Tukuaki’i langa fale ongotama ngaue he MOI ka na’e ‘ikai kau he uesia
Kuo ‘ikai ha tali pea mei he Minisita ‘o e MOI Seventeen Toumo’ua, ki he fehu’i mei he ongoongo ni ‘i he fakamatala kuo a’u mai, ki he tokoua ‘o ‘ene ongotama ngaue mo vaoofi mo e Minisita, kuo langa hona fale ka na’e ‘ikai ke ‘iai ha uesia ‘e hoko ki hona fale.
Na’e kau ‘i he tukuaki’i ki hono toe fakakau hono hingoa he ni’ihi na’e totongi ‘enau pa’anga ki he langa, mei he pa’anga tokoni ‘a e Kolosi Kula. Ko e feinga pa’anga ‘eni ia ‘a e Kolosi Kula ke tokoni ki he kakai na’e uesia honau ngaahi ‘api pea fiema’u kenau totongi ‘a e pa’anga ko e meimei $5000 kae lava ke toki langa honau fale tokoni mei he pule’anga.
‘I he fakamatala falala’anga ‘oku ma’u he ongoongo ni, ko e lisi pe kakai ‘oku totongi ‘e he Kolosii Kula, ‘oku fakatatau pe ki he lisi ‘oku ‘oange mei he potungaue MOI.
Na’e kau he fehu’i, ‘a e fakamatala ki he tu’u ‘a e ngaue he ngaahi motu ‘i Ha’apai ko e ta’efiemalie ‘a e kau konitulekitaa ki he tuai ‘a e totogi ange ‘enau seniti pea pehee ki he feliuliuaki he ngaahi mape fale, ‘o toe lahi ange ‘a e fakamole kae ‘ikai hiki ‘a e pa’anga ‘oku totongi ‘e he pule’anga ki he fo’i fale.
Na’e fakamahino pe ‘e he ongoongo ni ‘a e ‘oatu ‘a e fehu’i ke lava ‘o fakapalanisi ‘a e ongoongo ka na’e ‘ikai pe ke ‘iai ha tali mei he Minisitaa pea mo’ene CEO.
Ko e ongo tangata ‘oku tukuaki’i, ko e ongo tangata voafi ‘aupito pe mo e Minisita ‘i he ngaue’anga, kuo langa hona fale ka na’e ‘ikai uesia hono ongo fale he fakatamaki na’e hoko.
‘Oku ma’u he ongoongoni ‘a e hingoa ‘o e ongo tangata ngaue, ka ‘oku malu’i pe ko e ‘ikai ke ‘iai ha tali mei he Minisita, ka ‘oku kau ‘eni ia he founga ngaue ta’efaitotonu mo fakapone, ‘oku lahi ‘a e feinga ke tuku ka ‘oku ‘ikai pe ha ola.
Kaekehe kuo ma’u he ogoongo ni ia mo e ngaahi ‘ata ‘o e koloa ‘oku laku pe he ‘one’one pea mo e ngaahi fale ‘oku vaoa hono tu’u’anga ‘o mahino na’e tu’u fuoloa ‘a e ngaue ‘oku te’eki ke ‘osi. Pea ko e fakamo’oni ia ‘oku ‘iai ‘a e palopalema he langa ‘oku fakahoko.
Na’e tu’utu’uni foki ‘a e Fale Alea ki ha komiti ke siofi ‘a e tohi tangi ‘a e kau konitulekitoa, ko e ta’efiemalie ki he fouga ngaue ‘a e pule’anga, ka ‘oku te’eki ke ‘iai ha lipooti ke tuku mai ki he kakai ‘o e fonua ki he palopalema ko’eni.
Kuo ‘iai ‘a e kakai ia ko e ‘osi ‘eni ta’u taha mo e te’eki pe langa hanau fale kae kei nofo teniti pe.
