Tui Palemia, ‘oku hala taimi faitu’utu’uni ‘a e Kapineti maloloo ke fakaloloa aleapau ngaue ngaahi poate
Ko e taha foki ‘a e kaveinga na’e tokanga kiai ‘a e tokolahi, ko e mahino na’e hanga ‘e he Kapineti motu’a ‘o fakaloloa ‘a e aleapau ngaue ‘a e ngaahi poate ‘a e pule’anga, kimu’a pea toki huu mai ‘a e pule’anga fo’ou. Ko e fo’i vaha’ataimi foki ‘eni ia, ‘oku ‘iloa ko e taimi le’ole’o pea na’e fehu’ia he tokolahi ‘a e makatu’unga na’e fakahoko ai ‘a e tu’utu’uni Kapineti ko’eni, kae ‘ikai tuku ki hono taimi totonu.
Ka ‘i he fakama’ala’ala ‘a e Palemia ki he kau faiongoongo, na’anau ‘osi vakai’i ‘a e tu’unga fakalao ‘o e tu’utu’uni ‘a e pule’anga maloloo pea mo’enau (pule’anga) tu’utu’uni koia kaniseli.
‘I he me’a ‘a e Palemia ko e faitu’utu’uni na’e fakahoko ‘e he pule’anga maloloo na’e taimi hala. Na’e totonu ke toki ‘osi ‘a e taimi aleapau, ‘aia ‘oku toki ‘osi ki he ‘aho 28 ‘o Ma’asi pea toki fakahoko ai ‘enau tu’utu’uni. Ka kuonau fakahoko ‘e kinautolu ‘enau tu’utu’uni ‘oku te’eki ke a’u ki he taimi koia. Pea ko e fakalea ‘a e Lao,” ko e pule’anga ‘oku fakafatongia ‘aki ‘a e fakaloloa ‘a e ngaahi aleapau. Pea ko e me’a totonu pe ia na’e totonu ke fakahoko, ke toki ‘osi honau taimi aleapau ngaue pea toki fakahoko ha tu’utu’uni.
Kaekehe ‘i he taimi tatau, ‘oku tui ‘a e kau fakafofonga lao ia ‘e ni’ihi ‘e ‘iai ‘a e fakatonutonu fakalao ‘i he faitu’utu’uni ‘a e pule’anga fo’ou. He ko e tu’utu’uni na’e fakahoko ‘e he Kapineti maloloo, ko e tu’utu’uni ‘a e pule’anga. Pea ‘oku tatau ai pe ko e pule’anga fakataimi, ka ‘oku nau fakafofonga’i ‘a e pule’anga he taimi na’e fakahoko ai ‘a e tu’utu’uni Kapineti.
Kuo ‘osi fakahaa ‘e he pule’anga lolotonga, kuonau kaniseli ‘a e tu’utu’uni Kapineti ki he fakaloloa ‘a e ngaahi poate pea kuo kamata ‘a e ngaue ki hono tu’uaki atu ‘o e ngaahi lakanga memipa poate ki he kakai ‘o e fonua. He ‘oku fiema’u ‘a e kakai totonu ki he poate totonu kae lava ‘o matangi lelei ‘a e ngaue.
Ko e taimi tatau kuo ongo mai ‘a e ngaahi talanoa ia, kuo ‘iai ‘a e ngaahi poate kuo kamata ‘enau ngaue fakalao ‘a kinautolu ki he tu’utu’uni ‘a e pule’anga ke kaniseli ‘a e tu’utu’uni fakaloloa aleapau ngaue.
Na’e ‘osi ‘oatu pe foki ‘a e hoha’a ‘a e kakai ‘o e fonua ki he ngaahi vaa fakapolitikale, na’a hoko ia ke fua he kakai ‘a e fakamole ki he totongi loea. He ‘oku mahino ko e ngaahi poate ko e tukuhau ia ‘a e kakai pea ko e pule’anga ko e pa’anga pe moia ‘a e kakai. Ko’ena fakatonutonu fakalao, ko e kakai ‘o e fonua ‘oku fua hia.
