Tu’utu’uni Fakamaaau Polisi ke kei tauhi pe ‘Asiata hili ‘ene fuofua haa he Fakamaau’anga
Kuo tuku mai he Potungaue Polisi ‘a e fakamatala tukuatu, ki he tu’utu’uni ‘a e Fakamaau’anga Polisi he ‘aho Monite ke kei hoko atu pe hono tauhi ‘o ‘Asiata Masima ‘o Ha’ateiho hili hono puke he kau Polisi ‘i he Falaite uike kuo’osi.
Kuo taa tikite ‘a ‘Asiata ki he tikite ko e feinga teuaki fakapoo, hili ‘ene tuku atu ‘ene vitio ‘o fakamatala ki he teu ke ne fakapoongi ‘a e taki ‘o e TUU Pita Pua. Ko e vitio lea fefeka ‘aupito na’e fakahokoo he Faka’iloa ‘o mahino ai ‘ene ‘ita mo e fepolepolei fakapolitikale.
Ka ko e pango na’e fu’u too kitu’a ‘a e vitio ‘a ‘Asiata ke a’u ki he ‘elemeniti ‘o e hia teuaki fakapoo ke puke ai he kau Polisi.
Na’e fakahaa he ongoongo tatau ‘e malava ke ‘iai mo e ngaahi tikite kehe ‘e ala faka’ilo kiai ‘a e Faka’iloa ‘o fakatatau mo e hia na’ane fakahoko pea pehee ki he fakatotolo ‘oku lolotonga lele.
Pea ‘oku ‘iai mo e fakatokanga ki he kau talanga fakapolitikale ‘i he facebook, he ‘ikai ke tali he Potungaue ha fa’ahinga talanga ‘oku ne fakatupunga ha moveuveu, ‘o tatau ai pe ko fe feitu’u ‘oku fakahoko mei ai.
‘Oku te’eki mahino kohai na’ane fakafofonga’i ‘a ‘Asiata, he ‘oku tokolahi pe kau loea kau ai ‘a Piveni Piukala neongo ‘oku ‘ikai ha’ane laiseni ngaue fakalao.
Ko e hia ko’eni ‘oku tukuaki’i kiai ‘a ‘Asiata ko e hia mamafa pea ‘oku fakamaau’i ia ‘i he Fakamaau’aga lahi pea ‘oku ‘iai ‘a e tui ko e fakakakato pe ‘a e ngaue ‘a e Fakamaau’anga Polisi kae paasi ki he Fakamaau’anga lahi. Pea kuopau kia ‘Asiata ke kumi ha’ane loea lelei ‘aupito ke taukave’i ia, he ka halaia ‘oku mahino ‘e fefeka hono tautea.
Ka ‘oku ‘osi talaki foki ‘e he PTOA ia ‘enau mateuteu ke tokoni’i fakapa’anga ‘a e hopo ‘a ‘Asiata pea tokoi’i mo hono famili he taimi ko’eni hono tauhi he kau Polisi. ‘Oku ‘iai mo e feinga ke malu’i ia kitu’a, ka ‘e mahino ‘e ta’ofi ia ke toe fakahoko hane hiki vitio ‘o fakamatala ki he ngaue Fakamaau’anga ‘oku fakahoko kiai, hili hono faka’ataa ia kitu’a ke tali ki he’ene hopo.
