Te’eki mahino lahi maumau mo e taimi ‘osi ngaue ki he motu keipolo ki Vava’u.
Kuo fakamahino ‘e he pule ki he tafa’aki ‘o e Fetu’utaki (Communication)’a e pule’anga MEIDECC, Stan ‘Ahio ki he kau faiongoongo ‘i he fakataha he ‘ofisi ‘o e MEIDECC, ko e tu’unga ‘oku ‘iai ‘a e maumau ki he keipolo mei Tongatapu ki Vava’u mo Ha’apai, ‘oku te’eki ke mahino koeha hono lahi mo e taimi ke ‘osi ai ‘a e ngaue fakalelei.
Fakatatau ki he fakamatala na’e tuku mai ‘e Siofate Kolo mei he Tonga Cable, “na’e fakatokanga’i ‘a e palopalema ‘i he ‘aho 6 Tokonaki Siulai ‘i he taimi 2:00am pea pehee ki he 2:43am. Pea ‘oku mahino ko e motu ‘a e keipolo pea ‘oku mahalo’i ko e motu ‘a e keipolo ‘i he mofuike na’e fa’a too he ngaahi uike kuo maliu atu, ‘o hoko ai ‘a e holo(landslide) ‘i he ngaahi mo’unga ‘i kilisitahi.
Kaekehe ko e 96 kilomita ‘oku hoko ai ‘a e palopalema mo e 73 km pea ‘oku fakatatali ‘a e ngaue ke savea’i ‘a e lahi ‘o e maumau ki he taimi ‘e a’u mai ai ‘a e vaka ‘a e kautaha ‘oku nau fakahoko ‘a e ngaue mei Singapore ki Ha’amoa, he kongaloto ‘o e mahina ni pe ko e konga kimui ‘o e mahina.”
‘I he hoko atu ‘a e fakama’ala’ala ‘a Sosafate ki he kau faiongoongo, “ka fakahoko atu ‘a e Savea ‘oku ‘ova ‘a e loloa ‘o e maumau ‘i he 50km pea ‘e toe loloaange ‘a e ngaue ‘e fakahoko pea ‘ikai mahino ha taimi ia ‘e lava lelei kiai ‘a e ngaue, he ko e ngaahi naunau ‘oku ma’u he lolotonga ni ki he ngaue ‘i Tonga ni ‘oku fakafuofua pe ia ki he 50km te ne malava ‘o fakalelei’i.
Ko e motu fakamuimui ‘a e keipolo na’e hoko ia ‘i he too ‘a e mo’unga afi Hunga Tonga Hunga Ha’apai ‘i Sanuali 2022 pea ko e ‘uluaki motu na’e hoko ia ‘i he 2019 he mei mahina ‘e 2, makatu’unga mei he vaka uta koloa. Pea ko e motu hono tolu ‘eni mei he mofuike.
Ko e palopalema foki, ko e tu’u ‘a Tonga ‘oku ofi he fetaulaki’anga ‘a e ongo peleti ‘i kilisitahi ‘oku lahi ai ‘a e mo’unga afi. Pea ko hono fakatoka ‘oku pau ke fou atu ia he ngaahi feitu’u ko’eni. Ko e fakatoka ‘o e laine keipolo ki ha feitu’u ‘oku maluange mei he mo’unga afi mo e mofuike, ‘e fakamole lahi koe’uhi kuopau ke fakatoka ia he halanga ‘oku loloanga ange.
Na’e ‘i he fakataha mo e ongo pule ‘o e kautaha Digicel mo e TCC, koe’uhi koe’ana kau kasitomaa ‘i Vava’u mo Ha’apai, ka kuo ngaue atu ‘a e ongo kautaha ‘o ngaue’aki ‘enau satelaite ke tu’u talifaki ki he ongo vahefonua ni lolotonga ‘a e maumau ‘a e keipolo. Ko e palopalema heni ko e ‘ikai ke vave mo oma tatau ‘a e lahi ‘o e network ‘oku tuku mai he satelaite. Ka neongo ‘oku tuai ange ka ‘oku malava pe ke fakahoko ha fetu’utaki mo e ongo vahefonua ni.
Na’e faifoki hono fakafehu’ia ‘a e tu’unga ‘oku ‘iai ‘a e kautaha ko e Starlink, ka na’e fakahaa ‘e Stan ‘Ahio ‘oku te’eki fakalao ‘a e kautaha ni ke ngaue ‘i Tonga ni, ka kuo fakapapau’i foki ia kuo’iai ‘a e kakai ‘o e fonua ‘oku nau ‘osi ngaue’aki ‘a e kautaha ni.
‘I he taimi tatau na’e fakahaa mei he tafa’aki ‘a e pule’anga ‘oku fakahoko ‘a e ngaue ke ua ‘a e halanga keipolo ki Vava’u. Ko e tu’u lolotonga ‘oku lele ia mei Fisi ki Tongatapu pea mei Tongatapu ki Fisi, ka ‘oku fai feinga na’a lava ‘o kolosi hangatonu pe mei Fisi ki Vava’u. Ko e taimi ‘e palopalema ai ‘a e halanga mei Tongatapu ‘oku lava pe ‘a Vava’u ‘o lelei mei he halanga mei Fisi.
