‘Osi mo e poto pule’anga lolotonga hono fakalele Lulutai, ‘ikai ha toe felave ‘ikai fie fakalele ‘e ha kautaha
Ko e kautaha vakapuna ‘a e pule’anga ko e Lulutai ko e taha ia ‘o e kaveinga talanga’i lahi taha he fonua ni, ko’euhi ko e ‘ikai sai ‘a e sevesi pea mo hono ngaahi mo’ua fakapa’anga. Na’e fakaanga’i lahi ‘e he pule’anga lolotonga ‘a e founga fakalele ‘o e Lulutai ko e lahi ‘a e fakamole kiai.
Ka ‘i he taimi tatau fakatatau mo e fakamatala ‘a e Palemia maloloo ki he ongoongo ni, na’e ‘iai mo e palani noo ‘a e kautaha ke fakatau’aki ha vakapuna kae lava ke ma’anu. Ka ko e me’a pango na’e huu mai ‘a e pule’anga fo’ou ‘o ta’ofi kotoa ‘a e fokotu’utu’u na’e fakahoko he pule’anga motu’a.
Na’e ‘iai leva fakakaukau ‘e huu mai ‘a e pule’anga fo’ou mo ha fokotu’utu’u fo’ou ke solova ‘aki ‘a e palopalema. Na’anau tuku kitu’a ‘a e CEO Poasi Tei kae fakahuu mai ‘a Tevita Palu mei he Palu Aviation ke le’ole’o. Ko e taimi nounou kuo fakahaa fiefia ‘e he pule’anga kuo lele kotoa ‘a e ‘uu vaka na’e maumau pea ngali kuo solova ‘a e palopalema. Na’e ‘ikai toe fai ha tokanga ki he kaveinga ni, ta koaa ko e fo’i mihi faka’osi pe ‘a e Lulutai ‘o ake mai kae si’i teu hono me’a faka’eiki.
Na’e faka’ohovale hono fakahaa ‘e he Minisita ki he ngaahi pisinisi ‘o e Pule’anga Hon. Piveni Piukala ki he kau Faiongoongo ‘i he Falaite, ko e tu’unga ‘oku ‘iai ‘a e Lulutai ko e lele pe ke vahe kau ngaue mo ngaahi ‘aki a e vakapuna ‘o ‘ikai ha tupu ‘e ma’u. pea toe fakaloloma ‘aki ko e ‘ikai ha kautaha ia tenau fiema’u kenau fakalel ‘a e Lulutai koe’uhi ko hono tu’unga fakapa’anga mo me’angaue ta’epau.
Kaekehe ‘oku hoko ‘o mo’oni ‘a e lau ‘a e Palemia maloloo, ko’enau fetakai holo ko’ena tenau toe foki mai ki he fokotu’utu’u na’e palani he CEO maloloo, ko e fili fakapotopoto taha ko e noo ke kumi ha ngaahi vaka pea taa he mahu’inga fakapotopoto kae tanaki ha pa’anga fe’unga ‘a e kautaha.
‘Oku toe fakatupu fifili ko hono ‘uluaki fakahaa ‘oku ‘iai ‘a e ngaahi kautaha ‘oku nau fie fakalele ‘a e Lulutai, ka ko’eni kuo kehe ‘a e fakamatala.
Na’e fakahaa ‘e Hon. Piukala ko e fiema’u ia ‘a e ngaahi kautaha kenau fakalele kakato ‘a e fepuna’aki ‘o ‘ikai ha toe kaunga kiai ‘a e pule’anga. Ka ‘oku tui ‘a e pule’anga ‘oku mahu’inga pe ke ‘iai ha kaunga ‘a e pule’anga kiai koe’uhi ko e kakai ‘o e fonua. Ka ‘oku ‘ikai ‘ilo koeha ‘a e fili tenau fakahoko, he ‘oku ‘ikai ke lava ‘a e pule’anga ‘o fakalele ‘a e fepuna’aki fakalotofonua ka ‘oku ta’efiemalie ‘a e kakai ‘o e fonua ki he palopalema ‘oku hoko ‘i he ‘ikai sai ‘a e sevesi vakapuna.
Na’e ‘iai mo e kole ki he ngaahi sino tokoni hangee ko e ADB mo e pangike ‘a mamani pe koeha hanau tokoni ‘e fakahoko ki he palopalema ‘o e Lulutai. Pea ko e tu’unga ia ‘oku ‘iai ko e fakaongoongo kotoa ki ha tokoni mei muli pe ko hano fakatau ‘osi ‘e ha kautaha ‘a e Lulutai ‘o fakalel,pe ko e foki ki he fokotu’utu’u na’e fakahoko ‘e he pule’anga motu’a ko’enau noo ‘o fakatau ha vaka ke ne fakahoko ‘a e fakahoko fatongia kae kei nofo pe he malumalu ‘o e pule’anga.
