Pickleball ‘a e sipoti tupu vave mo manakoa taha ‘i Mamani kau ai ‘a Tonga ni.
Kuo hoko ‘a e va’inga fo’ou na’e kamata mei ‘Amelika pea kuo ne ‘i Tonga ni ‘i he ta’u ‘e 5 kuo’osi, ko e sipoti vave taha ‘ene tupu pea mo manakoa taha ‘i Tonga ni pea mo mamani, kae tautautefito ki ‘Amelika.
Ko e pikapolo ko hono fakatahataha’i ia ‘o e sipoti tenisi, pingipongo pea pehee ki he pekimingitoni.
Ka ‘oku to e makehe ange ‘a e va’inga pikapolo, koe’uhi ko hono mala’e ‘oku lahi fe’unga ia ki he va’inga ‘a e ta’u iiki ‘o a’u ki he ta’u matu’otu’a taha. Ko hono pate ‘oku toe si’isi’i ange ‘o faingofua ki he tokotaha kotoa ha fa’ahinga ta’u pe pea ko hono pulu ‘oku ma’ama’a ange ki hono faka’onga’i ki he va’inga.
Ko e lahi ‘o e mala’e ‘oku fute 44 hono loloa pea fute 20 hono falahi pea ‘oku natula tatau pe mo e mala’e tenisi hono vahevahe fakalaine ki he taimi va’inga.
Ko e lao ‘o e va’inga ‘oku ki’i faingata’a he kamata ‘o tatau pe mo hono fakamaau’i ‘o e va’inga, ka ko’ene fuoloa pe ‘oku faingofua ki he tokotaha kotoa.
Fakatatau mo e fakamatala ‘oku ma’u he ongoongo ni, na’e fuofua ‘i Tonga ni ‘a e va’inga ni ‘i he 2019, ‘o kamakamata lele holo pe he ngaahi mala’e va’inga ‘a e siasi LDS. Na’e ‘alu pe taimi mo’ene manakoa pea kuo lahi ‘a e ngaahi kolo kuo fokotu’u ai ‘a e ngaahi kalapu pikapolo pea toe manakoa ange ‘a e ngaahi fe’auhi, ‘ene tokolahi pea toe leleiange ‘a e pale mo hono fakalele.
Fakatatau pea mo e Sports & Fitness Industry Association (SFIA) na’e laka hake ‘i he toko 8.9 milionna na’e va’inga pikapolo ‘i ‘Amelika ‘ata’ataa pe ‘i he 2022. Ko e liunga ua ia hono tokolahi mei he ta’u 2021 na’e fe’unga pea mo e toko 4.8 miliona pea ko e hiki 158.6% ‘i he ta’u ‘e 3 kuo ‘osi.
Na’e kamata hono ‘ilo’i ‘o e va’inga pikapolo ‘e ha kau tangata, folau maloloo ‘eve’eva ‘i Bainbridge Island ‘i Seattle ‘i he 1965.
‘I Tonga na’e fakafuofua ki he ngaahi ta’u mai 2010 tupu, na’e ha’u ai ‘a e kainga Tonga nofo ‘Amelika mo e va’inga ki Vava’u ‘onau va’inga mo e to’utupu, ka ko’enau foki pe pea ‘ikai toe hoko atu.
Ka ‘i he’ene a’u mai ki he ta’uu 2019, na’e ‘iai ‘a e kau Tonga mei ‘Amelika na’anau feinga mai ki Tonga ni, ‘o kamata ngaue ai mo e tokotaha ‘oku ‘iloa lahi he kakai Tonga ki hono tau’i ‘o e ifi tapaka mei he Potungaue Mo’ui, ka kuo ne ma’u vahenga maloloo, ko Lotu Havea mei Ha’ateiho ‘one kamata mai mo e tokosi’i ‘a e va’inga pea ne hoko ai pe ko e fuofua palesiteni.
Na’e hoko hoko mai ai ‘a Afu Fineanganofo ko e palesiteni pea na’e huu ai ‘a e pickleball ‘o memipa ‘i he TASANOC.
Ka ‘i he fili lakanga ‘o e ta’u ni kuo’osi na’e fili ai ‘e he ngaahi kalapu ‘a Semisi Sika ko e palesiteni fo’ou ‘o e pikapolo ‘i Tonga ni.
Ko e ngaahi fea’uhi na’e ‘ikai ke fu’u loko tokolahi mo sai hono pale, he na’e meimei ke $100 pe mo $200 ‘a e ma’olunga taha pea ko e lahitaha ko e fakalele pe ‘e he komiti.
‘I he 2022 na’e huu mai ‘a e Kalapu Pikapolo Peauma’a mei Ha’alalo, ‘onau hiki’i ‘a e tu’unga ‘o e va’inga ki he levolo ma’olunga taha, ‘aki ‘a e hiki’i ‘a e pale ki he $500 pea mo e tokolahitaha ‘o e kau va’inga na’e kau mai kiai. Ko e founga hono fakalele na’e ‘i he tu’unga ma’olunga mo e maau pea ko e ma’olunga taha ia kuo a’u kiai ‘a e fe’auhi ‘i Tonga ni.
Kaekehe, ‘i he huu mai ‘a Misi Sika, kuo ne tukupaa ai ke ne ‘ave ‘a e va’inga ni, ki ha tu’unga ma’olunga ange pea ‘oku ne faka’amu he ‘ikai ke toe fakapolitikale’i ‘a e sipoti ni, kae ‘aonga ‘ene tokoni.
‘I he ‘aho 7-11 Sune, na’e lele ai ‘a e fe’auhi ‘a e komiti Pikapolo ‘a Tonga pea ko e tokolahi taha ia kuo ‘iai he na’e a’u ki he kau va’inga ‘e 200 tupu ‘o tatau pe ‘a e va’inga tauhoa (double) mo e hoa tokotaha (single) mo e hoa (mix)
‘I he fakatu’unga ‘o e va’inga, ko e level 3 ko e kamakamata ia, ko e level 4 ko e tu’unga ia kuo poto he va’inga pea ko e level 5 ko e kau matiketika ia he va’inga.
‘i he fe’auhi ‘a e level 5 ‘i he tauhoa (double) na’e ikuna ia ‘e Tupou Palu mo Hiva Tongatu’a mei he kalapu Ha’apai, fika ua ‘a Filipe Huni mo Feleti Sevaki mei he kalapu Va’ingaola mei Halaleva pea fika 3 ‘a ‘Etuate Toutai mo Taniela Fonua mei he Kalapu Peauma’a mei Ha’alalo.
Ka ‘i he va’inga tautau tokotaha, na’e ‘ikai toe alea ha taha ia pea mo Filipe Huni, he ‘oku ‘iai hono hisitolia ‘i he va’inga tenisi ‘one fa’a fakafofonga’i ‘a Tonga he ngaahi fe’auhi lahi. Ka ‘i he tauhoa ‘o e tamaiki fefine he level 5, na’e hamusi ia ‘e Lu’isa Pasi mo Pua Pepa mei he kalapu Fisi’isaafa mei Nualei. Ko e ongo fafine ‘eni ia ‘oku na to e pukepuke ‘o e hau he sipoti pingipongo ‘i Tonga ni pea ko e ni’ihi na’e va’inga tenisi mo pingipongo, ko e ni’ihi ia ‘oku vave taha ‘enau poto he va’inga pikapolo, koe’uhi ko’enau natula tatau.
Ko e tu’u leva he taimi ni, ‘oku teuaki atu ‘a e komiti mo e kau va’inga ‘i Tonga ni, ke tali ‘a e tokolahi ‘o e kau va’inga pikapolo mei ‘Amelika, ‘Aositelelia mo Nu’usila, tenau folau mai ki he katoanga ‘a e Kolisi Tutuku Liahona. ‘Oku ‘ikai ha toe fe’auhi kehe ia he polokalama kolisi tutuku ‘a Liahona, ka ko e pikalapolo ‘ata’ataa pe pea ‘oku tui ‘a e tokolahi, kuo hanga ‘e he va’inga ni ‘o tamate’i ‘a e tenisi mo e volipolo he fonua ni ‘i he manakoa ki he kakai ‘o e fonua.
‘Oku a’u ki he ta’u 70 ‘a e motu’a taha kuo kau ki he fe’auhi ko Sepiuta Niutupuivaha mei Havelu pea koe si’isi’i taha ko Tevita Kupa Fonua mei Ha’alalo ko e ta’u 10.
Kuo kamata ‘a e folau mai ki he katoanga pea ‘oku ‘iai ‘a e ngaahi kalapu mei ‘Amelika tenau folau mai ‘o ‘uluaki va’inga fakafeohi mo e ngaahi kalapu ‘i Tonga ni kimu’a pea toki fakahoko ‘a e fe’auhi kolisi tutuku pea ‘oku hanganaki atu kiai ‘a e tokotaha kotoa.
