Tu’utu’uni Fakamaau ke maau mai kau Fakamo’oni ‘a Lavulavu ki he Falaite.
Ko e taha ‘o e ngaahi faka’ilo ‘oku lolotonga ‘i he Fakamaau’anga ki hono maumau’i ‘o e lao fili, ko e hopo he vaha’a ‘o e tokoni Palemia Hon. Viliami Latu mo ‘Etuate Lavulavu ko e kanititeiti pe taha na’ana fe’auhi ki he sea ‘o e vahenga fili Vava’u 16.
Ka ‘i hono ui ‘a e hopo ‘i he ‘aho Tusite ‘o e uike ni, na’e kole ai ‘a e Talatalaaki ki he Fakamaau ke toloi he ‘oku te’eki ke maau ‘ene kau Fakamo’oni. Na’e tu’utu’uni ‘a e Fakamaau ke a’u ki he Falaite ‘o e uike ni kuo maau ange ‘ene kau Fakamo’oni pea ke faka’aho leva ‘a e hopo. ‘Oku ‘uhinga ‘eni ko e maau ange ‘a e tokolahi mo e fakamatala ‘ene kau Fakamo’oni tenau fakmo’oni ki hono maumau’i ‘e he tokoni Palemia ‘a e lao fili.
Ko e mahina foki ‘eni ‘e 3 mei he fili Fale Alea ka ‘oku hangee ‘oku ki’i tu’u fihi he ‘ikai ke maau ‘a e kau Fakamo’oni he taimi loloa ko’eni.
Ko e Talatalaaki foki ‘oku fatongia’aki hono ‘omai ‘o e ngaahi fakamo’oni ki he tukuaki’i, ka ko’ene tu’u pehe ni ‘oku hangee ‘oku ‘iai ha palopalema. Ka ‘i he taimi tatau ko e taha pe foki ia ‘o e tekiniki ‘o e falehopo ko e ki’i toloi kae fakama’opo’opo ka e hoko atu.
Pea ‘oku ‘ikai totonu ke to’o ma’ama’a ‘a Lavulavu he ko e tangata ia ‘oku kehe pe ‘ene fa’ahinga founga, ‘oku ‘ikai toe lava ia ’e ha taha.
‘Oku malie he ko e tokoni Palemia kuo ‘osi lou’ulu ‘i he Lao pea ‘iai ‘a e faingamalie lahi kene fakafofonga’i peia.
Kaekehe ko e vaa ‘a e ongo tangatani ko e ongo Lama pea ‘oku na vaofi fakatoto. Na’e faka’ilo ‘e he tokoni Palemia ‘a Lavulavu ‘I he 2017 ‘o halaia pea ko’eni kuo faka’ilo ‘e Lavulavu ‘a e tokoni Palemia ‘i he me’a tatau ko e maumau’I ‘o e lao fili.
Na’e ‘osi fakahaa pe ‘e Lavulavu ‘ene ta’efiemalie ‘I he ‘aho na’e fakahoko ai ‘a e fili pea pehee ki he ngaahi me’a na’e ta’efiemalie kiai, ‘o hangee ko e ‘ikai to’o ‘o e banner tu’uaki kemipeini, ko e tukuaki’I ki he lea faka’ai’ai ‘o e kau fili kenau fili he tokoni Palemia, ko hono fetuku mai ‘o e kau fili he me’alele ‘a e tokoni Palemia kae pehee ki he holo na’e fakahoko kiai .
Ko e ngaahi tukuaki’I kotoa ko’eni na’e faka’ikai’I ‘e he tokoni Palemia ka ko’ene toki ‘alu ‘eni ki he feitu’u totonu ke faitu’utu’uni ki he mo’oni.
‘Oku tu’u telinga mo e Tonga kotoa ki he faka’osinga ‘o e uike ni ki hano tukuange mai ‘o e tu’utu’uni ki he hopo ‘a e Minisita Tanaki Pa’anga mo e Kasitomu.
