Ngaue popula matapule ki he taa fakalavea lahi mo e faitaa’i fakalielia hono kaume’a ‘o pousi he facebook.
Kuo tautea ngaue popula ‘e he ‘Eiki Fakamaau Lahi ‘a e matapule mei Vava’u (ka ‘oku ‘ikai fakahaa ‘a e ngaahi hingoa ‘i he tu’utu’uni Fakamaau’anga) , ki hono taa fakamamahi’i pea toe faitaa’i ngaahi ‘ataa ta’efe’unga hono kaume’a ‘o pousi ‘i he ‘initaneti.
Ko e tikite ‘e ua na’e faka’ilo kiai ‘a e Faka’iloa,
- Pa’usi’i fakalielia mamafa, ‘o fakatatau ki he Lao Hia 124(3) Lao ki he Hia.
- Ko e maumau’i ‘o e lao ki he faka’aonga’i hala ‘o e ‘initaneti ki he hia ‘initaneti.
Ko e tautea ‘o e Faka’iloa ki he tikite ‘uluaki ko e ta’u ‘e 2 pea ta’u ‘e 1 ki he hia hono maumau’i lao ki he ngaue hala’aki mitia fakasosiale. Na’e to’o pea mei ai ‘a e mahina ‘e 6 ko e vaha’a taimi hono tauhi ‘o e Faka’iloa pea malu’i angalelei pea mo e ta’u kakato ‘e 1.
Ko e taimi leva ke ngaue’i ‘e he Faka’iloa ko e ta’u 1 mahina ‘e 6 pea ‘iai mo hono ngaahi makatu’unga, ‘o hangee he ‘ikai ke ne toe fakahoko ha hia pea ke ne kau atu ki he ngaahi ako makehe.
Ko e hisitolia ‘o e hia na’e fakahoko, ko e Mamahi ‘oku ne kei ta’u 24 pea ‘i he ‘aho 1 Siulai 2022 na’e fetu’utaki ai ‘a e Faka’iloa ki he Mamahi ‘o fakaafe’i kenau ma’u kava malohi he poo koia. Pea na’e loto kiai ‘a e Mamahi pea te ne ha’u pea mo hono kaunga fefine kenau ‘alu ‘o ma’u kava malohi.
Na’e uta ‘e he Faka’iloa mo hono kaunga tangata pea fakaafe’i he Mamahi mo hono kaungame’a ‘onau ‘alu ‘o fakahoko ‘enau ma’u kava malohi he taha e ngaahi kolo ‘o Vava’u, ‘o a’u ki he 4 hengihengi pea ‘alu ‘a e kaungatangata ‘o e Faka’iloa ‘o mohe kau ‘alu ‘a e Faka’iloa mo e Mamahi ki he ‘api hono kaunga fefine ke ‘omai hono vala.
Na’e hifo ‘a e Mamahi mo hono kaungame’a ki he fale, kae tuku ‘ene telefoni ‘i he me’alele. Lolotonga ‘ena ‘i he fale kuo tatangi ‘a e telefoni ka na’e ‘ikai tali ia he Faka’iloa pea taimi si’i mei ai na’ane taa’i fakafoki ‘o tali mai he tamasi’i pea ‘eke atu pe kohai pea ne pehee ko e fika hala.
‘I he foki mai ‘a e Mamahi na’e tuki’i ‘e he Faka’iloa hono telinga mo talaange, na’ane ‘osi tala ke ‘oua na’ane ‘ave ‘ene fika telefoni ki ha taha. Ka na’e puke ‘e he kaunga fefine ‘o e Mamahi.
Na’anau ‘alu ki he ‘api ‘e taha ‘o hifo ai ‘a e Faka’iloa ‘o toho ‘a e Mamahi kitu’a mei he me’alele pea taa’i ‘aki e va’akau ‘a hono ‘ulu ‘o fakaheka ki he’ene me’alele ‘a’ana ‘o ‘ave ki he ‘api ‘o e Faka’iloa. Na’e hoko atu hono taa ‘aki ‘a e va’akau ka na’e pale ‘aki he Mamahi hono nima pea toe tuki’i ‘o pongia ‘a e Mamahi. Na’e pii’i’aki ‘a e kane vai ‘o toe ake.
Na’e hoko atu Faka’iloa ‘o lau ‘a e ngaahi tohi he messenger ‘a e Mamahi pea ne talaange te ne faitaa’i ta’evala ia ‘o ‘ave ki hono ngaahi kaungame’a. Pea ko e me’a ia na’ane fakahoko ko e vete hono vala ‘o fakahoko ‘a e anga fakalielia mo faitaa’i ‘o send ki he tokotaha na’e taa mai ‘o talaange kiai ‘oku lolotonga fakahoko ‘ene mohe mo hono kaume’a.
Ko e ‘osi ia na’ane fakamanamana’i ke vakai na’a feinga hola te ne kumi ‘o tamate’i pea mavahe ia. Na’e ma’u he Mamahi ‘a e telefoni ‘o taa ki hono mehikitanga ‘o fakamatala kiai ‘a e me’a ‘oku hoko. Na’e lipooti ai pe ki he kau Polisi ‘onau hangatonu ki he ‘api ‘o e Faka’iloa. Na’anau a’u atu kuo ‘iai ‘a e Faka’iloa ‘o ‘eke atu ‘a e Mamahi ka na’ane loi pea feinga ‘a e kau Polisi kenau huu ki he fale, ka na’e talaange he Faka’iloa ‘oku ‘ikai ke ‘iai ‘a e Mamahi pea ‘oku ‘ikaii hanau totonu kenau huu ange ki hono fale. Ka na’e fakahaa ange he kau Polisi ‘oku ‘iai ‘enau tohi ngofua pea vete hia ‘a e Faka’iloa ko e Mamahi ee hono loki.
Na’e leleaki’i ‘a e Mamahi ki falemahaki kae puke ai pe he kau Polisi ‘a e Faka’iloa ‘o fakahuu pea taa ‘ene tikite kuo tukuaki’i kiai.
Na’e fakahoko ‘ene hopo he ‘aho 23 Ma’asi 2023 ‘o ne tali halaia hili ‘ene ‘uluaki fakahaa ‘e tali tonuhia.
Na’e toki fakahoko hono hilifaki tautea ‘i he ‘aho 19 ‘Epeleli ‘o tu’utu’uni ke ne ngaue popula he ta’u ‘e taha mo e konga.
‘Oku kau foki ‘a e taa fakamamahi he palopalema lahi ‘i Tonga ni ka ‘oku mahino mai ‘oku ‘ikai pe ke ‘iai ha’ane holo.
- Tonga Fonua
