Vakai tau’ataina ‘Ateni Seniale maloloo (‘Aminiasi Kefu) ki he ngaahi tu’unga fakalao ‘o e tu’utu’uni he VONC
Koe’uhi kuo lahi ‘a e talanga ‘i he tu’utu’uni ‘a e Sea ‘o e Fale Alea ke ‘oua toe hoko atu ha talanga’i ‘o e ngaahi fokotu’u mei he kau ta’efiemalie ki he tataki ‘a e PM pea ke tukuhifo ia mei hono lakanga pea pehee ki he tali ‘a e PM ki he ngaahi tukuaki’i.
Kuo a’u ‘a e fetukuaki ki he fakalao mo e ta’efakalao ‘a e tu’utu’u ni, ke fakahaa ‘e Dr. Taniela Fusimalohi ki he ongoongo ni, ‘e ‘ave ‘a e me’a ni ki he Fakamaau’anga ke fakahoko mei ai hano vete, he ‘oku nau tui ‘oku ta’efakakonisitutone ‘a e tu’utu’uni ‘a e Sea ‘o e Fale Alea.
Ka ‘i he fale’i fakalao ‘a e Kalake ‘o e fale mo e kau fale’i fakalao, ‘oku fakalao pe ‘a e tu’utu’uni ke ‘oua toe hoko atu ha talanga, he kuo mahino ‘a e ngaahi kaveinga na’e fai ai ‘a e ta’efiemalie pea mo e tali kuo fakahoko mei he Palemia.
Kaekehe na’e feinga ‘a e nusipepa ni ki he ma’u’anga tokoni falala’anga ‘o hangee ko e ‘Ateni Seniale maloloo ‘a e pule’anga, ‘Aminiasi Kefu ka ‘oku ne lolotonga ngaue ‘i he Fakamaau’anga Lahi ‘a Nu’usila, ke ‘omai ha’ane vakai tau’ataina, kimu’a pea toki a’u ‘a e kaveinga ni ki he Fakamaau’anga pea he ‘ikai to e fai ha lave kiai kae ‘oleva kuo faitu’utu’uni ‘a e Fakamaau’anga.
Pea ‘oku ‘oatu ai ‘a e fakama’ala’ala ‘a e ‘Ateni Seniale maloloo.
Ko e Konisitutone mo e Ngaahi Tu’utu’uni Founga Ngāue
(1) Kupu 62(1) ‘o e Konisitutone ‘oku ne fakaha kuopau ke fa’u ‘e he Fale Alea ‘a e Ngaahi Tu’utu’uni Ngāue ke fakahoko’aki e ngāue e Fale.
(2) Kupu 62(2) ‘o e Konisitutone ‘oke ne fakaha ‘a e founga ke fakahu mai ha lao fakaangaanga , ha fokotu’u ke alea’i pe ko ha tohi tangi ke alea’i pea ‘e fakahoko e ngāue kihe ngaahi lao fakaangaanga, fokotu’u mo e tohi tangi koia ‘o fakatatau pea mo e ngaahi tu’utu’uni ngāue ‘o e Fale Alea.
(3) Ko e Tu’utu’uni 84F(1) ‘o e Ngaahi Tu’utu’uni Ngaue ‘o Fale Alea ‘oku ne fakaha ai ko e Sea ke ne fakahu e fokotu’u ke tukuhifo e Palemia ke alea’i ‘i he Fale Alea.
(4) Ko e tu’utu’uni 84F(3) ‘oku ne fakaha ko e founga ke fakahoko ha tu’utu’uni kihe fokotu’u ke tukuhifo ha Palemia kuopau ke fakahoko’aki ia ‘a e founga ngāue ‘oku ha ‘i he Konga 4, Vahe 3 ‘o e Ngaahi Tu’utu’uni.
(5) Ko e Konga 4, vahe 3, ;oku ne tu’utu’uni ki he founga alea pe tipeiti ‘o e Fale Alea.
(6) Ko e Konga 5, Vahe 1 ‘o e Ngaahi Tu’utu’uni Ngaue ‘o e Fale Alea, tu’utu’uni 62(1) ‘oku ne fakaha e ngofua kiha memipa ke ne fokotu’u ke fakahoko ha paloti ‘i ha fa’ahinga taimi pe lolotonga hano alea’i ‘o ha fokotu’u ‘i he Fale Alea.
(7) Ko e tu’utu’uni 62(2) ‘oku ne fakaha kuopau ke fakahoko e paloti’i e fokotu’u ke paloti ta’e to e fakahoko hano alea’i kapau ‘oku : (a) tui ‘a e Sea kuo fe’unga hono alea’i e fehu’i (i.e. fehu’i pe ‘e tukuhifo e Palemia pe ‘ikai), (b) pea kapau ‘e fai ha paloti ke tali hke fakahoko hano paloti’i e fehu’i ne alea’i, ko e tukuhifo e Palemia pe ‘ikai.
(8) ‘E fakahoko leva ‘a hono paloti’i e fehu’i ‘o fakatatau pea mo e tu’utu’uni 63 (memipa kotoa ‘oku ‘i he Fale Alea ke hikinima pe ‘ikai) mo e tu’utu’uni 65 (ko e Sea ‘e hikinima faka’osi kapau ‘e mahanga e paloti).
Ko e Me’a Na’e Hoko
(9) Na’e fiemalie pea tali ‘e he kau fakafofonga ke fakahoko ‘a e founga hono fakaha mo tali e fokotu’u fakahifo ki hono alea’i ”o e fokotu’u ke tukuhifo. Ko e kamata ia hono alea’i e fokotu’u ke tukuhifo.
(10) ‘I he hili hono fakahoko e lau e fokotu’u ‘e 46 ke tukuhifo e Palemia mo hono tali, na’e ‘oange ‘e he Sea kihe Palemia ke ne fakamalanga.
(11) Na’a ngaue’aki ‘e he Palemia ‘ene totonu ‘i he kupu 62(1), ke fokotu’u ke fakahoko hono paloti’i e fehu’i pe ‘e tukuhifo e Palemia pe ‘ikai, he na’a ne tui kuo fe’unga e lau e fokotu’u mo e tali, kae fakahoko ā ha paloti’i ke tukuhifo e Palemia pe ‘ikai. ‘Oku fakalao e fokotu’u e Palemia ia ‘i he tu’utu’uni 62(1) he ‘oku ‘atā ke ne fakahoko e fokotu’u ke paloti ‘i ha fa’ahinga taimi pe lolotonga hono alea’i e fokotu’u. na’e kamata e alea mei he kamata hono lau e fokotu’u mo e tali ke tukuhifo pe ‘ikai.
(12) Na’e hoko atu e feme’a’aki ‘oku ‘ikai totonu e fokotu’u koia.
(13) Ko e me’a leva ia ‘a e Sea ke ne fakaha ‘i he tu’utu’uni 62(2)(a) pea kuo ne fiemalei kuo alea’i pe tipeiti’i fe’unga e fehu’i. Na’a ne fakaha tu’o lahi eni kuo ne pehe kuo fe’unga e lau e fokotu’u mo e tali. Neongo na’e kei fakangofua ‘e he Sea kihe kau fakafofonga kenau toutou fakamalanga kihe fokotu’u ke paloti, na’e ‘ikai ke totonu ke fakahoko eni he ‘oku ‘ikai ngofua ke alea’i ha fokotu’u ke paloti hili e fakaha ‘e he Sea kuo fe’unga hono alea’i e fehu’i.fakatatau ki he tu’utu’uni 62(2)(a).
(14) Na’e faifai pea fakahoko leva hono paloti’i fakatatau kihe tu’utu’uni 62(2)(b) pe ‘e fakahoko hano paloti’i ‘e fehu’i ke tukuhifo e Palemia pe ‘ikai. Na’e tali e fokotu’u ke paloti’i e fehu’i, 17-10.
(15) Na’e fakahoko leva e paloti kihe fehu’i koia pea ‘ikai ke tali e fehu’i ke tukuhifo e Palemia, 14-11.
