongo ni, kuo ‘osi tau mo fakahoko ‘a e fakatau vakapuna ‘a e kautaha, ‘a e vakapuna ‘i he kalasi ko e TWIN OTTER.
Na’ane toe fakapapau’i ki he Tonga Independent News na’e fe’unga pea mo e USD$6.25 miliona pe ko e TOP$15 miliona ‘a e fakatau na’e fakahoko.
‘I he uike ni na’e fakahuu atu ai ‘e Piveni Piukala ha tohi fokotu’u pea tali he Fale Alea ke fokotu’u ha komiti ke fakahoko ngaue ki he kautaha Lulutai, he ‘oku tui ia ‘oku ‘ikai ‘aonga ke toe lele ‘a e kautaha he lahi ‘a e maumau ki he ngaahi vaka pea ‘oku mole lahi ‘a e pa’anga ‘a e pule’anga hano toe feinga ke fakaakeake.
Na’e toe fakahuu atu mo e tohi ‘e taha ke ta’ofi mo e alelea ‘oku fakahoko ki he teu fakatau, kae ‘oleva ke fakahoko ‘a e ngaue ‘a e komiti Fale Alea. Ka kuo mahino mai ‘eni ia kuo ‘osi fakahoko ‘a e fakatau pea failaa ‘a e ngaue ia ‘a e kautaha ke hoko atu.
‘I he taimi tatau ‘oku palani ‘a e Lulutai ke lisi mai he ta’u fo’ou ‘a e vaka ‘e taha ‘i he kalasi ko e ATR pe ko e kalasi vaka ‘a e Air Fiji na’e fakahoko fatongia he vaha’a taimi na’e maumau ai ‘a e vaka SAAB ‘a e kautaha
Na’e toe fakama’ala’ala ‘e he CEO,‘Oku lahi e ngaa fokotu’utu’u ke fengaue’aki mo e kautaha fakavaha’apule’anga ke fai mo e codeshare he ngaahi fepuna’aki fakavaha’apule’anga mo tokoni ki hotau kakai. Ka ko e sitepu ‘uluaki ko hono fakalelei’i ’a e fepuna’aki fakalotofonua, ‘a ‘eni ia ‘oku kamata ko’eni’.
Koe ngaahi fakalakalaka ‘eni ia ne totonu ke fei mo fakahoko kimu’a, ka koe faingamalie ‘eni he ‘oku ‘i he malumalu ‘o e Pule’anga pea ‘oku tokoni mai ai hotau ngaahi fonua kaunga’api ke fakalelei’i mo fakalakalaka ‘etau kautaha vakapuna.”
‘Oku ‘iai e tui ko e komiti ko’eni ki he Lulutai ko e fetakai malie he ‘oku ‘osi seti atu pe taumu’a ngaue ‘a e ni’ihi ke fakangata ‘a e kautaha kae tuku ki he private sector. Na’e ‘osi fou mai ‘a e Real Tonga he me’atatau ‘onau fakalele ‘a e fepuna’aki fakalotofonua ‘aki ‘a e vaka ‘a e pule’anga. Ka na’e a’u ki he taimi kuo toe kole pa’anga mai ia ki he pule’anga lolotonga ‘oku te’eki lava ‘o totongi hono mo’ua ki he pule’anga pea mo e ngaahi noo kehekehe pe. Pea fakalalahi ko e ‘ikai fiemalie ‘a e kau ngaue ki hono fakalele ‘o e kautaha ‘o iku fakafoki ki he pule’anga. Ka ko’eni kuo toe feinga ‘a e ni’ihi ke toe foki ki he palopalema tatau.
Ko e taha palopalema ko e mamafa ‘a e tikite vakapuna pea na’e palomesi ‘a e Real Tonga tenau fakalele pea tukuhifo ‘a e totongi ka na’e ‘alu ke toe mamafa ange, na’e kau mo e ‘ikai falala’anga ‘a e vakapuna tokoni mei Siaina ko e MA60, ke fakaanga’i lahi ‘e ‘Aositelelia.
Pea ko e me’a mahu’inga taha ia he taimi ni, ko e malu mo e lele lelei ‘a e sevesi fepuna’aki fakalotofonua pea ke ma’ama’a mo e totongi tikite.
Ka ko e palopalema ia ‘oku fakatokanga’i ko e fakapolitikale’i ‘a e me’a kotoa, koe’uhi ko e kehekehe ‘a e tui fakapolitikale pea ‘e fakaanga’i ‘a e fokotu’utu’u kotoa pe ia ‘a e pule’anga pea ko e founga ‘eni ia kuo tukufakaholo he Fale Alea mo e politikale ‘a Tonga.
