Tautea ngaue popula fa’ee ki he kaiha’a $144,660.00 mei he Luna’eva
Kuo tautea ngaue popula ‘e Fakamaau Lahi CJ Cooper ‘a e fa’ee ko Fokikovi Lauaki ki he ma’u ha pa’anga ‘i he founga kakaa, na’e fe’unga pea mo e $144,660.00 kotoa ‘a e pa’anga na’ane kaiha’asi mei he kautaha.
Pea kuo tu’utu’uni ai ke ne ngaue popula ‘i he ta’u ‘e 3 mo e mahina ‘e 2, kae toloi ‘a e mahina ‘e 12 fakamuimui ‘i he ta’u ‘e 2 pe ko e malu’i angalelei fakasi’isi’i tautea.
Ko e tautea ‘eni ‘a e Faka’iloa ki he ngaahi tikite kehekehe ‘o e ngaue kakaa na’ane fakahoko lolotonga ‘ene ngaue ki he kautaha Luna’eva. Na’ane tali halaia ‘i he ‘aho 1 Sune 2023 ki he ngaahi tukuaki’i.
Na’ane kamata ngaue he kautaha ‘i Ma’asi 2020 ki Sanuali ‘o e 2023. Na’e ako’i ia ki hono ngaue’aki ‘o e misini EFTPOS ‘a e kautaha. Pea mei Sanual ki Sune 2022, na’ane hanga ai ‘e ia ‘o fakahuu ki he’ene ‘akauni fakataautaha ‘a e pa’anga ‘e $81600.00, ko e ngaahi deposit kehekehe ia ‘e 12 na’ane fakahoko mei he misini EFTPOS ki he’ene ‘akauni. Pea mei Siulai ki Sepitema 2022 na’ane toe fakahuu ai ki he’ene ‘akauni ‘a e $63000 ko e fo’i fakahuu ia ‘e 7 pea ko e taha ai na’e fe’unga pea mo e $18000. Pea ko e $10000 leva na’e fakahuu ia ki he ‘akauni ‘a e tuofefine ‘a hono fakasuva.
Kaekehe na’e fakatokanga’i ‘a e ngaue kakaa ni ko e fakatau na’e fakahoko ‘i he fale koloa ‘a e kautaha pea ‘ikai ngaue ‘a e misini pea fakahoko ‘a e fetu’utaki ki he pangikee ‘o makatu’unga ai hono ‘ilo. Na’e hoko ‘eni ke fetaulaki ai ‘a e kautaha mo e mole lahi pea mo e palopalema hono fakalele ‘o e kautaha, ‘o hangee kuo faifunga mai ‘a e palopalema ‘i he palopalema.
Ko e taha ‘o e lipooti fakaloloma mei he ‘ofisa malu’i angalelei, na’e kaunga lahi ‘a e fakahoko he Faka’iloa ‘a e hia mei he ‘atakai hono famili. Na’e nofo fakamali mo e tokotaha na’e ‘ikai ngaue pea famili tokolahi kae fiema’u pa’anga ma’u pe ki he fiema’u ‘a’ana kau ai hono famili kae pango’aki ‘a e fiema’u ki he tapaka, olokaholo mo e faito’o konatapu. Pea na’e hoko ‘a e holi hono fakasuva ke si’i too ai hono ofa’anga ki he faingata’a lahi ko e ngaue popula.
Kaekehe kuo tokolahi ha kau ngaue ‘o a’u ki he kau ngaue pangikee ‘i he ngaue popula ko e me’a tatau ‘i he fiema’u pa’anga ‘o lahi ange he vahe ‘oku ma’u pea nau iku ke fakahoko ha ngaahi ngaue kakaa kenau mo’ua ai he Fakamaau’anga.
