Tukuange kau Sula e Kele’a, Soni Tu’iniua mo Kolio Tapueluelu, hoko atu ki he Fakamaau Tangi
Kuo tukuange ‘e he kau Sula ‘e toko 7 he ho’ata Pulelulu 11 Sepitema ‘a e kau Faka’iloa ko e Kele’a Voice, Soni Tu’iniua pea pehee kia Kolio Tapueluelu ki hono faka’ilo kinautolu ki he lau’ikovi’i.
Ko e faka’ilo ‘eni kinautolu ki hono fakahoko henau polokalama letio ‘i he 2022, ‘o tukuaki’i ai he kau Faka’iloa ‘a Lord Sevele na’e ‘iai ‘ene tila koula mo e tangata pea tu’utu’uni ‘a Lord Sevele he’ene kei Palemia ke puke ‘a e koula he ko e koula loi pea mo e tokotaha na’ane alea he koula. Na’e toe tukuaki’i ‘e Kolio na’e fekau ia ‘e Lord Sevele ke ne fa’u ha tohi pea ‘ai ke fakamo’oni ai ha ni’ihi ke hokohoko atu hono pule’i he Sotia ‘a Tonga hili tutu ‘o Nuku’alofa ‘i he 2005.
Na’e malie ‘a e fo’i teke pate ‘a e kau Faka’iloa ke hopo’i kinautolu ‘i he Fakamaau’anga Sula. Kia kinautolu ‘oku ‘ikai taukei mo e Fakamaau’anga, ko e hopo Sula ko hono fili mai ‘a e kakai mei he Sosaieti ‘o tatau ai pe, pe na’e ako lelei pe ‘ikai ko e toko 7 kenau fakamaau’i ‘a e hopo. Pea ‘e hanga ‘e he Fakamaau ‘o fakataukei’i kinautolu he ki’i taimi nouno tenau fakamaau’i ai ‘a e hopo.
‘I he hopo ni na’e ‘uluaki fili ‘a e kau Sula mei he ngaahi kolo kehe ka na’e ‘iai palopalema pea toe ui fo’ou mai ‘a e kau sula mei he ngaahi kolo kehe. Pea ko e kau Sula ‘eni nenau fakamaau’i faka’osi ‘a e hopo ‘onau tui kinautolu ‘oku tonuhia pe ‘a e kau Faka’iloa ‘o fakatatau mo e ngaahi fakamo’oni. Pea ko e ongoongo fakafiefia ia ki he kau Faka’iloa.
‘I he taimi tatau kuo fakapapau’i ‘e he Fakafofonga Lao ‘a e Talatalaaki Tevita ‘Aho ki he ongoongo ni, ‘e fakahuu atu ‘a e tangi ‘a e Talatalaaki ki he Fakamaau’anga Tangi. He ko e ola ‘o e hopo na’e ‘iai pe ‘amanaki pehee koe’uhi ko e natula ‘o e Fakamaau’anga Sula pea kapau ko e kau Sula ko ha kakai ‘oku tui fakapolitikale tatau pea mo e kau Faka’iloa ‘e a’u pe ki he tu’unga ko’eni kuo ‘iai ka ‘oku ne faka’apa’apa lahi ki he tu’utu’uni ‘a e kau Sula, ka ‘e hoko atu ki he Fakamaau’anga Tangi ke vete faka’osi mei ai pea ko e aofangatuku ia pea koeha ola ‘o e tangi, ko’ene ‘osi ia.
Kaekehe na’e lolotonga foki ‘a e lele ‘a e hopo na’e toutou fakahaa ‘e Kolio na’ane fakafofonga’i pe ia, ‘oku ne ta’efiemalie ki hono fakahoko ‘e Fakamaau Lahi Cooper ‘ene hopo pea ‘oku ‘ikai ongo’i ‘e ia ‘oku fakafiemalie ki he Loea ‘o e Talatalaaki pea mo e Fakamaau. Ka na’e ‘ikai ha fu’u makatu’unga fefee ke tali ai ‘ene ta’efiemalie pea hoko atu ‘a e hopo. Ka ko’ene kuo hao ka na’e ‘ikai ha toe lave ‘a Kolio kiai ka na’ane fakamalo’ia’i ‘eia kau Sula.
Ko e Fakamaau’anga Tangi hoko ‘oku fa’a lele tu’o ia he ta’u pea ‘oku te’eki mahino pe ‘e lava ‘o lele he Fakamaau’anga Tangi faka’osinga ‘o e ta’u pe ‘e toki fakahoko ‘i he hopo he kamata’anga ‘o e ta’u fo’ou.
