Hoko fakalelei konisitutone 2010 ko e matapa ki he kumi mafai (VONC)
Ko e popoaki ia ‘oku talamai pea ‘ikai ke toe lava ‘o faka’ikai’i ‘i he hili ‘a e fakalelei fakakonisitutone ‘o e 2010, kuo hoko ia ko e matapaa mo e founga ke taufusi ai ‘a e kau politikale ‘o e fonua ki he mafai pule.
Pea mei he 2010 ki he ta’u ni (2023) ko e ta’u ia ‘e 12 ko e fili lahi ia ‘e 4 pea ko e fokotu’u Fili Ta’efalala’anga (VONC) ai pe he fili kotoa.
Ko e fili ‘o e 2010 na’e fuofua hoko ai ‘a Lord Tu’ivakano ko e Palemia fili ‘o Tonga, ka na’e hili pe ‘a e mahina ‘e ono na’e fakahuu atu ‘e he Paati Fakatemokalati ‘Otumotu Anga’ofa ‘enau tohi fokotu’u ke fakamaloloo’i ‘a e Palemia ka na’e ‘ikai ke ola lelei, he na’e kei fa’utaha ‘a e kau nopele pea mo e ni’ihi tokosi’i mei he kau Tau’ataina na’anau pule’anga he taimi koia.
‘I he fili ‘o e 2014 na’e fili ai ‘a Samueal ‘Akilisi Pohiva mei he paati PTOA ke ne hoko ko e Palemia fili. Pea ‘oku ikai ke ‘uhinga ia na’e ikuna he PTOA ‘a e fika kenau hoko ai ko e pule’anga, ka na’anau fengaue’aki mo e kau fili Tau’ataina ‘o kau ai ‘a e Palemia lolotonga, Hu’akavameiliku, Fe’ao Vakataa, ‘Etuate Lavulavu pehee kia Vuna Fa’otusia, kenau ma’u ai ‘a e fika ke fokotu’u pule’anga. Ka ko e me’a tatau na’e hoko, ko e ‘osi ‘a e mahina ‘e 6 kuo fakahuu atu he tafa’aki ia ‘a e kau nopele mo e ni’ihi na’e kei poupou ki he fa’unga motu’a ‘enau fokotu’u VONC, ka ko e ola tatau pe na’e ‘ikai ola lelei.
Kaekehe na’e hoko heni ‘a e me’a fakahisitolia ko e fuofua taimi ke veteki (dissolve) ai ‘e he Tama Tu’i ‘a e Fale Alea ‘o Tonga ‘i he 2017 pea to e fakahoko ‘a e fili lahi fo’ou, ‘o toe ikuna pe ia ‘e he paati PTOA ‘o to e hoko atu ‘a ‘Akilisi ko e Palemia pea mo Misi Sika ko e tokoni, ka na’e ‘iai ‘a e fakakaukau ‘e holo honau manakoa hono veteki honau pule’anga. Lolotonga foki ‘a e pule’anga ‘a e PTOA na’e ‘iai ‘a e movetevete ‘o tukuhifo ai ‘a Sovaleni mei he tokoni Palemia pehee kia Fe’ao Vakataa mei he lakanga Minisita pea tu’utu’uni Fakamaau’anga ke mole ‘a e lakanga Fakafofonga Fale Alea ‘o ‘Etuate Lavulavu na’e hoko ko e Minisita MOI.
‘I he pekia ‘a ‘Akilisi ‘i Sepitema 2019 na’e to e mata ‘a’aa ange ‘a e taufusi ki he mafai pule ‘a e movete ‘a e ‘ene kapineti pe kohai ‘e Palemia. Na’e ‘ikai ke toe mahu’inga kiate kinautolu ‘a e ngaahi tefito’i tui ‘a ‘Akilisi pea mo e PTOA kanau tau’aki fusi mafai ‘o iku ke mole ‘a e pule’anga mei he PTOA ‘o hoko ai ‘a Pohiva Tu’i’onetoa ko e Palemia ‘o fokotu’u ai ‘a e paati fo’ou ko e Paati ‘a e Kakai ‘o kau atu kiai mo e kau Tau’ataina kehe hangee ko Sovaleni, Paoasi Tei mo e ni’ihi kehe pe, kenau faka’osi ‘a e teemi fili ko e ta’u ‘e ua ki he fili lahi.
Ko e fo’i vaha’a taimi ‘o e ta’u ‘e 2 pea fakahoko ‘a e fili lahi, kuo ‘osi nasinasi ‘a e ni’ihi ia na’e kau fakataha mo Tu’i’onetoa he pule’anga, kenau liukava’i ‘a e pule’anga kanau fokotu’u pule’anga fo’ou kinautolu, ‘o taki’i mai pe ‘e he Palemia lolotonga Hu’akavaliku mo’ene kau naite na’e ofi kiai.
Ko e teu ‘a e fili Fale Alea lahi ‘o e 2021, na’e too ai ‘a e folofola mei he Taloni ki he kakai ‘o e fonua kenau fili fakapotopoto. Ko e ola ‘o e fili ‘o Novema 2021, na’e ‘ohovale ‘a e tokolahi he too lalo ‘aupito ‘a e paati PTOA, ko e sea pe ‘e 4 na’anau ma’u kae ma’u he kau tu’u tau’ataina ‘a e sea ‘e 13 fakataha pea mo e kau nopele ‘e toko 9. Pea na’e ‘iai ‘a e ‘amanaki lahi ‘a e kakai ‘o e fonua ki ha pule’anga malohi mo lelei mei he fu’u kakai lelei mo poto na’e fili he kakai ‘o e fonua. Ka na’e tuenoa kotoa ‘eni ‘i he tau’aki feinga ki he mafai pule. Na’e hanga ai ‘e he Palemia lolotonga ‘o fusi’i atu ‘a e kau PTOA fakataha mo e konga ‘o e kau tu’u Tau’ataina fakataha mo e konga ‘o e kau nopele pea ko e toki hoko ha me’a fakahisitolia ke movete ‘a e fili ‘a e kau nopele. Ka na’e tui ‘a e kau ‘analaiso politiki, ko e movete pe fili ia kau nopele ko e too kovi ‘a e PTOA pea ‘e tatau ai ki he kau nopele kohai ‘e pule’anga ko e koloa pe ‘oku ‘ikai ko e PTOA.
Kaekehe na’e ‘ikai tukunoa’i he PTOA ‘a e fili Fale Alea kanau hoko atu ki he Fakamaau’anga o tuku ai kitu’a ‘a e toko 3 he pule’anga, lolotonga ‘enau ‘i he Kapineti, ‘o toe huu mai ai ‘a e toko 3 he PTOA fakataha mo e pekia ‘a e toko 3 kehe he kau Minisitaa mo e Palemia maloloo.
Pea ‘i he Falaite ‘o e uike ni, na’e tuku faka’ofisale mai ai ‘e he ‘ofisi ‘o e Sea Fale Alea, kuo fakahuu atu ‘a e tohi fokotu’u ke tukuhifo ‘a e pule’anga ‘o Hu’akavameiliku pea ‘oku ‘oatu ‘a e faingamalie ke ‘omai ha’ane tali kimu’a he ‘aho 1 Sepitema pea ‘e toki faka’aho ‘a e taimi ‘o e fale ke talanga’i ‘a e fokotu’u.
‘Oku toe faka’ohovale lahi foki ‘a e mahino ‘oku ‘iai ‘a e tokoua mei he tepile ‘o e kau nopele Lord Tu’ivakano mo Lord Nuku, ‘oku na kau he toko 10 na’e fakamo’oni hingoa ki he tohi fokotu’u. ‘Oku faka’ohovale he ‘oku kau lahi ‘a e paati PTOA ki he fokotu’u ko’eni, ‘aia ‘oku ‘ikai ke felatani mo e kau nopele ka ko’eni kuo kehe ‘a e talanoa pea ‘e ‘alu ke toe malie ange.
Ko e toko 4 mei he PTOA, Piveni Piukala, Kapeli Lanumata, Mo’ale Finau mo Mateni Tapueluelu. Ko e toko 4 mei he kau Tauataina, Dr. ‘Aisake Eke, Dr Taniela Fusimalohi, Dr. ‘Uhilamoelangi Fasi pea mo Vatau Hui. Pea ko e fo’i pate malie heni, ka tafoki ‘a Saia Piukala mo Veivosa Taka fakataha mo e ongo nopele na’e tu’u fakataha mo Tu’ivakano mo Nuku he fili Palemia na’e toki ‘osi pea ko’ene lava ia ‘etau fili VONC.
‘Oku malie foki ‘a e ngaahi feliliuaki ‘a e politiki ‘a Tonga, he ‘oku mahino mai ‘oku ‘ikai lava ‘a e me’a ia ko e ngaue fakataha he Fale Alea, ka ‘oku tau’aki feinga kohai ‘e Palemia mo Minisita. Pea ‘oku makatu’unga ia mei he liliu fakapolikale ‘o e 2010. Na’e mahino ni’ihi na’e poupou ki he Tu’i mo e PTOA ka ko e ‘aho ni kuo fio fakataha mai pe PTOA, kau nopele pea mo e Tau’ataina pea ko e feinga kotoa pe ki he mafai, ka ‘e fefe nai ‘a e kakai ‘o e fonua.
