Tuli e Palemia mo Tongatapu 5 (Dr ‘Aisake Eke) kitu’a mei he Fale Alea
Ko e taha ‘o e me’a fakaoli mo faka’ohovale pea mahalo ko e toki fuofua hoko ‘eni ha me’a pehee he hisitolia ‘o e Fale Alea ‘o Tonga ke tuli kitu’a ha ‘Eiki Palemia ‘o e fonua.
Na’e tuli fakataha ‘a e ‘Eiki Palemia, Hu’akavameiliku pea mo e Fakafofonga kakai ‘o Tongatapu 5 Dr. ‘Aisake Eke, ‘e he Sea ‘o e Komiti Kakato Lord Tu’ilakepa ko e talangata’a ki he tu’utu’uni ‘o e fale ‘i he taimi feme’a’aki.
Na’e a’u ki ha taimi kuo fakalalahi ‘a e kaikaiila ‘a e ongo memipa kae fiu hono ta’ofi pea na’e toutou fakatokanga ‘a e Sea kiate kinaua, ka na’e kei hoko atu pe ‘ena fakakikihi ‘ikai ke talangofua ki he Sea pea iku ke tu’utu’uni ai ‘a e Sea ke na kitu’a mei he fale ‘o fakamokomoko.
Na’e ‘ikai ko ha taimi lahi na’e tuli ai ‘a e ongo memipa pea na’e a’u ki he miniti ‘e 15 pea na toe foki mai, ‘ona kole fakamolemole loua ki he Sea mo e kau memipa ‘o e Fale Alea ‘i he to’onga ta’etaau na’ana fakahoko.
Ko e fakaoli taha na’e lolotonga fakamalanga ‘a ‘Eua 11 pea tuku ‘ene malanga kae fehu’i atu ki he Palemia mo Tongatapu 5 pe nana ‘osi fe’iloaki ‘itu’a ko e fakalelei ‘ena kee, ka na’e hoko ia ke ma’u ‘a e fiefia ‘a e fale hono fakapangopango’i ‘a e ongo memipa.
Kaekehe na’e makatu’unga ‘enau fakakikihi ko e hanga ‘e he pule’anga ‘o fokotu’u ke ako ta’etotongi ‘a e ako’anga pule’anga ‘o ‘au ki he form 5, ka na’e fehu’i ‘e Tongatapu 5 pe na’e ‘osi fakahoko ha’ane savea pe ‘oku fiema’u ‘e he matu’a pe ‘ikai. Ka na’e pehee he Palemia, ko e polokalama totongi ako ‘oku fakalele ‘e he MIA ‘oku fe’unga mo e toko 3000 ‘oku kau kiai pea ko e me’afua leleitaha ia ‘oku fiemau he matua ‘a e tokoni.
‘Oku fakahisitolia hono tuli ‘o e Palemia he mahalo ko e fuofua Palemia ‘eni kuo tuli kitu’a mei he fale lolotonga ‘a e ngaahi talanga. Ka ko e ‘atunga ia ‘o e politiki kuopau ke a’u ki he ngaahi tukunga pehee. Ko Tongatapu 7 kuo pahia hono fakamalolo’i pea ‘iai mo e ngaahi ngaue ‘oku toe mai kiai he me’a tatau.
