Tu’uta ki ‘Aositelelia ‘a e vakafo’ou ‘a e Lulutai, tokoni AUS$1.4 m ‘a ‘Aositelelia ki hono fakalelei’i
Kuo tu’uta he ‘aho ni ki Aositelelia ‘a e makapuna fo’ou ‘a e kautaha vakapuna Lulutai pea mei Siaina. Ko e fakahaa ia ‘e he Palemia ki he kau faiongoongo ‘i he fakataha ‘i he pongipongi ni.
‘Oku kau ‘eni ha kaveinga talanga’i lahi mo fakafepaki’i lahi ‘e he paati ‘a e PTOA mo e kau fakaanga ki he pule’anga, ka ‘oku ‘ikai ke tuka ‘a e Pule’anga ‘i he feinga ke fakalelei’i ‘a e tafa’aki ko’eni ‘o e fefolau’aki vakapuna fakalotofonua, ko’ene palopalema ‘i he ngaahi ta’ulahi.
Ko e taimi tatau ‘a e fakahaa ‘e he Palemia ‘a e ongoongo ni, kuo toe tuku mai ‘e he ‘ofisi ‘a e Talafekau Lahi ‘a Tonga ‘i Tonga ni ‘enau ongoongo tukuatu ‘o fakahaa ‘a e me’atatau kae toe fakafiefia ange ko’enau to e tokoni fakapa’anga fe’unga mo e AUS$1.4 m ki hono fakalelei’i ‘o e vakapuna kimu’a pea toki tukufolau mai ki Tonga ni, ‘o fakafuofua ki he uike faka’osi ‘o Novema ko e feinga ke ne ma’u mai ‘a e taimi femou’ekina ‘o e fepuna’aki.
Na’e toe faka’ala’ala ‘e he tangata’eiki Palemia ‘a e ‘uhinga na’e tomui ai ‘a e tu’uta ‘a e vaka ki Tonga ni he mahina ko Sepitema, koe’uhi ko e ngaahi me’a fakalao na’e pau ke fakakakato, ‘o hangee ko e lesisita ‘o e vaka na’e kei lesisita ia ‘i Siaina pea na’e fiema’u ke fakafo’ou ‘a e lesisita, kae lava ‘o fou mai ki ‘Aositelelia mo e halanga vaka ki Tonga pea ko’ene maau ia ‘a e ngaue pea ne tu’uta he ‘aho ni.
Ko e pa’anga ki hono fakatau ‘o e vaka ko e tokoni ‘a e ‘Aositelelia pea mo e noo ‘a e Lulutai ‘i he pa’anga ‘a e Retirement Fund. Pea ko’eni kuo toe loto ‘a ‘Aositelelia ke fakapa’anga hono fakalelei’i pea ko e tokoni lahi ia ki he pule’anga. Ko e fa’ahinga tokoni peheni ‘oku toki lava pe koe’uhi ko e kautaha ‘a e pule’anga he kapau na’e fakalele fakataautaha, he ‘ikai ke tali ia ha Fonua kenau tokoni fakapa’anga.
Kaekehe na’e toe fakapapau’i ‘e he Palemia ko e tuai ‘a e vaka na’e ‘ikai ke maumau pe palopalema ‘a e totoongi, he na’e ‘osi fakahaa ‘a e founga hono totongi pea pehee ki he lahi ‘o e pa’anga na’e totongi pea ‘oku faka’amu na’e lava atu ha ni’ihi ki he vaka kenau siotonu ai, koe’uhi ko e lahi ‘a e fakaanga kuo fakahoko ki he ngaue ‘oku fakahoko.
Na’e ‘ikai loto ‘a e Palemia ke ne fakahaa ha taimi pau ‘e tu’uta ai ‘a e vaka ‘i Tonga ni koe’uhi na’a ‘ikai hoko kae fai ai ha longoa’a.
