Too fakapo’uli ‘a e Lulutai ko e maumau ‘a e maama ki he to’anga
Na’e ‘ikai ha toe fili ‘a e pailate ‘o e vakapuna Twin Otter ‘a e kautaha vakapuna Lulutai, ka ko’ene feinga ke too he mala’e vakapuna Fua’amotu lolotonga ‘oku ‘ikai ulo ‘a e maama ki he too’anga (runway), ‘i he poo Tusite 11 Ma’asi.
Ko e hono fakama’ala’ala ia ‘e he Minisita ki he Ngaahi Pisinisi ‘a e Pule’anga Hon. Piukala ki he kau faiongoongo ‘i he ho’ata Falaite.
Fakatatau mo e fakamata ‘a e Hon. Piukala, “na’e toki fakatokanga’i pe ‘a e maumau ia ‘a e maama, he toe ‘a e lau miniti pea too ‘a e vaka, ko’ene foki mai ai mei Vava’u. Na’e fetu’utaki hake ‘a e taua mala’evakapuna ke toe takatakai pe ‘i ‘olunga kae fakahoko ha ngaue ki he maama.
Ko e tokotaha ‘enisinia ‘oku nofo ia ‘i Popua pea ka feinga ki mala’evakapuna ‘e houa ‘e taha pea toki a’u, ka ‘e tuai ia ki he nofo ‘a e vakapuna ‘i ‘olunga he ‘oku fiema’u ia ke fai mo too. Na’e fakahoko pe ‘a e fakahinohino mei he ‘enisinia ki he kau ngaue ‘i mala’evakapuna ‘a e me’a ke ngaahi, ka na’e ‘ikai ke ola lelei.
Na’e fe’unga mo e miniti ‘e 40 ‘a e takatakai ‘a e vakapuna Twin Otter he ‘ataa pea ‘oku fiema’u ia ke too koe’uhi ko e tu’unga ‘oku ‘iai ‘ene ‘utu. Na’e ‘ikai ha toe fili ‘a e pailate mo e kau ngaue ‘i mala’e vakapuna, ka ko e fakakaukau’i ha founga. Na’e ‘omai leva ‘a e ongo loli tamate afi ‘a e mala’e vakapuna ‘ona takitaha ‘a e ongo tafa’aki too’anga, ‘ona hulu’i ‘a e fanga ki’i maama faka’ilonga, ‘o lava lelei ‘a e pailate ‘o sio ki he maama ‘ene tapua mei he hulu ‘a e ongo loli tamate afi, ‘o lava lelei ai ‘a e vakapuna ‘o too lelei ‘ikai ha fakatamaki ‘e hoko.”
Neongo ‘oku faingamalie pe me’a kotoa, ka ‘oku hoha’a ‘a e Minisita ki he ngaahi palopalema pehe ni ke fai hono fakalelei’i koe’uhi ko e mo’ui ‘a e kau pasese. Pea ‘oku fakahoko ai ‘a e fakatotolo ki he me’a na’e hoko.
‘I he me’a ‘a Hon. Piukala, na’e mei fetu’utaki ‘a e kau ngaue mala’evakapuna ki he kau Polisi kenau fakafe’ao ‘a e ‘enisinia ki mala’evakapuna. ‘I he founga koia mahalo ko e miniti pe 10-15 kuo a’u ke fakahoko ‘a e ngaue ki he maama.
Na’e toe fai tokanga ki hono vakai’i ‘o e maama ha taimi fe’unga kimu’a pea toki too ‘a e vaka, he ko e tukunga ee ‘e hoko hono toki fakaulo he taimi too ‘a e vaka kuo mate ‘a e maama ia. Pea kapau na’e hoko ha fakatamaki ko e toe lahiange ia ‘a e palopalema, he fanga ki’i ta’etokanga iiki.
