Tohi Tangi ki he Sea Fale Alea ke tuku kitu’a CEO TDB pea fai ha ngaue ki he Poate.
Kuo ma’u he ongoongo ni ‘a e tatau ‘o e tohi tangi kuo fatu he ‘aho 7 Fepueli, ‘o fakatu’asila ki he Sea ‘o e Fale Alea ke tuku kitu’a ‘a e CEO ‘o e Pangike Langa Fakalakalaka ‘a Tonga Mrs ‘Emeline Tuita.
‘Oku makatu’unga ‘eni ‘i he ngaahi fakamatala fekau’aki mo e tokotaha ni mo e anga ‘ene fakahoko fatongia ‘i hono lakanga ko e CEO ki he Pangike ‘a e Fonua mo e mahu’inga lau miliona lahi hono mahu’inga.
Ko e ngaahi tukuaki’i lalahi ‘e 9 ‘oku ha he tohi tangi ‘o kau ai ‘a e ngaahi tukuaki’i hia mo e ngaahi faitu’utu’uni ta’efakapotopoto. Ko e ngaahi ta’efiemalie mo e tukuaki’i:
1) Maumau’i e lao fakangaue, ‘oku ne tapu’i ‘a e kau ‘Ofisa Ngaue Fakapangike ke
nau ‘ave ha fakamatala ‘o ha Kasitoma ‘o e Pangike ki ha tokotaha kehe (breach of
customer confidentiality / maumau’i hono tauhi e lekooti fakapangike ha kasitoma ke malu.
2) Fa’ufa’u ke fakakau e PFT, Pule’anga, Falealea, mo e Kelekele ‘Ene ‘Afio ‘i he fo’i
palani ke kaha’asi e faingamalie ‘a e Cost Low kae pule’i ia ‘e he CEO PFT mo e
ni’ihi kehe.
3) Tuku ‘a Tufumahina hoko atu ki Polata’ane moe vilitaki ke Fokotu’u Pisinisi ‘a e
PFT mo ‘Ene ‘Afio (pe koe Joint Venture)
4) Holo lahi ‘a e pa’anga ngaue ‘a e Pangike mei he $89 miliona ‘i Akosi 2022, $23
miliona ‘i Siulai 2023, ki he $9 miliona pe ‘i Aokosi 2023, ko e fuofua ta’u ngaue ia
‘a e CEO.
5) Hoha’a lahi ‘a e Pangike Pule Fakafonua ‘o Tonga (PPFT) ki he founga fakalele ‘o e
PFT mo hono toutou mauma’ui ‘o e lao ki hono noo atu ‘o ‘ene kitu’a.
6) Maumau’i e Lao ki he Palani mo hono Pule’i ‘a hono ngaue’aki ‘o e ngaahi feitu’u
2012 (National Planning and Management Act 2012).
7) Koe fakatokanga na’a kuo uesia lahi pe mole ‘a e Pa’anga Vahenga Malolo e kakai
‘o e fonua ‘oku lolotonga fakahuu he PFT.
8) Kuo hee lahi ‘a e Pangike mei he taumu’a totonu ‘o e Pangike Langa Fakalakalaka
ke hakeaki’i ‘a e kakai masiva.
9) Fakafoki e taumu’a ‘o e PFT ki he fuofua makatu’unga, ko e pangike ma’ae kakai
moe ‘uu pisinisi Tonga ke tokonia ‘enau ngaahi ngaue langa fakalakalaka ‘oku
fakasitu’a mei he ngaahi Pangike Fakakomesiale ‘o muli.
Kaekehe na’e ‘osi tuku atu he ongoongo ni ‘a e fakamatala ki he hopo ‘a e Pangike Langa Fakalakalaka mo e Cost Low, ka na’e hoko ia ke faka’ilo ai ‘a e ongoongo ni ka kuo tuku atu he loea ‘a e ongoongo ni ‘ene tali ki he tukuaki’i kuo fakahoko mei he pangikee.
Ka ko e toe mapuna hake ‘a e kaveinga tatau mo e ngaahi me’a kehekehe ‘oku ‘ikai ke ‘ilo pe koeha ‘a e sitepu hoko ‘a e pangikee, kapau tenau fakahoko ha ngaue fakalao ki he ngaahi tukuaki’i.
‘Oku fakaikiiki foki he tohi tangi ‘a e ngaahi tukuaki’i lalahi ko’eni ‘o e CEO ‘o e pangike pea pehee ki he Poate, ka ‘e toki ‘oatu hono fakaikiiki ‘i ha a’u ‘a e tohi tangi ki he Sea ‘o e Fale Alea.
